mi(sual).com

pic source : icons.com

May 27, 1967 khan Pitt Street, Gateshead khua ah England football ti hmuhnawmtu leh ti hlimawm em emtu tur Paul John Gascoigne, Gazza tia khawvelin a hriat chu a lo piang a. A naupan tet atangin midanglam, harh leh chimawm em em mai, Tyneside naupang diktak Geordie nun hmang chho in Dunston ah a lo sei lian a. A naupan lai atangin fiamthu duh sang tak leh mi chimawm tak niin football chu a tuina ber a ni thin a. Thla 9 mi a nih in football chu a kein a lo pet der tawh a, Kum 8 a nih chuan football mumal tak chu an school Brighton Avenue ah a lo khel tan a, hetah pawh hian a naupang ber a ni nghe nghe.

Tumkhat chu a school kal laiin an zirtirtu chuan football chu chance a tlem zia leh mi 1000 zinga 1 chauhin hlawhtlinna an chang thin tih a sawi chu Gascoigne chuan an zirtirtu hnenah chuan “chu mi 1 chu keimah ka ni dawn” tiin a lo sawi tawh a ni. George Best chu a mi ngaihsan ber a ni a. Redheugh Boys Under 14 team-a a khelh lai atangin England rama football scout chuan he naupang thiam zia hi an lo hmelhriat tawh a, Redheugh Boys-a a khelh lai atang hian a hming lem Gazza tih hi a lo piang a, chutah a hming pakhat ah ‘Mischief’ tiin an lo sawi thin bawk. Gascoigne hi naupang football thiam, hmalam hun nei eng tak a ni a kum 14 vel a nih laiin Ipswich Town, Middlesbrough leh Southampton ah te chuan trial a nei a mahse, he club pathumte hian an lo hnawl a ni.

NEWCASTLE UNITED
A kum 16 piancham chiah, May 27, 1983 chiahin Gascoigne chuan an khaw club lian tak Newcastle United chu a zawm ta a, heta tang hian football-a a zinkawng diktak chu a lo tan chho ta a ni. Newcastle tana a game hmasaber chu 1985 khan substitute-in, Queens Park Ranger nen St James’ Park a an in hmachhawn tumin a khel a, tichuan 1985 – 1988 inkar khan Newcastle tan hian vawi 99 ngawt mai League leh Cup ah lo khel a, goal pawh 25 a lo thun tawh a ni. Gascoigne hian Newcastle a zawm tan tirh lai vel chuan a la naupang bawk a niang, Kevin Keegan a ball boot hrufai tuber niin, ani pawh chuan chu chu a chhuang teh chek a niang chu, Keegan boot chu inah te a hawn thin a ni.

TOTTENHAM HOTSPURS
July ni 18 1988 khan Terry Venables, khatih hunlaia Tottenham Hotspur manager chuan Gazza chu Newcastle atangin 2 million pound in a lei chhuak a, september 3, 1988 khan Tottenham tana a game hmasa ber chu a club hlui Newcastle an tum tumin a khel a, hetah hian 2 – 2 in an draw nghe nghe. Tottenham-ah hian England player ropui Gary Lineker nen an khel chho a, 1988 khan ram tana khel tura koh a ni a, tichuan England tana a game khelh hmasaber chu Wembley ah 14th September khan substitute niin hun tawp dawn lam minute 5 chu a han khel ve zawk a, hetah hian Denmark an hmachhawn a ni. Kum 14 anih laia Ipswich Town-a a trial laia lo hnawltu Bobby Robson ngei mai chuan Gazza chu ram tana khel turin a la ta a, April 26 1989 khan England tana a goal hmasaber chu Wembley hmunah Albania 5 – 0 an hneh tumin a thun ve ta a. Gazza chuan England-a rawlthar football thiam a nih zia a lantir tan ta, hetih hun laia England coach Bobby Robson pawhin he rawlthar hi a duhin tha a ti hle a ni.

