An extract from LUNGLEN March 2008 Issue
Davidoffs lighter var min pek chu ka ak a, ka sum neihin a tlin tawk Charminar bawm hnih chu ka hum chhuak a, Rahsi Veng lam chu ka pan ta a, ka tih tum chu ka hreh ngawih ngawih, mahse ka tih loh chuan mi dawihzep ka ni dawn si. Nel em em maia engkim chunga roreltu bepawp ve mai thei chu ni ila chuan, “Ka pa he no hian min pel lul rawh se,” tih hial pawh ka duh ngei ang le. Ka bing mum mum a, ka hun kal tawh ka ngaihtuah a, ka nghilh dup a, ka rilrua awm zawng zawng chu tu emaw hnenah sawi chhuak ila, ka harh deuh huai ang tih chu ka hria, mahse tumah ka hrilh ngam lova, hrilh chi pawh a ni hek lo.
Kan boruak tawn a hahthlak em avangin ani pawhin engemaw chu kan inkarah a thleng dawn a ni tih a ring tawh, a ngaih a tha hlawl lova, ruh lam harsatna a neihte pawh a chhuak a, “I’m not in the best of my health” tia a hriselna a that loh thu a sawite pawh a dik hlein ka hria.
THE TRUTH
1991 Matric exam dawn a ni a, Senior Department A ah kan awm ho thin a, pawnfen chhing deuh, a hma lama tawi tea kak, a dum a feng thin, a sam chu Khuannuin uluk zet maiin a ti kawi sa diam a, a inhmeh em em mai, tleirawl lian tak a ni lo, mahse amaha awm engkim mai chu ka tan chuan a hlu em em vek ringawt mai a ni. Senior department-a hmeichhe leh mipa te chu a inep zawngin kan thu thin. Kan in-en a, second sawm vel mit leh mita kan in-en hnuah kan innuih sek a, chu chu kan pahnih inkara thil awm ropui tak a ni. Ka kuah ngai lova, a tawh pawh ka tawk ngai hek lo; a mitah ka en a, ani’n ka mitah a en a, kan innuih seih a, khawvelah hian mi kan kim a, kan hlim a ni. Kan khawvel tar lam tawh pawh hi siam zawh hlim hlawl ang maiin a mawi thar sur mai a ni. A aia thlakhlelh leh enghelh chuang kan nei lo. Kar tluanin sikul kan kai a, Pathianni nghakhlel em emin kan awm a, darkar chanve chhung a khat tawka inmelh ruk leh zauh thin kha kan tan chuan thil lua a ni. Sunday School zirlai zir tura zirtirtute’n pawla min lakhran dawnte hian in-ui em emin kan inmelh a, zirlai zawh veleh kan inhmuh tawn ve ve theihna turah inhrilh lawk ngai hauh lovin kan thu a, inthlahlel em emin kan in thlir thin. Inkhawm ban dawnah uar takin kan in-en a, kan innuih saih a, a karleh Pathianni chu nghakhlel em emin kan thlir tawh thin.
Matric kan exam zo a, result te pawh a chhuak a, kan hlawhtling ve ve a, college kai ve tawh tur kan nih avangin chhungte pawhin a khat tawka zana nula rim tura ka chhuah chu an hnial teh bur ta lova, kar khatah vawi hnih te an inah chuan ka leng a, an chhungte kianga inkawm thin kan ni, a ruka insik hram tumin kan bei nasa hle thin a, mahse a remchang thin mang lo. Thingpui min lum a, zan dar kua a rik tawh chuan a pa-in tihtur a zawng a, tul lo deuh deuh a ti a, awmrei chi a ni tawh lo tih ka hrethiam ve nghal mai thin, naupang te kan la ni a, chhungte tan thlahthlam chi kan la ni lo reng a, hriatthiam loh tur emaw lung lohva lak tur emaw ka tan a awm lo.
