Tunlai chu www.misual.com thlarau hian min han chiah hneh khawpa, ka rilru leh ngaihtuahna luahtu ber zu han ni tlat peka. Engvangin nge Benjamina pui roh hian kan website atan hian misual.com ber kher a thlan le aw tiin ka ngaihtuah ka ngaihtuaha, engvangin nge mifel.com tiloa misual.com a tih nachhan zeldin thu bawl chungin I lo thlir kual dawn chhin teh ang. Ni engzat tak he thu phuah tur hian in ngaihtuah ve tak ang maw? A tawp a tawp ah chuan hre chhuak tain ka in hria a, ka thawveng huai mai.
A pakhatnaah chuan kan Editor hi ringtu tha tak, fel tak, Pathian tih mi tak niin he khawvelah hian mifel reng reng, pakhatte mah an awm lo a, misual vek kan ni tih hre chiang em em turah ka han ruat nghal ngawta. Chumi hre reng chunga mifel.com tiloa misual.com ti niin ka hria a. mahse Articles tam tam ah Pathian thu vek inziak ka hmu bawk siloa, Topic hrang hrangah thenin Politics lam rawngkai te ka hmuh nual avangin Pathian rin vang ngawr ngawr a, misual.com a phuah chu a nih ka ring leh ta loa.
A pahnihnaah chuan Politician, ram leh hnam hmangaih em em tu niin ka han hre leh a. Kan chenna zoram zimte chhunga mipui hmangaih em em tu, an diklohna leh fellohna siamthat tuma, kan sualna vei em ema, he thu hi phuah niin ka hria a. kan zoram chhunga mi pamham leh vervekte, politician te duhamna leh zoram thalai rual Pathian lam hawisana, Drugs Addict leh Zua intallut leh Setana boihte an tam leh kan felloh em vang niin he thu hi phuah niin ka hre bawk. Mahse a chhungah Movies and pictures tithe leh Humours Etc etc te a awm nual avangin, Politics vang ni ngawta ka hriat loh avangin ka ngaihdan ka sawhsawn leh taa.
A dang pakhat lehah chuan kan Editor hi Literature a tui em em, ziak mi tak ni hian ka han hre leha. Achhanchu Literature a tui loh chuan website pakhat ringawt pawh hi enkawl leh vil reng ngai, uluk taka ven ngai, buaitsaih ngai anih avangin tlin leh peih reng chi niin ka hre lo. Chuvangin William Shakespeare a tupa ah ka han puh ringawta, dik tak maw! Mahse tlemin ka han ngaihtuah thui deuh a,thalai ziakmi chawkphura, an talent haichhuaktu ropui niin ka han hre leh zawka, mi rilru zau tak niin Zirtirtu ropui tak Plato-a tupa makpa niin ka hre leh zawk tlat pek . Michi hrang hrang ziak tir te te pawhin inthlahrung hauh loa, an ngaihdan, an veizawng an ziah ngamna a nitlat. Mahse chuvang nise misual.com a phuahna chhan ngawt hi a ni thei bawk silo.
A phuah chhan hi ka han ngaihtuah nasa khawpa, ka hre thei hlawl lo. Vawitam lutuk a phhuahchhan hre tur hian ka tawngtaia, a tawp a tawp ah chuan ka mit ata phuhlip ang hi a lo tla a, ka hrechhuak ta. Ka lawm lutuk hi “Eureka! Eureka” ti hian ka zuang tawr tawr maia. A phuahchhan hi chu a lo ho angreng khawp:
“A duh vang lekin a lawm le www.mi(sual).com a lo tih mai mai ni” Dik tak maw!
