(Kima lanna ngei thlalak ka nei asin le…….ka upload thei lo reng rengsss…)
Nl. VL Thanzâmi, University of Central Lancashire, UK-a Lecturer hi ka hmachhawn lo a, a biak pawh kan inbe hek lo. TV-a a interview-na atangin hei hi ka la chhuak a, tlema zawng ka rawn pho chhuak a ni.
I nu leh pa hming min hrilh thei em?
Ka pa chu VL Rema a ni a, P&E Dept. ah CE a ni thin a, tunah chuan a pension tawh a. Ka nu chu Dr. Darchhingpuii a ni a, CTE ah reader a ni.
I unaute?
Unau 4 kan ni a. Ka u hi ka nu thawhna CTE ah Lecturer a ni a. Ka chhang chiah hi Bombay-a company pakhata Human Resources-ah Executive a ni a. Kan te ber hian (…he pa hian Arsenal jersey a hak ngei rin a ni!!!) Computer Engineering a zawh hnu-ah zirna sang zawk a zir leh mek.
I lehkha zir laiin a thiam thei pawl i ni em?
A….ka tet lai chuan a thiam thei pawl ang chu ka ni a….mahse..a…vantlang chung lam chu a tih theih mai ang..
Khawi hmunah te nge i zir a, eng thleng nge i zir?
Hmun hrang hrangah ka zir a. Darjeeling-ah school ka kal a, College chu Delhi Univ. ah ka zir leh a. MA kha NEHU-ah ka ti a, chumi zawhah Ph.D (Psychology) ka ti leh a.
Chuan Ph.D chu khawi hmunah nge i tih?
University of Central Lancashire, Preston-ah a ni a, England hmar thlang lama awm a ni.
Doctor an ti ve tho che u em?
Aw..Doctor chu min ti ve.
Tunah khawiah nge i thawh le?
Ph.D ka tihna hmunah tho khan Lecturer in ka thawk nghal.
Engtin nge i luh? Interview te i nei ve em? Nge, an lo sawm tawp mai che?
Aw, interview awm e. Presentation pawh kan ti vek.
Intihpui te a awm thei lo ang chu maw?!!!
Awm thei lo. Interview hi session 2 ah then a ni a, panel pawh mi hrang vek an ni.
Chung thil zawng zawng kal tlang chuan Mizo nula i thawk a ni a, i chhuanawm hle mai. A nih leh kum engzat nge i thawh tawh?
Lecturer ang chuan tun hi ka kum 3 na a ni tawh.
Mizo emaw, Indian hrim hrim thawk an awm ve em?
Kan Dept. ah chuan an awm lo a, Faculty dangah chuan tlem an awm ve.
In University chu a tha pawl a mi in nih? Enge in dinhmun?
England-a University an teh dan ber chu research lam pang atang hian a ni a. Chu chu a pumpui ang khan an teh lo a, Dept. hrang hrangah an titha nge tha lo tih atangin a ni a. Research Assesment Excercise kha kum eng emaw zat danah an nei ziah a, chutah chuan engzatin nge International Journal-ah paper publish tih atang khan an teh ta a. Keini Dept. hi a tha pawl kan ni a, University pumpui chu tehna a awm chuang lo.
He University a thawh hi i lo tum sa reng em ni?
Ka ngaihtuah ngai miah lo a, ka Ph.D zirlai zawh kha ka tum chu a ni mai a. Mahse, ka degree neih ni chiah khan kan Dept.-ah post ruak a awm tih min hrilh a, a tuk tuk leh kha dead line a ni mai tawh si a. Ka dil ve ta a, min la ta hlauh a ni.
Eng anga thawk nge i nih? A nghet nge nghet lo? Keini ang hian contract basis te hi a awm ve em?!!
A hma kum hnih kha chu a nghet lo-in ka thawk a, tunah chuan ka nghet ve tawh a, ka duh chen chen ka thawk thei a ni mai….
In zirlaite chu English vek nge, hnam hrang hrang kalkhawm? Indian an awm ve em?
A tam zawk chu English an ni a, tin, Europe hmun hrang hrang atanga lo kal an awm bawk a. Indian chu an awm lo, vai chu an awm a mah se, British an ni.
Duhsak bik an awl viau lo maw?
Duhsak bik a awm thei lo. Kan assess dante, kan mark dante hi system a awm vek a, exam paper phei chu tunge a nih kan hre lo hrim hrim.
Nikhatah darkar engzat nge in thawh?
Class kan lak dan hi a dang a, nitin class ka nei lo a. Ka chan lai bik a nih chuan kar tluana neih chang ka nei a, kar tluana awl chang pawh ka nei. Nikhata vawi khat chiah neih chang pawh ka nei. Semester intan dawnin kan chan tur min hrilh vek thin.
Preston ah chuan in i luah nge quarter an pe che?
In ka luah a, Ph.D ka tih tirh atang khan campus pawna Student’s House an tihah ka awm a, tun thlengin ka la awm reng.
A to em?
Aw, to ve tho mai.
A nih leh engtinnge working permit i neih mai theih?
Permit nei tur chuan hna hmuh phawt a ngai a. Hna ka hmuh avangin ka thawhna, kan University khan min dilsak ta a, a man pawh an chawi vek.
A nih leh in zirlai te chu engang mi nge an ni? An titak tak em? Nge inchei takin University zirlai an ni ve ringawt?
An inpawlh. Serious deuh, harsa chung chunga zir pawh an awm ve tho a. Zir tha duh vak lo, inchei tak te pawh an awm ve tho.
Mizo te tana entawn tur ang chi an awm em?