WORLD CUP 1990
1990 World Cup Italy a neih tum khan Gazza chu England midfielder rinrawl ber ah a lo in chher hman der tawh a, Italia 90 ah hian Gazza chu che ropuiin England chu semi final an thleng hial a ni. Semi final a German an hmachhawn tum hian Gazza chu game dang zawng aiin a che ropui a. West Germany captain Lothar Mattheus hial pawhin khawvela all round mid fielder ropuiber a ti hial a ni. He semi final ah hian Gazza chuan German player Thomas Berthold alaka a foul avangin Yellow card pek a ni a, England hian final lo lut pawh nise Gazza hi khel theilo tura hrem a ni ta a, hemi tuma Gascoigne a mittui tla chuan England ram a sawinghing a ni ringawt mai, a tap lai thlalak pawh England ramah chuan man to taka hralh a ni nghe nghe a. World Cup a zawh meuh chuan Gazza chuan khawvel hriat a hlawhin chanchinbu mite um ber a lo ni ta hial mai. Mize maksak tak mai a naupan laia atanga a lo neih tawh chu Gazza hian a sim thei ngang lo a ni ang, game khelh hma a hnam hla an sak lai te hian camera hma-ah lei te a lo chhuah khum vei rawl nen,chu chuan Italia 90 laia cameraman te lawm a hlawh hle a ni. England team an training lai pawhin tumkhat chu Gazza hian a team mate Paul Ince a chu a inrin loh hlanin a va veh thun thun a, a kekawr a pawhthlak sak ta thut mai a, helai thlalak pawh hi England chanchinbu ah chuan a lang nasa hle a ni.

FA CUP
1990 World Cup zawh hnu chuan BBC Sports Personality of the Year atana thlan a ni a, bungraw fakna lamah Gazza chu company hrang hrang te’n an hmang nasa hle bawk. Football chauh hi a thiam a ni bik lo a, an khaw lamah zaiin album te pawh a lo siam ve hial a, heta a hla ‘Geordie boy’ tih leh ‘Fog On The Tyne’ tih te phei chuan UK a top 3 nihna te an lo hauh ve hial bawk a ni. Chutah season thar an han tan leh meuh chuan Gazza chu a club khelhna Tottenham ah chuan mite mit a la hle a, 1991 FA Cup semi final a Arsenal lama a free kick pet chu a ropuiin a mawi hle a ni, yard 30 atanga hlaah a pet chu Arsenal keeper David Seaman chuan a lo dang zo lo a ni ber mai. FA Cup final ah Nottingham Forest an hmachhawn chu Paul Gascoigne a football zin kawnga lungbang lo inhungna hmun a lo ni ta a. Forest player Gary Charles a va kalh chu a keruk tiauh in Gazza chu hospital ah dahluh a ni a, football pawh hun rei tak chu a khel theilo a ni. Kum 1 leh thla 4 lai a inhliam hnu a operation pawh vawi 3 lai a neih tawh hnu chuan vanduaina dang tawk lehin October 1991 khan a ke dinglam chu nightclub-a intih buaina ah a ti na leh a kum chanve lai mai enkawl nan hun a hmang leh a ni

LAZIO
May thla 1992 khan Italy lamah Lazio chuan 5.5 million pound chuan an lei chhuak ta a, Lazio tan hian a game hmasaber chu september 1992 khan Rome-a Genoa an khelh tumin a khel a ni. Kum 3 zet mai Italy lama a awm laiin Lazio tan hian rin angin a che thei lova a club tan hian game 47 khel hmanin goal 6 chauh a thun a, mahse Gazza pianpui mize maksak tak mai chuan chanchibumite ngaihven a hlawh zel tho a, Italy a awm lai hian chanchin tha lam leh chhelam engemawzah a nei hman a ni.

1994 World Cup USA a awm tur inpuahchah na kal mekah chuan Graham Taylor chu England coach niin a squad atan 90 kuma an player thate Lineker, Waddle te a telh lo a, Paul Gascoigne pawh nightclub a zaithiam Rod Stewart nena zu an lo va in avangin coach chuan squad atangin a paih ta a ni. England mipuite lawm em em Gazza chu world cup qualifying squad atanga paih an ni mai chu hriatthiam harsa an ti hle a ni. Chutah England chu an player rinrawlte awmlo ta chu 1994 USA ah World Cup chu an khel ve pha thalo a nih kha. June 3 1995 khan thla 15 ngawt mai ram tana a khelh theih loh hnuin Gazza chuan ram tana a game hmasaber chu substitution bench atangin Japan nena an khelh tumin a rawn khel cho leh ta bawk.

