Tunlai kan ram dinhmunin a tawn mek thu hlaah Thalaite`n ram hmangaihna awki atanga au chhuak thawm ri hriat tur a tam tual tual a, chutih laiin thalaite au thawm hre phak vuau vuaua lo khak tawh lah bo lo! Chungho hnena ka sawi duh chu heihi a ni — Thalaite hi kan hawkdak satliah vang ringawtin ram hmangaih thu hla kan au chhuahpui a ni sathliah tawh lova, tuna kan politiciante kan duhkhawp tawh loh zia anga kan mawhphurhna a nih hrim hrim vangin au chhuak kan ni zawk e.
Zorama Thalaite hian kan mitte mengin thil awmdan chu kan thlir ve tan tawh a. Tuna kan Politician-te chu hmanlai tihdan, an thinlunga a nghehzia leh thil thlirdan hluiin zung a kaih thuk em em tawh a. Hun rei tawh tak atanga ‘eirukna’ hi tihdan phung ve renga ngaihna hian an rilru leh ngaihtuahna zawng zawng hi a bawhbet hneh tawh em em a. Chu chuan a ni zinloh ‘Bill’ lakte thlengin sual ni a hriatlohna a rawn tihpunlun zual sauhvin, politics leh thildanga hlawk nan rilruah ‘sual’ duhna a rawn pian tir a. Chu chuan mi rethei tak tak, nitin eichawp tur zawng tak meuh meuh hote hi mahnia an din theihna tur leh an chanai zawng zawng turte kha a bo ta thin a. Pawisak a hnekin mi rethei zawkte chu hnuaichhiahnain a rawn umzui vat a. Hetiang dinhmun kan thlen tawh chinah chuan tuna thalai, nakina ram hruaitu tur, ram leh hnam tana rorelna fawng chelhtu turte tan chuan en liam mai mai ngam a ni ta lo.
Tuna ram hmangaihtu nia inchhal kan Politician-te hi tun dinhmunah chuan hmasawnna rualkhai tak a awm theihnan chawhrual dan zawn ai mahin anmahni vua leh vang, an chhungkhat laina hnaite chungah chauh thil engkim thlentir a, awmtir an tum ni berin a lang a. Hetiang zawng zawng hi ram kaihhruaina tha leh dik, ram leh hnam nilova inthlan dawna Party manifesto leh hnathawhte a tling tawk lo tihna a ni mai em? Tluantling taka engmah ngaihtuah si lova. Mahni ngaihtuahna lam atang ringawtin kan politician-te hian hmalak an tum erawh hi chu thil atthlak tak a tling a, ram leh hnam hmangaihna atanga chhuak ngaihtuahna erawh an hlat hle thung. Dikna tarlan avangin thalaite hi zawldawh takin kan in kuangkuah rei ta lua e. Hei hian hlutna pawh a neilo tih pawh kan hriatchian a finthlak khawp ang.
Ram leh hnam aia Pawl bik hmakhua an ngaihna hian kan ram hi a la ti sawprawp nasa viau ang tih pawh hriatsa vek a ni. Tuna ram hmangaihtu inti a, kan rama sawrkarna fawng vuantute hian kan Zoram kalpui an ‘Tum’ dante en hi chuan mipuite tan chuan ‘Innghahna’ tham a tling takzet zet e. Mahse, inthlan a zawh a, an han tlin meuh hi chuan ‘Innghahna’ tling tak kha ‘Tum’ tih hmui phunah chiah hian an tlingtla mai thin zawng hi chu a pawi takzet a, kan ram siamthatu nih aiin Zoram tichhetu an ni tlat. Kan ram hruaitute hian an ngaihruatna, duhthusama tawp leh mai tur thil tam tak min sawi hmuh fo tawh thin a. Au hla tam tak, tisa chang silo kan lo hriat zin tawh lutuk avangte hian mipuite pawh hian awih tur leh awihloh tur pawh kan thliar hrang thei tawh meuh lo zawng anih hi!
Chutiang zawng zawng thai bo a, dikna leh rinawmna, huaisenna leh tumruhna dinchhan tlat turin…….’AW THALAI! I RAMIN A KO CHE’ a, a kohna chhang hi i chhang ve dawn em?
Similar Posts:
- Thalai ten tan kan lak a ngai
- Thalaite hian ram kan vei chiah emawni le?
- Chawmhlawm incheina sang
- Lal Thanhawla hi kan duh ber?
- Mizo vek kan ni:
July 18th, 2007 at 4:32 pm
Chhan dan tur min han kawhhmuh chhin ta ang la!
Report this comment
July 30th, 2007 at 2:29 pm
Thianpa CHa, ZORAM TODAY, ziak tha kher…. mai
Report this comment