Ni 15 August 2006 a Delhi Mizo khawtlang, kohhran leh zirlai (DMWA, DMI, DMZP, DMITP leh DMIHP) hruaitu kalkhawmin a rel angin Delhi khawpui leh a chhehvel a cheng Mizo te nunphung, khawsakdan tlangpui leh hmakhua
(a) Delhi Mizo khawtlangin Delhi hmuna Mizote awmdan tur ni a a beisei te
(b) Delhi Mizo khawtlangin awmdan kan duhloh te leh
(c) Mizo khawtlang duhloh zawnga che, ram leh hnam ti hmingchhe thei zawnga che leh nunphung pangngai piahlam a nung te a rel a. Khawtlang duhloh zawng a che te chunga khawtlang chet dan tur te DMWA in a duan- Delhi khawtlang Inkaihruaina, Delhi a Mizo cheng, hnathawk, zirlai leh zin veivak tupawhin kan zawm thlan ngei tura beisei chu a hnuai a mi ang hi a ni:
MIZOTE AWMDAN TUR
1) Ram leh hnam hmel tarlangtu kan nih avangin uluk leh fimkhur taka nun leh chet tur a ni a. Hnamdang kan dawr/ bia/ kawm anih pawhin hawihawm taka awm tur a ni.
2) Thawmhnaw incheina zahawm leh felfai tak in bel thin tur a ni.
3) Hnathawk ten kan hnaah rinawm leh taima takin thawk theuh ila. Hnam dang mite aia thawk tha zawk, taima zawk leh rinawm zawk nih tum tlat thin nise.
4) Zirlai ten kan zirlaiah taima taka theithawp chhuah a tan lak theuh nise. Hnamdang te aia titha zawk nih tum theuh ila, a theih chin chinah midangte kaihruaitu leh hmahruaitu nih tum tlat thin nise.
5) Zirlaite chu atheih chin chinah ‘Hostel’ a awm tum hram nise. Hostel dan fel taka zawm tum ngei ni bawk sela. Inluah emaw PG emaw kan la dawn anih chuan fimkhur takin inluahpui tur leh inluah tur thlan thin nise. Inluahturah In him tha, inneitu pawh mi rinawm leh fel tak zawn hram hram nise.
6) Mipa leh hmeichhia mawihnai tak leh zahawm taka inkawm tur a ni. Hnamdang (opposite sex) te nel dan tawk thiam a, tulna vanga kawm/ biak an ngai anih pawhin fimkhur taka kawm/ biak thin tur a ni ang. Mikhual pawhin kan mikhual chhungin Delhi leh a chhehvelah hnamdang laka mawi leh zahawm taka awm tur a ni.
7) Delhi leh a chhehvela Mizo awmthar reng reng chuan kan awmna veng chunga DMWA Information Secretary te hnenah kan address leh contact chingkuang tak pek luh vat tur a ni a. Kan awmna veng kan thlak anih pawhin kan awmna hlui leh thar a DMWA Information Secretary te hriattir ngei tur a ni ang.
8 ) Mizo khawtlang leh kohhran thiltihna-ah a theih chin chinah tel ngei tura beisei kan ni a, kan Mizopui tupawhin harsatna an tawka tanpui an mamawh anih chuan theihtawp chhuah a inpui tlang dial dial tur leh kan hnam ‘tlawmngaihna’ chawi nung theuh zel tura beisei kan ni.
DELHI MIZO KHAWTLANGIN AWMDAN KAN DUHLOH TE
1) Ram leh hnam tihmingchhe thei heng ruihbuai leh buaina siam te, mipat-hmeichhiat hman khawloh leh lepchiah taka nun te, rukruk – mibum leh dawt sawi te, khawtlang mit tikham zawnga awm hlek loh tur a ni.
2) Inluahpui tur chungchangah, a theih chin chinah hnamdang luahpui loh hram nise, mipa leh hmeichhia te chu unau pianpui ngei emaw thisen zawmpui hnai tak nih loh chuan inluah dun/ luah ho miah loh tur a ni.
3) Pianpui unau leh thisen zawmpui tak tak nihloh chuan mipa leh hmeichhia inkhata chen dun/ riah dun emaw chen ho/ riah ho emaw chin loh tawp tur a ni.
4) Zan rei tak tak thlenga inlenpawh emaw sahawk emaw chin loh tur a ni a. A bik takin hmeichhe – hostel, PG, inluah-ah zan rei tak tak thlenga len leh intlawhpawh chin miah loh tur a ni.
5) Hnam dang mithmuhah mipa leh hmeichhia inchul thuak thuak leh nuih thler vak vak emaw chin loh tawp tur a ni.
6) Lamna hmun, bar leh nawmsipbawlna-ah kal chin loh tur a ni a. Zan reia hmeichhia hnamdang kara tei rawlaih mai mai pawh chin loh tawp tur a ni.
7) Hnamdang lakah lepchiah tak leh pawlawh taka awm chin loh tawp tur a ni.
8 ) Thawmhnaw themhlem lutuk inbel leh uchuak taka inchei chin loh tur a ni a. A nilo zawnga mi mit la tur leh mipangngai incheina thin piah lama inchei chin loh tawp tur a ni.
Heng a chunga Delhi Mizo khawtlangin awmdan tur kan duhlo kan tarlan te anga awm kan zingah an awm lui anih chuan Delhi khawtlang hruaituten tumah a dim dawnlo a. Khawtlang duhloh zawnga awm leh ram leh hnam tihmingchhia leh nunphung pangngai piah lama nung te chu an chungah thununna lekkawh a ni ang a, an nu leh pa leh an lokalna hmuna khawtlang hruaitute hnen a an thilchin te hriattir bakah zilh leh thawnhaw kawngah a tul dan ang zela hmalak a ni ang.
He thuchah hi Mizo tupawh Delhi leh a chhehvel a khawsa, cheng, khualzin leh zirlaite tan a ni a. He thuchah zawm tur leh khawtlang duhloh zawnga khawsate dona kawnga theihtawp chhuah turin mitin kan inhriattirin kan inngen a ni e.