GLASGOW RANGERS
Glasgow, Scotland lamah chho in Walter Smith a hnuai Glasgow Rangers ah chuan June 1995 khan a in ziak lut a, Scotland lamah hi chuan Gazza hian a football thiamzia a rawn lantir leh tan a, Scottish title an lak tum May 1996 a Aberdeen an hneh tuma Hattrick a siam phei kha chu Rangers tan chuan hun hriatreng tlak niin, Gazza chu Scottish Player Of the season atan thlan a ni nghe nghe bawk.June 1996 khan Gazza chuan England tan Euro 96 ah a khel leh a, Scotland lama a goal thun zet mai chu amah Gazza diktak zia a lo lang chhuak leh ta a. Euro 96 ah England in Swiss an khelh tumin first 11 a luhtir a ni a, 1st half chhung hi chuan Gazza hian game a control hneh hle a, England game chu a thuhnuaiah a dah hneh hle a, second half erawh chuan a chauh deuh avangin khatih laia coach Terry Venables khan a lachhuak ta a ni. 1997 khan dam kawr takin Rangers lamah England atang chuan a chho leh a, hemi tum hian Rangers chu league title a zawna vawi 9 a han lakpui leh ta a, july thla in a club ah hian contract thar kum 3 atan a ziah belh a, mahse Celtic nena an khelh tumin a chet mawiloh em avangin hnawhchhuah a ni a, 1998 march thla khan Rangers chuan Gazza chu Crystal Palace lamah 3 million pound a hralh chhuah an tum ta hial a ni.
1998 World Cup France ah neih turah England coach Glenn Hoddle chuan Gazza chu squad ah a telh leh a, mahse Zu lama a tlan nasat deuh avang leh nightclub lamah te a hmingchhe zawnga a lo chet avangin Glenn Hoddle an a hriat chuan a thinrim em em a, England World Cup Squad tur tak tak final announcement a siam dawn zana hotel a rui em em mai a Gazza an hmu chu a ngaihdan ni tawh lovin squad ah chuan a telh ve duh ta lo a ni. Hemi hnu atang phei chuan Paul Gascoigne hian England tana a game khelh hi hmuh tur a awm tawh lo a ni. Chutia England tana World Cup a khelh theih tak dawnloh ah chuan Gazza chu inlamah hawin a nupui hlui Sheryl nen chuan hmun pakhat a chanchinbu mite tlansanin an awm bo ta daih a, England mipui te pawh an thinrim hle a ni.

MIDDLESBROUGH
Rangers lamin hralh chhuah an tum takah chuan Gazza chuan Crystal Palace lam ai chuan a thianpa Bryan Robson enkawl Middlesbrough lam chu a thlang ta zawk a, tichuan 1998 khan Premier League khel turin Middlesbrough ah a lut ta. Paul Gascoigne hi zu in a tihbuai thin avangin a game pawn hma a sawn tha meuh tawh lo a, Middlesbrough ah hian rin angin a che lo a, football hmuhnawm tak amah atang hmuh tur a awm ta mang lo a ni,Zu lamah a buai tual tual Middlesbrough lamah pawh harsatna a nei leh tan bawk aniang, duh angin Everton tan a khelh that theih tak loh avangin Bryan Robson chuan free transfer in a chhuah leh ta a ni.