Bangalore lama lehkha zir turin min kalsan a tul ta si. A kal hmain a kut tal vuan ila tiin a chhungte awm loh lai ka chang a, keini chuan college kan tan tawh a, last period ka bunk a, a nu leh pate hnathawka chhuak hawn hma ngeia thlen khalh tumin hmanhmawh zetin an in lam ka pan thin.
A kut no nalh em em maite chu ka tan hmuhnawm a tling a, a mitmeng lian fiah em em mai leh a sam kawi deuhte chu ka tan chuan engkima engkim a ni. A hmui ka en a, ka lung a awi hliah hliah a, a pianphung reng reng maite chu a dik tak chuan a itawm a ni, mahse chuti lam hawiin kan inkawm lo. Mel sang tam danah kan awm tawh dawn si a, a hmuiah vawi khat tal han fawp ila tih chu ka duhthusam ngam tawk a ni, a bak ka mamawh lo, ka beisei bawk lo, a hmuia vawi khat fawh chu ka tan chuan vanram tlafual a ni dawn tih ka chiang.
Tlai thum chauh lenna hun ka nei tawh a, a hmuiah ka la fawp si lo, a in panna step chhukah chuan ka inhum ruh a, vawiin tlai chu ka fawp tawh ngei ngei ang, tiin ka hriat tawk leka zawiin keimah leh keimah intih pa na’n a ri te pawhin ka sawi thin.
Ka phu lo ka inti duh bik lo, mahse fawh tumin han hnaih ila, min lo hnawl si se tihte ka ngaihtuah a, mahse hei leh chen kan inngaizawng ve tawh a chutiang chuan min hnawl mai ka ring ngam si lo. Ka huaisenna chuan a tlin ngang si lo.
Ka mission hlenchhuahna tur chuan chawhnu khat chiah hun kan nei ta! Ka insehruh a, a biang lehlam lehlam ka dawm a, na tak maiin ka vuan a, a maimichhing diar diar a, second khat lekin a hmui leh ka hmui inkar chu a dang tawh, mahse ka huaisenna chuan a tlin leh ta lo, “Ka ngai dawn che,” tiin bung angreng tak hian ka thiam ang tawkin ka’n thlah ve a, mahse ka tum ber leh a beisei ber ni a ka rin ‘kiss’ chu ka puitlin thei ta chuang lo.
Chumi tuk atang chuan inchhir reng rengin ka awm a, a chang leh keimah ka inngei a, dawihzep, pa lo ka inti, mahse hun liam tawh hnu koh kir a, han siamthat leh theih a ni tawh si lo. “Ursuline Convent, St. Thomas Town, Bangalore” tih address chu envelope kawmah ka ziak ka ziak a, chu bak chu engmah tih theih ka nei tawh lo.
Tleirawl thawveng rual lek ka ni a, mel sang tam kara leng kan ni bawk si, dak pu lo nuih sang ringawt mai chuan lunglen a hnem reng lova, lehkhathawn kawmah uluk fahranin “sealed with a kiss” te han ti thin mah ila, “a tak ram” nen a inkar hlat em a ni. Lehkhathawn hmangaihna ringawt chu ka duhkhawp lo angreng hle, mahse kan inkara hmangaihna thianghlim tak awm chu a thi ngai reng reng lo, First Love Can Never Die an tihte pawh kha a dik a lo ni ta ve ang.
Rual u deuh kan kawm thin pakhat chuan: “Hrethiam rawh, ngai serious duh lem suh, phai lama lehkha zira min in-awm bosan te chuan mahni awmna lam ve ve-ah khawhar hnem tur ngaihzawng kan nei ve ve a, an lo haw veleh kan thar thawh leh mai alawm,” a ti awlsam et a. Thurawn tha angreng tak a nih chu mawle ka ti a, ngaihzawng dang te pawh ka nei ta lawp lawp a, mahse ka hmangaihna hmasa ber kawltuin an awmna hmunah ngaihzawng a nei ve tih ka hriat meuh chuan a mi den dan a lo namai lo khawp mai. Hmangaihna avangin hrehawmna a awm thei a ni tih a takin ka tawng a, chau si lovin ka hah a, tuma chhawk theih lah ka ni si lo. Ka nuih ve chang pawhin ka hlim lo va, theihnghilh ka tum nasat poh leh ka rilru-ah a rawn lang chiang ting mai a ni.
