AID FOR HUNGER
FEAT: Olter, Boomarang leh National Geographic Channel
Mizo rock band zinga India ram pum huapa thleng sang ber tih ngam khawpa India ram rock rimawi khawvela liluh thuk Boomarang chuan zanina AID FOR HUNGER Concert-ah hun an hmang ve thei dawn tih an ti chiang ve leh ta. He concert hi tuna Aizawla cham mek National Geographic Channel team-te chuan an document footage pakhat atan an hmang dawn bawk a, Mizorama concert awm tawh National Geographic Channel-in an chhim hmasak ber a ni dawn a ni.
Hetihlai hian he concert-a zai tur Mizo zaithiam chhuanvawr ho chuan thu leh hla an nei nual hlawm a, he concert atanga engmah beisei an neih loh thu leh an theihnate mi chanhai zawkte tana pek an inhuam thu an sawi chhuak.
“Mizoram hmun hrang hrangah mautam avangin kan Mizo puite’n harsatna an tawk mek tih chu tumah in hrilh nawn a ngai lo, heng kan unaute hian kan tanpuina an mamawh a, kan tanpuina an nghak a ni, vanapa hall chhungah thuthmun rem taka thu chungin zaithiam zai i en khan heng mi harsate hi i tanpui thei a ni tih hria la, i tih theih han ti ve teh,” tiin Vanlalmalsawmi (Mali), Youth Icon 2007 contestant, tunhnaia single ti chhuak thar hlim, a video pawh thlan hlawh em em chuan ngenna a siam a ni.
Hunrei tak Zoram rimawi khawvel chamchilh tawh B Malsawmtluangi chuan pawhin: “Kan tih theih tawk theuh kan tih a tul a, kan unau harsate hian kan tanpuina an mamawh takzet zet a ni, an tana i tih theih ti ve turin Mizo mipuite ka ngen tak meuh meuh a ni,” tiin a sawi.
“Mautam tam tuarte tan ke kan la pen chhuak ve lova, kan inthiam lo khawp mai, tunah remchang kan nei a, he hun hi tam tuarte tanpuina atana kan ke kan penchhuah ve na hun tha a ni tih hriain keini chuan kan theihtawp chhuah kan tum a, mipuite’n in theihtawp chhuah ve ula kan duh takzet a ni,” tiin Hard Ray bassist Mawitea chuan appeal a siam a ni.
Mami Varte pawhin he concert atan hian a hun pek a inhuam hle mai bakah midangte tana a aw thawh chu a tih turah a ngaih thu a sawi bawk a ni.
He concert chhimtu tur danglam tak National Geographic Channel-a an team hruaitu pakhat Jeremy chuan: mahni chauh inngaihtuah lova, in artiste te’n hetianga mi harsate tanpui an inhuam hi a ropui ka ti a, sum engmah beisei hauh lova an inlan tur hi a mak ka ti zawk a ni, hnam inhmangaih tawn tak in ni tih ka hre ve nghal e,” tiin a sawi a ni.
National Geographic Channel hian mautam chungchang documentary siam turin tunah hian Aizawl an chamchilh mek a, Mizoram khawthlang lam Mamit leh a chhehvelah shooting neih an tum mek a, National Geographic Channel team hian Mautam documentary siam tur liau liauvin United States atangin Mizoram an rawn pan a ni.
Thawkkhat laia Aizawla a chanchin kan ngaihven em em mai, phai lama hnathawka awm Andy chuan he hun hi a rawn hmang ve thei dawn a, band hming danglam angreng tak Olter tih kha a rawn ti lar hman hle a, mahse zirna leh hnathawhna lam thil avangin phai lama a chhuk leh a, hla hlui thiam zeta a sak thinte kha AID FOR HUNGER Concert-ah hian a thlawh chhuak leh dawn a ni.
“Kan footage atan a pawimawh dawn hlein kan hria a, he concert hi kan camera-ah ngei kan capture ve duh a ni,” tiin National Geographic Channel team hotute hian an sawi a ni.
AID FOR HUNGER Concert hi Active Sound leh Lunglen thlakip chhuak chanchinbu te huaihawt a ni a, zanin dar 7 ah tan a ni ang a, ticket man Rs. 50 leh Rs. 100 a ni. He concert-ah hian Magdalene, Hard Ray, Boomarang, Mami Varte, Michael M Sailo, B Malsawmtluangi, Remkimi Cherput, Vanlalmalsawmi (Mali), Mathlenga, Lalhmaa, Isaac, Mimi Lalzamliani, Malsawmtluangi Fanai te an zai dawn a ni.
From Sangzuala Hmar via email