EVERTON
Bryan Robson chuan Gazza chu free transfer in a Rangers lama a pu hlui Walter Smith a enkawl Everton ah a chhuah a, July 17 2000 khan Everton lamah a lut ta a, mahse zu in a taksa leh rilru a tihbuai em tawh avangin Gaz tunhma Gascoigne Magic kha a nei tawh mang lova, Everton coach Rangers atang tawha a lo hrawn Walter Smith chuan Gazza chu insiam tha turin a fuih nasa hle a, game pangai khel leh tur chuan tan nasa taka a lak a tul thu thlengin a hrilh thin a, chutia Everton tana tan an lak leh lai tak chuan Aston Villa nena an inkhelh tumin a free kick pet tur chu a ke a tin leh tlat mai a, season tawp thlengin a khel thei ta lova ni, zaipui tawkin a awm leh ta a, hei hian a football-a a zinkawng chu a ti thuanawp hle a ni. Hetih lai vel hian chanchinbu thenkhat chuan Gazza chu Football a chawlhsan tawh dawn ti ten an lo ziak hman hial a, mahse Gazza chuan tumruh takin Walter Smith thurawnin June 4th 2001 khan Zu nghei na tur leh inenkawl that na turin Re-Hab lama awmin hun a hmang a ni 28 chhung rehabilitation hmunah hian a awm a ni. Tha thawkhata a inngaih hnuin Gazza chu lo chhuakin 2001/02 season tir khan a rawn inlan leh tan a, mahse vanduaithlak tak maiin West Ham United nena an khelh tumin Frederic Kanoute nena an inchilh chu a inhliam phah leh ta a, mahse hemi hnu lawk hian a khel leh thei mai a, Hetia tha thara an beih leh takah hian football supporters leh everton fans te chuan Gazza chu tunhma Gazza kha lo kir leh tiin an rinna pawh amah ah hian an nghat sang hle a, 2001 tawp lam phei kha chuan Bolton Wanderers nena an khelh tumin goal te a rawn thun leh nghe nghe a ni.

December 2001 khan Paul Gascoigne chu a pian leh murna lamah kalin a naupan laia alo tel ve na thin Gateshead Club tlachhe tak mai, intuaithar leh nan 10,000 pounds a han pe a Gazza chuan “He club tan hian ka theihna zawng hlan ka duh a ni, Gateshead khawchhuak ka ni a, ka naupan laiin he club tan hian vawi tamtak ka lo khel ve tawh a ni’ tiin a sawi nghe nghe Gateshead chairman Johna Gibson chuan Gazza thiltih chu ropui tiin an mipui tin maiin an ngaihsan zia te a lo sawi bawk a ni.

BURNLEY
2002 kum tir lam khan Everton first team ah te a tel leh zak zak hnuin March 16 2002 khan Gazza chuan First Division Burnley chu a zawm leh a mahse hetah hian a awm rei lo hle a,Burnley tan hian game 4 chauh a khel hman a ni. Premier League club engemaw zat in an la duh laia division hniam lama awm chu Gazza hian a duh bik lo a ni.

Everton lamah buaina neuh neuh a neih avangin Dubai leh USA lamah sawmna a lo hmu ve bawk nen July 2002 khan Gazza chu USA a Washington ah DC United lamah MLS khelh tumin a chhuk a mahse hetah hian buaina neuh neuh avang leh harsatna thenkhat avangin a awm thei ta lova, 2002 nipui lai khan chanchinbu lam chuan Gazza chu Scotland lamah Dundee FC a zawm dawn ti tein an lo ziak a, thenkhatin Australia ah Auckland Kingz lama kal a tum ti ten thu a nei nual a, mahse Gazza chuan third division Exeter City lama manager lama luh a tum deuh a, tichuan October ni 10 khan he club official te nena inhmuh tura tih chu Gazza chuan a tui leh thut a, Exeter City club co-chairman Uri Geller chuan lakluh a duh hle naa, thudang a neih leh tak avangin an beidawng ta a ni. Hetih hunlai vel hian Gazza hian club awmna a neih loh avangin december 2002 khan Gillingham chuan an sawm leh ta a mahse hei pawh an hlawhchham leh ta bawk.

GANSU TIANMA
Hetia club awmna mumal tak a neihloh hnuin Paul Gascoigne chuan Chinese B-league ami Gansu Tianma chu January 2003 khan kum khat atan contract a ziah pui ta a, he club ah hian player coach angin a awm a, China ramah hian a tlangnel ve ta tihin a game hmasaber ah goal turu lutuk mai Gazza hian a thun nghal a, a game thumna ah pawh mawitak maiin goal a thun leh bawk. SARS nata hri avangin China ah chuan Football mumal takin khelh ani ta lo a, Gazza pawh chuan China chu chhuahsanin America clinic lamah inenkawl turin a kal ta daih mai a, heta tang hian Gazza hian China lamah kir chu tum leh tawh chuang lovin, UK lamah a haw leh ta daih mai a, Gansu chuan hlawh an pek thatloh chu a kirleh duhloh chhuanlam ber a ni. Gansu Tianma lam hian Gazza chu koh let an tum nasa in first team coach ah dah tur ten an thlem a, mahse an thlemtlu zo ta lo a ni.

