Picture: yathin.livejournal.com
Kei thingtlang(tt) tv ve teh mai hian zawlkhawpui boruak hi ka thluakin a hriat thiam dan tawk lekin ka thlir ve thin a, a va MANGANTHLAK teh luh ve le! In mamawh loh thil tam takin a ti buai che u a, in nu leh pa te’n in(home) vil hman lo lekin hna tul thawh bakah khawtlang leh kohhran an buaipui san che u a. Thalai leh naupang lamin upa zawk in zah lova (bus-ah poh thutna ken nachang poh in hre toh lo), upa lam lahin thalai lam an hre thiam bok si lo che u a, communication gap lian tak in nei chu ani ber e!
Ram hruaitu ber poh hi keini tt lam unau te chuan kan hrethiam toh lo a chha chu ani e. A hman hman an nuar ringot mai si a, kuk harh deuh chu in ngai ani. Eng in ti zai zia nge hetiang teh nuai nuai a in han buai tak le? Tunge mawhphur? I kuk harh tlang teh ang u.
Thingtlang lam nunphung hi khawpui ho hian min entawn let toh mai ta che u? Kan mamoh hi a tam lo teh asin. MIP, BAFFACOS, NLUP etc etc an ron ti a, “E ani maw?!” kan lo ti mai a. A hming pum poh kan lam thiam loh leh lam fuh theih loh buaipui hi kan hunin a daih lo. Theihtawp chhuahin zing atanga tlai thim dawn thleng kan feh a, kan chaw fun kan han ei ho te chu NOKIA, SAMSUNG tih ang reng leh SANTRO, KARIZMA tih vel hi kan han ngai lo laileng khop asin. Kan lirthei neih ve chhun tawlailir te ah hian kan hlim tawk viau ani. Thawhrimna leh taimakna a poimoh tih hi kan changvon ani a. Kan hruaitute hian min pui lo poh nise chawnghei a awm hi kan tum bik reng reng hleinem. Mautam sawmsarih poh lo thleng se kut dawh hi zawng kan tum lo khop mai, riltama thih kan thlang zok ang.
Kan mamoh a tam loh tehreng nen hian kan intodelh lehzual theihna tura hma min lakpui hi in tum lo ni berin ka hria, nge in ngaihtuah peih lo zok??. In mobile leh lirthei neih leh neih loh hian in rilru a luah khat anih pohin kan dem lo che u. In buai leh lutuk hi in khawngaihthlak lehling zok. In tuh rah in seng mek anih hi. Keini tt lam ho tanpui in mamoh anih chuan soi hreh reng reng suh ang che u. KAN AWM ALAWM, RILTAMIN IN THI LUL LOVANG. (Rilru buai vanga harsatna in nei anih erawh chuan puih ngaihna kan hre lo che u!)