Kum thum a liam a, PU a rawn zir zo a, veng khata awm kan nih avangin YMA thil tihnaah leh chhiat ni that ni-ah kan intawng leh ta zeuh zeuh a, thian inkawmngeih tak angin ka awm a, kan la inngaina tih chu thiante pawhin an hai lo, mahse danglamna lian tak a awm – ngaihzawng a nei a, kei pawhin ka nei. Mahse hetia a lo haw leh hnuah hian ka ngaihzawng aiin amah ka ngaihtuah tam zawk a, ka ngaihven zawk bawk!
Kan inngai a, mahse keimahni ve vea awm pride chauh chuan min kardan a, a che hmasa zawk nih chu kan hreh ve ve lek a lo ni; chu hmangaihna chu pride awzawngin a lo dang thei hlek lo, kum thum vel a liam a, BA a zawh kum a lo ni a, intawn lohna tur ka ti dawn nge intawnna tur zawk pawh ka ngaihtuah thiam lo, kan intawng a, a vawi khatna atan kan tleirawl laia Bangalore a pan dawn tlaia ka dawihzep zia ka hrilh ta a.
|hiante thil lawmnaah ka kal a, ani pawh a tel a, a kalpuite’n an hawsan tak avangin ka thlah a, an in panna step chhuk ka kal fo-na thinah chuan a vawi khatna atan kan pahnih chuan kan inzui thla ta. Zan a rei tawh deuh a, veivak pawh an awm tawh lo, sawi tur ka hre tawh lova, kan tleirawl laia kan inkawmdan te ka sawi chhuak ta a. Ka lam a rawn hawi a, min deuhsawh rawngkai lek lekin min nuih a, mahse elhsenna chhe mi a ni hauh lo tih ka hai lo. “Khami tlai kha chuan ka beisei teh asin, ka ngei bawk si che a, mahse i rilru la thianghlim zia kha a takin ka hmu a, keimah zawk khan rawn fawh che ka duh a, mahse i rilru la thianghlim tak kha ka zah a, ka ngam ta bik lo a ni,” a ti a, a ngawi vang vang a. Zak hmel pu deuh mai hian a rawn tawngchhuak leh a, “I la huai ta chuang lo em ni?” tiin ka mita min en chungin min zawt ta. Mipa ka ni a, a awmbo hlanin ka dawihzepna te chu ka lo paih bo ve ta bawk nen, kum ruk zet hnuah ka duh em em leh ka hmangaih em em chu ka fawp ve ta a. Ka thlah phal lo, min thlah phal bik lo, nghet takin min kuah a, a aia nghetin keiin ka kuah bawk a, hmangaihna rimawi chuan min zam ta a, hmangaihna rimawi chu a tirah a ri riai riai a, a ri ring tual tual a, a bengchheng ta hle a.
Inngaizawng ang chuan kan la awm chuang lo, mahse inhmuh theih dan tur kan ruahman ru deuh zel lawi si. Ka thian kawmngeih tak pakhat chuan a nau a rim thin a, a hmaa lenpui tura min sawm pawha hnawl thin chuan a bialnu rim turin ka tur ta sek mai, ka lenpui ta ziah mai chu a lo ni reng.
Mahse… amah ka rim miau lova, han thiam loh theih vak pawh ni hek lo le. Keini chu a nau rim kan ni a, a u chuan inleng a nei ve tho si, keimah ka ni si lo. Ka rilru a na a, han hrilh em chu ka duh bik si lo, ka thianpa chuan ka bialnu chanchin te chu ring deuh te’n a’n sawi vel ringawt thin, ka rilru a dam phah chuang der si lo.