Gazza chu China ramah a kir duh tawhlo a England rama a awm tlat hnu chuan UAE rama Al Jazira club lam chu zawm a tum rilru deuh a, a nupui hlui Sheryl nena an awm dun leh theih dawn avang leh naupangte seilen na atana UAE chu a it em avangin Gazza hian a phur ve hle a ni. Hetia UAE lama kal a tum mek laihian Gazza chu Premier League lamah sawmtu a hmu leh a, khatih hunlaia premier league kaithar Wolverhamption Wanderers (Wolves) chuan a sawm a, Gazza pawh chuan chu chu a duh leh ta zawk a, tichuan hun engemaw chen Wolves ah hian awmin mahse game puitling a khello thung. Chanchinbu lamin Gazza leh Wolves inkara buaina awm ang tein an ziak a mahse amah Gazza ngeiin Wolves ah hian a taksa in lak fitnana lut a nih thu a lo sawi thung.

BOSTON UNITED
Paul Gascoigne chuan sawmtu a la hmu zel a, Sheffield Wednesday, Oldham Athletic leh Plymouth Argyle lamah te thawm nek nek a awm laiin April 2004 khan England Footballer te zinga all-round-midfielder tha bera ngaih Paul Gascoigne chuan football chawlhsan chu a tum ta, hetia Gazza a football zinkawng chu a tawp dawn ta emaw an tih laiin Welsh premier league lama Rhyl ho chuan an club zawm turin an rawn sawm bawk a, USA lama Boston United chuan Steve Evans a hnuaiah player/ coach turin an rawn sawm leh bawk a, Gazza hian hetih hun lai vel hian lehkhabu ama chanchin ‘My Story’ tih a ziahnabu a buatsaih chu a la peihloh avangin a rilru a buai hle a, a lehkhabu ziah hi a zawhfel hma chu Boston lama sign pawh hi a la sawilawk thei lo a ni. July 30 2004 khan Gazza chuan player/coach ni turin a in ziak lut ta a, mahse Boston tan game 11 chauh a khel hman a, thla thum awrh a awm hman tihin October 5 khan Gazza chuan player/coach a nihna chu a bansan leh ta a ni.

KETTERING TOWN
October 2005 khan Paul Gascoigne kum 38 a upa chuan Non league club Kettering Town chu manager turin a zawm ta a, Kettering Town hi 1872 kum atanga din niin league game puitling pawh kum 133 ngawt mai an lo khel tawhlo a, hei vang hian Gazza hian a club thar hi tan a lak nasat pui.hle a ni.

May 27, 1967 a lo piang Paul John Gascoigne hi naupang tet atanga Football tui tak leh atchilh tak niin England ram football chu rawn khawih danglamin a naupan laia a mize diktak, mi harh, fiamthuduh leh mi chimawm tak mizia chu football ground ah pawh chhawm lut zelin he a vanglai leh a lar lai pawh hian maksak tak tak leh ropui tak taka chetna a nei ngah em em mai a, hei hian England mipui te mai bakah khawvel lawm hial a lo hlawh a ni. Zu leh ruihtheih thilin a tihbuai laia football pawh a khelh theih loh lai pawhin a chanchin chuan football tui mite leh amah ngaisangtute chu a la chiah hneh hle a ni.

GAZZA CHET MAKNA TE LEH THIL DANGTE

* A ke zai laiin Nurse pakhatin eng ram mi nge a nih tih a zawh chu Gazza chuan Church of England tiin a chhang daih thung

* Gazza hian Middlesgrough-a an training laiin an Team Bus chu a lo va tichhia a, sum engemaw zah a siamthat nan an chawi tir nghe nghe a ni.

* Tukkhat chu England Training ground ah a mawza velah chhuat nawhna kai nuaiin a va kal a, an coach Bobby Robson chuan ‘daft as a brush’ tiin a lo ko a, heta tang hian daft as a brush tiin an ko thin tawh a ni.

* Lazio lama a awm tirhin TV lam in interview neipui tumin an va bia a, Gazza chuan mike bulah a lo irh khum avangin pound 9000 a chawi a ni.

