(Kha le…..a sei deuh avangin ka then ta mai. Tumah nuih awih loh, lungchhe tak chunga chhiar tur a ni – Hrangkekuala)Â Â
Tlin vang leh duh reng vang pawh ni lovin, a tulnain min ur thluk tak avang zawkin kan han invawm hrang ve thawr mai kha a nia. A luhaithlak a, a lungchhiatthlak a, a hlimawm em em bawk.
  Chhungte’n In lama kawl atana an duh loh apiang kha min han theh chhuahsak ve a. A tha lo leh duhthusam lo lai sawi ngam dinhmunah ding tawh hek lo; an rawn theh chhuah apiang chu tha ber pawma lo pawm a ngai si. Thian thenkhatte’n kan hma ngaia ‘hei em em hi chu a…’ an lo tih ve dek dek pawhin, ‘an inhmeh tawk chiah’ tih chu chhanna kan hriat chhun a nih avangin tihngaihna a awm lo va, inhmeh inti bik lo chung chungin lungawi anga lan a ngai a, chhungte chu kan biaktlawn zawk a la ngai fo.
  Chutah Israel saltang chhuak ang luk lukin kan han thawk chhuak ve a, thian tha zualte’n min kenpui liam liam chuan kan bungraw neih zawng zawng chu a zo der a. Ken chakawm lo tak tak, ken loh hleihtheih bik si loh te chu chhungte’n kan kutah an hmehbel chawt chawt a. Chhuah pahin bungbel mawihnai ve deuh chhuara la inremte chu mit sirin kan en ru dek dek a, mahse, ‘hei hi keng leh rawh u’ an tih chin bak chu eng mah kan sawi ngam tawh lo.
  An mipa neih chhun pahnihin chaw bel kan zen hrang ve dawn a ni a, inleng nula te pawh kan nei ve duh ang tih te min ngaihtuah pui a, a mawihnai ve deuh te pawh min dappui ve awm hi an nih tehlul nen, kan inhmeh tawk thilte chu buh seng ram riahnaah pawh kan hman duh mang tawh lohte a ni hlawm a. Kan bungbel neih zawng zawng chu cement bag pahnihah a leng vek a, kan bungraw dang pawh thil ropui pakhat mah a awm lo. Kan mutbu, Lersia kumchhir sial tia awrh tur chu kan thil neih ropui deuh ber chu a ni mai.
  Mi khaw kawng ang te ni se fai vir vera thleng ve thei mai tur hi, Sialsuk kawng a nih miau avangin chalsam paw thurin Zawlkhawpui kan han lawi lut ve a. Kan bungraw kente chu keimahni nen inhmeh tawk chiah mah ila Aizawl khawpui ropui tak nen chuan a inhmeh thei tawh ngang lo. Chutah, kan In luah tur chu kan han thleng a, tum thlak khuk luih paha ‘hei hi a nia’ an tih chuan a la phurawm ve viau a, bungrua kan han dah luh dawn tak tak chuan kawmkarah kan lut a, hnuai lam kan pan ngat ngat a, kan kawi nghet a, vawi khat kan kawi leh nghet a, kan thleng ve mai.
  Kawngkhar kalhna ‘Tala’, maimawm ril leh bawlhhlawh dangin a lo zam hnan nuaih tawh chu kan han tuai fai nawk nawk a, chabi chu kan han thun ve mai a, mahse, a herh theih loh. “Buai hnuin kan la hawng leh ta reng reng lo,” ti sela mak ka ti hauh lo vang. Chabi-a hawn chi ziazang a nih tak lohvah chuan leirawhchan-in kan hawng a, nia, kan han hawng ve ta huau mai a, luah atana min lo va hmuh chuahsaktute kha an huatawm rum rum thei! Ngai kawi duh tan chuan inhmuhsitna lam rawng te pawh a kai thei hial ta ve ang. Mahse, kan thu chah ang chiahin ‘a man tlawm thei ang ber’ chu an rawn hmu fu khawp mai.
Thirbel lian
A theih ang angin kan han tifai ve a, sarep silfai tum nen a inang reng. Kan bungbelte chu kan han rem chhuak a, thleng pali, inang lo thiau kan tana an lo dahte chu khawia mi nge an lo hai chhuah kan hre tawh bik lo va, thirbel rit mangkheng, dum tle hluau mai, vawk sum nga phel kanna tham zet khawpa lian te chu eng chawhmeh kan nana min kentir tehreng nge kan hre tawh hek lo. Kan rem chhuak ve mawp mawp a, thirbel tih loh thil dang chu a dahna tur hrim hrima siam ni awm tak takah chuan kan rem zo ve mai bawk a.
Kan thirbel lianpui mai chu chhuat lai takah chuan kan han dah ngawt a, a hnawk viau mai a. Khum hnuaia thawlh kan rilruk ta a. Thirbel ching fel turin khum atanga tan a ngai ta ani.
Thil lungchhiatthlak hmasa ta ber chu ka khum kha a ni. Kan khua atanga ka ken phei hma te kha chuan nuam ti takin mut nan ka lo hmang ve tawh thin a, a chik tak tuarh tuarh leh a awn tak lui lui pawh ka hre ngai lo. Aizawl kan thleng ta cheng a, ka han vuah khawm leh a, a lungawi thei ta reng reng lo mai a. A chungah han chuang ila a ding nghet duh lo va, a ngawi duh hek lo. Thenawmte tuboh leh perek hmangin ka’n suasam ngial a, a la vuihmui deuh tur mai a, nger lam a neih chhur lah a sim duh hek lo.
  Naurual zanriah chhum hun vel atanga ka buaipui chu unau hmel haiah ka zo thei hram a, a zahngaihna tawp lantirin ke panga nei chungin a ding nghet duh ve chauh va. Ke panga a’n neih meuh chuan a lungawi ve ta a niang chu, a chunga ka bingbileh tap tap pawhin a chim duh tawh lo. A thawm erawh duh aiin a la tha hret a, zan rehah phei chuan thak hiah ngam pawh a ni lo.
