mi(sual).com

Lalremliana Pachuau,
Infosys Campus, Electronics City, Bangalore.

Mahni tawk ah kan ram a hna vang leh hnathawh tur awm si loh vang a talbuai Graduate leh PostGraduate tam tak an awm tih han hriat han hriat leh thin hian thil tam tak min ngaihtuah tir fo thin. Heng ho tan hian hun a liam zo ta ni ber hian ka ngai thin. Mahni in chhuahsan ngamlo leh awm mai mai ho hian ( tih tur vak nei hek lo ) kan Zoram chhung ringawt thlir lo a ram pawn kan pan ngam te a nih ngawt loh chuan tun atang a kum sawm an ral meuh chuan Val to lo kan phu suau suau ngei ang.

Kan Nula ten Pasal tha neih tur an van a nga, hnam dang tawn ah run min kaisan anga kan Zoram khawvel chu a buai nuai ngei ang tih thleng thleng in suangtuahna mit in kan hun lo kal tur ka lo thlir lawk thin. A thupui khi ngun tak a ngaihtuah chung a he article hi lo chhiar tum ang che u.

Kan tunlai khawvel hi han thlir teh u, nang ni tan liau liau a hun tha in hawn lai a ni tih hi inhriat ka duh takzet a ni. Information technology age ah kan tunlai khawvel hi a awm mek a, in hma ahuntha awm hi in hriatloh ka hlau a ni. Tu vak mah in kawng an kawh hmu kher lo ang che u tih hria in everyman for himself tih hi thupui ah nei ngei tur in ka ngen che u a ni, in future bright zia te hreloin in lo awm mai mai ang tih hi a hlauhawm a nia ! Middle school in zoh a High school in han rah chiahhian in hmalam hun atan a inbuatsaihna a in tan tih hi lo hre tawh ang che u.

Tun hma te kha chuan pawl sawm kan zawh hian khawvel thar chuang chhuak ah kan in ngai thin a tun thleng pawh in a la nih hi. Mahse chik tak a ka’n ngaituah thin hian pawl 8 kan han rah atang chiah hian kan subject tui zawng leh thiam zawng kan hriat tanna a lo ni reng mai a lo ni a. Zirtirtu ang a ka lo awm ve tawh na leh keima tawn hriat ngei atang a thil lo lang chiang em em chu kan hma lam hun kan lo ngaihtuah thui ngailo reng reng tih hi ani.

Enge nih I tum han ti ila tum sawi tur ting chu kan nei ve vek ang mahse kan nih tum ti puitling tur a inbuatsaihna erawh kan rilru ah a lian lo thin khawp mai ti ru. Tun ang zel a kan ram a kal a nih chuan in tan kan ram ah hian hnathawh tur a awm dawn lo tih chu tunlai kan Zoram dinhmun atang hian a hriat mai awm e.

Ngun takin kan hmalam huntur kan thlir a ngai tawh a nia. Enge ka nih tum a engtin nge he khawvel ah hian ka lo puitlin hun a Nu leh Pa te tibuailo a ka awm theih ang tih thleng in inngaihtuah tur in ka duh tak meuh meuh che u ani. Science lam ah ka kal dawn nge Commerce lam ah nge tih leh Arts lam ah ka kal dawn ti in in rilru high school in zawh hma ngei hian in siam fel tur a ni. Khawi hmun Zoram ni lo Vairam tin ah hian an zirlai te chuan pawl sawm pahnih ah hian Science lam ah a nih loh pawn Commerce lam an zir tlangpui tawh.

Chu tih rualin Arts lam a kal pawh an awm ve nual tho mahse an tlem khawp hlawm tawh mai. Sorkar ah hna an zawng tawhlo, khawvel Company lian ber ber ho ten India ram ah bu an rawn khuar a, sorkar aiin hlawh an pe hnem zawk bawk si a, heng Company a lut tur hian nitin India ram pumpui huap in hna zawng a interview te hi kum khat chhung a Indian Civil Service a lut tur a interview aiin an tam zawk ni a chhut a ni. Kan rilru a Mizo kan ni tih kan chian tluk hian Indian kan ni tih hi kan pawm ngei ngei tur a ni bawk.