Education hi an upat thlengin an ngai pawimawh a, chuvang chuan upat hnu-a university kal leh te an awm a. Hna thawk chunga an kal chuan an hun pum an pe thei si lo a, chuvang chuan an hna atangte-in an bang a. Degree neih theihna turin theihtawp an chhuah a, an entawn tlak ka ti.
Chuti ang chu Mizo te hian kan ti ve thei angem?
Kan culture hi a inang lo lutuk a, sawi theih niin ka hre lo.
Hnam dang kara thawk i ni a harsatna tawh chang, beidawn chang, hrehawm tih chang i nei ve thin em?
Harsatna em em sawi tur ka nei lo-in ka hria. Discrimination chu a awm lo thei lo a, mahse ka ngai pawimawh duh lem lo.
An nunphungah enge entawn tur kan neih le?
Hna an thawk nasa a, thil an la serious-in a hun leh hmun an hriatna.
I hlawh zat chu ka zawt lo ang che’nga, mahse, i nu leh pate engzat nge i rawn thawn theih? Nuamsa tawkin i awm thei em?
Aw..awm ve thei a ni mai. Ka nu leh pate hian ka hlawh hi thawn turin min beisei lem lo a, ka hman lohte chu ka khawl mai thin.
Pasal lam te?
Chuti ang lam chu ka la ngaihtuah lo. Kum 3 chauh ka la thawk a, Research tih chhoh zel rih hi ka la duh a ni.
Lecturer chu eng angin nge an thlir che u.
Min zah ve khawp mai.
Football te i en ngai em?
En ve thin e. Liverpool hi ka tan a, mahse kan khaw club Preston North End hi ka tan ber a. Tun season chu an che tha a, season tharah chuan an promote ve mai thei a ni.
Player larte i hmu nual tawh lo maw?
Aih, league hniam lama mi lo chu hmaichhanah hmuh ka la nei lo.
Engtinnge hun awl i hman thin?
Kan zirtir bakah research tih reng a ngaih avangin hun awl ka nei vak lo. Week days-a hun awl ka neihah chuan Gym-ah te ka kal a, weekend ah chuan inrinni hian ka bazar ve thin a, Pathianni chuan ka inkhawm thin.
Mizo thalaite hian enge kan mamawh i tih?
Kan thil tih-ah tih tak takna kan mamawh a, eng pawh ti ila hlawhtling tura theihtawp chhuah kan mamawh a ni.
Taimakna, thahnemngaihna tak tak kan nei lo i tihna a ni maw?
Aw.
England-ah chuan Kristian an tlem sawt an ti thin hi a dik em?
A dik, a bikin thalai hi an tlem lutuk. Tuna kan inkhawmna-ah pawh a tam zawk chu upa lam an ni. Keimahni aia thil tithei Pathian a awm hi an ring lo a, an nun hi anmahni thu-a kalah an ngai a. Kan Dept. ah phei chuan kei chiah Kristian ka awm. Pathian a awm a nih chuan a fiahna an beisei a, Bible te hi engah mah an ngai lo.
Missionary ang hialin i thawk a ni mai lo maw?
Aw…ka thiante chu ka hrilh ve thin a, mahse mak an ti. Ph. D ka tih tirhin mi pakhat hian, ‘Scientist i ni a, engtinnge Kristian i nih theih?’ min ti hial. Kan titi ho-a, inhnial chang pawh kan nei thin.
Thawh reng i la tum em?
Ka research tihnan a rem avangin ka la awm rih ang.
Mizo thalaite tan hian ram pawna hna thawh hi tha i ti em? Enge i ngaihdan?
An hnathawh a-zirin tha ka ti. Mi tam tak chuan hna thawk tura ram danga kal hi tha an ti a, a nawm te an ring a. Mahse, keima ngaihdan chuan an kal duh a nih chuan an hriatchian phawt a ngai ka ti a. A chhan chu ram hla taka hlawh tam vak lo-a hrehawm taka awm ai chuan kal loh mai kha tha ka ti a. A pawimawh ber chu kal hma-a ruahmanna fel tak siam hmasak hi a ni.
In University ah chuan Mizo thalai te’n lo zir ve duh ta se engtia tihtur nge ni ang?
Enge an zir duha engtin nge an chhawr tangkai theih ang tih an hriat a pawimawh ber a. Degree zuk neih ringawt kha a ni lo a, heng thilte hi ngaihtuah tel vek a ngai a. Heng thilte an hre veka an zir duh a nih chuan University zawng zawngin website an nei vek a, heta tang hian hriattur pawimawh chu a lak theih ang a. Tin, international students te hi an ngai pawimawh em em a, Dept. tinah a enkawltu bik an insiam thin. Ka sawi tawh angin thil an la serious em em a, e-mail te an thawn a nih chuan an rawn chhang ngei ngei ang.
Mahni insawi lamah lo ngai lo la, mite hian nangmah atang hian enge zir tur an neih?
Tumruhna, thil dang experience duhna, ka thil tih lai LUNGLENNA in min tibuai lo.
Tet te atanga Zoram pawna awm i ni si a Mizo tawngah hian harsatna i nei em?
Harsa chu ka ti vak lo a, mahse Mizo tawnga ka tawng chhun chu ka chhungte ka rawn biak leh England-a Mizo awmte nena kan inbiak hi a ni deuh mai.
Nu leh pa, thalaite hnenah hian enge chah duh i neih le?
Lehkha zir lam lo ni ta se, zirlai tam tak hi chuan enge an nih dawn hre lo hian thil hi an zir pawp pawp a. Degree te an han nei a, mahse an tih duh hi an hre lo a. Chuvang chuan an zirlai hian an nih tumah chiang se an tan pawh a awlsam zawk ang. Career Guidance te hi a pawimawh em em a, school-ah te hian eng kawngah nge an kal ang ti-a lo kaihhruai hi a pawimawh em em a ni.
