Ramhlun Veng pitar thattu a tupa inpuang

July 18th, 2007 1:08 pm by PHISS

Ramhlun Vengthara cheng Pi Rokungi (70), July 10-a thattu chu nimin khan Police ten thu an zawt fiah a, a tupa (a fanu Lalthianghlimi fa) Lalhmachhuana (25) chuan a pi chu a thah ngei a nih thu a puang.

Pi Rokungi leh a tupa Lalhmachhuana hi mi In luahin an khawsa a, a tupa hian nitin inhlawhin a chawm thin a; a pi a thah ni hian buhfai leina’n Rs. 50/- a pe a, mahse a lo lei si lo va. A pi hnenah chuan zanriah an ei laiin, “Buhfai chu engatinge i lei loh, thenawm ta i puk thin a, a mualphothlak,” a ti a. A pi chuan BPL buhfai a lo thleng tep a lawm, tiin a chhang a. Chutia an inhnial thinrim chuan a pi chawei lai chu a man lawk a, khumah nawr pheiin a rek bet a, a khabe leh a biangah a seh bawk a, a thi ta mai niin police hnenah a inpuang.

Tualthattu Lalhmachhuana hi Manipur, Churachandpur atangin a nu hovin Kolasib-ah an pêm a, a pa pawh a hre lo nia thudawn a ni. A pi a thah tlai hian a hnathawk haw chuan ganja a zu niin a inpuang a. A pi thih zan pawh khan Bawngkawn Police ten thu zawhfiah atan an la a, thu an zawhfiah hnuah a pi ruang vuiliam turin an hawtir a. Police-te chuan Kolasib-a a khawsak dan leh a nunzia an chhui zui hnuah July 14 khan an man leh a, amah ngeiin a pi chu a thah thu a puang chiang ta a ni.

Source: vanglaini.org