Tun a Karnataka sorkar in a thil buaipui ber pakhat chu College leh University a hna thawk tur a post awm hnawhkhah theih si loh te zu han ni a ! Department dang ah pawh a ni tho. Kan peng ta duah a, kan rawngbawltu te tih dan kan hawh ve lawk a ni e. Thupui a lut ang aw.

Kan sawi nawn leh hram teh ang. High school kan zawh hma ngei hian kan riru kan siam fel ngei ngei tur a ni, chu ti lo zawng nakin ah a hming ve mai in Graduate emaw Post graduate hna neilo lehkhathiam thlawn I ni ve hlauh dah a nge. Engvang in nge pawl 12 ah science emaw commerce emaw vai ho hian an zir thin le ? Eng dang vang a nilo, rilru siamfel sa thlap in IIT ah nge ka luh ang IIM ah tiin entrance pe tur in an lo inbuatsaih der tawh zawk a lo ni.

Mizoram ah pawh pawl 12 zo te chuan Sorkar quota a MBBS, BE, etc zir tur in entrance exam an bei luai luai tawh hi. Kum tin in entrance pe an pung tual tual a, kum 2000-2002 vel te kha chuan a tam ber in MBBS zir an tum ber a, top 30 over all a nih loh phei chuan option dang an thlang ta vel mai mai a, mahse tun ah chuan BE zir tum an pung tam tial tial tlat. Ngatinge kan tih chuan India ram a hna rawn outsource tu tam zawk te hi IT related Co. an nih deuh vek vang in Computer thiam tan chuan hna a tam tlat tawh a ni. An hlawh lah a tha ropui si a, bak ah an hna hi call center tih vel ang a stable lo an ni bawk si lo nen sorkar hna ai a an thlang tlat pawh hi awm ve tak a ni.

Management lam ni se MBA finance, HR, accounts etc tan heng Co ah hian hna a tam lutuk tlat. IIT leh IIM zir chhuak te hian khawi ah pawh kal se hna an duh duh na ah hna an hmu thei zel a sin, US leh UK vel a Co lian a hnathawk tam tak te khu kan Indian pui te an ni tlat mai bak ah a thiam ber ber te an ni zui leh nghal! BCA leh MCA te pawh hi eizawnna tlak an nia sin.

Khawvel IT Co. lian ber pakhat IBM chuan kum 2008 a lo thlen meuh chuan mi nuai 1 leh sing 2 vel chhawr tum in tan an la mek a, heng ah te hian kan tan in tah luh ve na hun tha ah ngai in chance la ngam kan awm a ngem nge vai ho tan kan kian leh dial dawn, kan lungrual thei phian sia Mizo te hi ! Heng Co. Infosys, Wipro, TCS, HP, IBM, Accenture, Dell etc ah te hian eng tik lai pawn a thiam fa te ( chhungkhat leh hmelhriat neih that vang ni lo ) leh mithiam tak tak te tan hna an nei reng a, heng Co. te hi an ral mai mai dawn lo, khawvel awm chhung chuan an awm reng ang.

Tin thil pakhat ka helh deuh mai chu State dang a hnathawk a awmte hi nikhua lo leh awmherh ang ah hian mi tam tak in an ngai fo mai hi chu a dikhlel deuh hlek thin. Hmanni lawk a Youth Internet Ministry ah khan Mary Vanlalruat in Call center leh BPO chungchang a rawn sawi tawh a. Hna hahthlak zia leh hna namai a nilo tih a rawn ziah tawh kha, a sawi kha a dik chiah reng ani. Ti ta mai mai ila, India ram ah chuan Kerela State hi Literacy % ah pakhatna an ni a, a dawttu chu Mizoram. State dang te hi han thlir chin teh ang. Entirnan Bangalore a hna thawk a awm tam tak te hi Kerelian mi an ni tlat.