* Middlesbrough canteen ah ruakin (mawza chiah bunin) lunch a lo va order pek a nih chu.

* Scotland ramah doccumentary team a hruai tumin hmun pakhata in nuam deuh mai chu Gazza hian ama in angin a lo sawi a, a chahbi a theihnghilh der vel anih chu

* Rangers a Hibs nena an inkhelh tumin refree chuan Gazza hi yellow card pek a tum a, card a thlauh palh chu Gazza hian lo chhar vatin Refree chu Yellow card alo pek khalh daih a, Yellow card chu a hmu chiang khawp mai.

* Training ground ah a England teammate Paul Ince a kekawr chu a inrinloh hlanin hnung lam atangin a pawhthlak sak thut mai a, Ince a mawngtam chu a tuk newspaper ah a lang tam khawp asin.

* Italia 90 lai khan TV lamah an lineup film ah mahni hming sawi vek turah chuan Gazza chuan hmuiphun ringawtin F***ing W***ker a lo ti a, heihi tournament chhung zawng khan an hmang nghe nghe a ni.

* London a Piccadilly Circus hmuna khualzin phur bus chhawng neia a chuan laiin a zuang thla a, a driver hnenah chuan khalh a dil a, driver chuan an khalh tir chhin chu a chuang ve te chuan an rap hle a ni

* Refree in free kick a ham ruala a ban phar lai tak mai chuan Gazza hian refree zak chu a lo hnim sak vel a, mipui lawm a hlawh hle a ni

* Gazza zan mutheilo chuan tumkhat chu a thian Ally McCoist chu zan laia va kaithovin Snooker khelh pui atan a va sawm a, a thianpa mutuilai chu a va tiharh vek a ni

* Rangers-a a teammate Richard Gough a muthluk lai chuan Gazza hian a alu chung taka maiah chuan a va zung khum a nih chu!!, fiamthu nge a hmusit vang ni ang?

* Brian Tinnion Newcastle teammate nena inkhelh zawh zan lama pub a an kal apiangin Gazza te hian buaina an tawk ziah a chu buaina chu Gazza chawhchhuah ziah a ni.

* White Hart Lane a game a khelh dawn tumin, game tan hma a warmup laiin a jersy chu fans te hnenah a lo pe daih a, game an han tan dawn meuh chuan Gazza jersy tur zawngin an buaikhawp mai.

* Robot tawngthei pound 1000 man a lei a chu robot chu a thianpa Jimmy Five Bellies room ah kaltirin “Make a cup of tea, fat man.” tiin a robot chu a lut tir thin a ni.

* A thian Jimmy Five Bellies room a hair gel chu Gazza hian Hair Removing Gel in a lo thlaksak a ni

* Italy 90 laia an National Anthem sak laiin Gazza chuan cameraman te chu lei te a lo chhuah kum vel a, cameraman ten an lawm hle a ni

* October 2004 khan Paul Gascoigne hian a hming Gazza tih chu G8 in thlak a lo tum a ni.

* Rome ah reporter ten an lo lawmlaiin ding meuhin Gazza chuan bengchheng lo turin a ti a, an ngawih thap lai chuan a vawih vel mawle

Years Club Appearances Goals
1984-1988 Newcastle United 95 25
1988-1992 Tottenham Hotspur 111 33
1992-1995 Lazio 41 6
1995-1998 Rangers 92 39
1998-2000 Middlesbrough 44 4
2000-2002 Everton 24 1
2002 Burnley 4 0
2003 Gansu Tianma 4 2
2004-2005 Boston United 11 0
2005 Kettering Town

Similar Posts:

• History of football
• World Cup : Semi Final 2 – Spain Vs Germany (Spanish ral an lian dawn e..)
• Euro Group Stage Khelh Hnuhnung ber
• Manchester Premier Cup 2008 ah Mizoram che tha zel
• World Cup 2010 Update

Recent Posts:

• mi(sual).com hi!
• KA MITTUI A TLA!
• ȚAHNA NUNHLUI
• March 2017, Mizo(ram) Diary
• NUN THÂMRAL

This entry was posted on Wednesday, May 30th, 2007 at 4:39 pm and is filed under More than words, Sports & Games. You can follow any responses to this entry through the RSS 2.0 feed. You can leave a response, or trackback from your own site.