Khawi Co lian ah pawh kal la , Kerela mi hnathawk an lo awm zel ang. Kan office ah pawh an tam lutuk tlats. Anmahni tawng a an han ti ti siam siam han hmuh te hian rilru ah khawhar rukna riau min neih tir thin, ka awt hlawm thei khawp mai. An ram ah hnathawh tur a awm loh avang in State hrang hrang ah hna zawng in an kal darh a, an sorkar pawn theih ang tawp tawp in a buaipui hlawm thin a sin ! Kan office a chief security officer hi Colonel retired tawh kum 1985 a India leh Zoram in a in remna thu an ziahlai a Zoram Durtlang a awm thin a lo nia. Vawikhat chu Mizo hna thawk engzat nge awm che u tiin min zawt a, kei chuan Sir pahnih khat bak kan awm lo a nih hmel ti a kan sawi chuan mak a ti khawp mai. Mizo thalai te chu mi bright tak in ni sia ngatinge tiin min han zawt chu mahni mawng hlim nisi lo a thudik han hrilh chu a har khawp mai.

Article te ziak thin la, thawm han nei ta che min ti zui nghal a, harsatna I neih phawt chuan ka hming sawi la ka tanpui zel ang che tiin min thlah zui ta a, vannei ka in ti in ka thaw a veng huai mai ! Kan thalai hna rawn zawng a rawn chhuk thla thin te pawh beidawng in an rawn haw leh thin tih han hriat te hian Aw ka lo ti vawng vawng thin. Enge a chhan, a chhanna chu Quality kan neilo a ni, Quantity chuan kan tam khawp mai, mahse English nal tak leh mahni subject thiam tak leh nal tak a han sawi thei erawh kan tlem khawp thung.

Acedamic record eng ang a tha pawh nei ila saptawng ber a kan tawng that theih miau si loh chuan hna hnuh a har reng ani. A ziah a ziahah te chuan kan thiam lutuk mahse kan ti leh thin hi solve a ngai ani. Mizoram a College hrang hrang ah hian han kal ila, English a conversation nei thin hmuh tur an awm manglo tih theih ani. Vai ho kan tluk loh na chhan pawh an ni chuan an mahni leh an mahni a an awm ho pawn english in an inbe sup sup mai a, grammatically in an tawng dik bik pawh a ni lo, mahse a ngam hian an ngam em em ringawt mai ani. Naupang te te te pawn saptawng in min bia min be thin !

Nu leh Pa te mawhphurhna hi sawi hmaih chi a ni lo bawk. In fa te chu a tuina lam lam ah tuipui ve ula, an tuiloh na ah pawn tirh luih tur an nilo , chutilo zawmg a sawhkhawk hi a na duh teh a nia. School an luh tirh phat atang in a subject tuina hriat tum u la, an hmalam hun tur lo duan felsak thin teh u, hetia in tih phawt chuan e mi puitling tak ah In chhuah ngei ngei ang tih ka hrilh ngam a che u. Chuan zirlai naupang te u, in hma lam hun hi a bright tak zet a ni tih hria in taima tak in lehkha lo zir thin tawh ang che u. Tum fel tak nei in India ram a State hrang hrang ah te hian kal darh in ram I la ang u ti hi ka duhthu ka sam a ni e.

Similar Posts:

• Ever feel “I don’t belong here”?
• Thalai ten tan kan lak a ngai
• Mizoram Pawn – Ka thil huat te
• Tlawmngaihna
• buannel.com kum 5 a lo ni ve ta!

Recent Posts:

• mi(sual).com hi!
• KA MITTUI A TLA!
• ȚAHNA NUNHLUI
• March 2017, Mizo(ram) Diary
• NUN THÂMRAL

This entry was posted on Wednesday, February 28th, 2007 at 4:03 pm and is filed under More than words. You can follow any responses to this entry through the RSS 2.0 feed. You can leave a response, or trackback from your own site.