Hun a rei a, kan inhmu ru a, ngaihzawng dang kan nei ve ve si a, thil a harsa em em a. Zan khat chu rawtna ka siam ta a, kan ngaihzawng ve ve ban ila, inngaizawng thar leh ang ka ti ta, kan pahnih boruak alh that em em laia sawi ka nih avangin “Aw” tih mai kan harsat lo, mahse hun engemawchen lo ngaihzawn tawh chhuanlam lian awm hauh lova han ban tawp mai chu thil awlai lo zet mai hi a lo ni. Ani chuan a tilui a, a ti ta mai a; keimah zawk chuan ka harsat ta tlat mai, mahse ka duh zawk ka ngaihzawn theihna tur a ni si a, ka ti lo thei ta bik lova.
Inthen leh kan hlauh em avangin kan inveng tawn a ni ber, kan inngaihzawn that leh dan hi a dik kan ti bik lo, mahse kawng awmchhun a ni miau si.
Ka tana a hlutzia ka hrechhuak thar zel a, ka hriat belh zel a, ka tuinaah min tuipui a, ka nihna angin min pawm a, khawvela a game nin ber a tih thin cricket pawh chu hmuhnawm ka tih avangin a tui lui ve ta zel a, test match thlenga hriatthiam a tum a, ka novel chhiar ang a chhiar a, ka chanchinbu ngainat a lei a, poet ka ngaihsan a ngaisang a, ka hla duhzawng a tuipui a, hetiang bak hi hmeichhe fel an awm chuang lo tih chu ka pawmdan thlap a ni.
Hla duh em em mai a nei a, Celine Dion-i sak thin “Think Twice” a ni. Min ngaihthlakpui a, a hla thu a duhzia te min hrilh thin.
YOU
An in panna kawnga nula leh tlangval inngeih hmel taka inzui te chu ka thik a, ka hmuh ringawt pawhin ka thin a ur, mite hi engtinnge inngeih tak leh an hmabak hahthlak ve hauh lova an awm theih bik le tihte ka ngaihtuah zel a, an in lam chu hreh em em maiin ka pan ta a.
Van boruak pawh chuan min hriatpui ve ni berin ka hria, a hnim deuh ruai hian ka hria a, chhum pan tak tak hmuh tur a awm a, thla eng chuan chung chhumte chu a chhun a, a dum deuh ruai a, van boruak pawh chu a tidum duk deuh ruih a. Ral hla taka rimawi thawm ri vai vai chu ka hre thei a… Mr Big hla “Nothing But Love” a ni tih pawh a hriat theih, a thu ka hriatchian sa em avangin benga hriatfiah theih ni lo mah se an saklai tlar apiang chu ka bengah chuan a ri fiah em em mai. “Nothing but love could last forever, nothin’ but love could start to make your head spin round and round…” tih lai kher te chu a fiahfai bik em em hian ka hria.
A hla min ngaihthlaktir thin te chu ka ngaihtuah chhuak a, kan ngaihthlak laia a tawngkam te chu ka bengah chuan a ri nawn reng bawk. “Ka bialpa ban dawn ta ila, he hla hi min ngaihthlaktir sela chuan ka rilru ka sawhsawn leh duh hial ang,” tia a sawi thawmte chu ka bengah a la ri vai vai thei.
“Baby think twice
For the sake of our love and for the memories
For the fire and faith that was you and me…”
A mit meng sen ram mai ka zuk hmuh rual chuan a hlim lova, a lungngai a ni tih ka hre thei a, keimah avang leh kan inkar boruak avangin mittui a seng a ni tih ka hria, keimah avanga Hotel Management zir a tum a thulh leh phah hial lai te ka ngaihtuah chhuah phei chuan ka rilru a tawt zual a, mahse siamrem ngaihna a awm tawh chuang si lo, inhmangaih em em chunga inthen ngai hi khawvela thil hrehawm ber a ni tih chu tu hrilh ka ngai lo. Kan pahniha kan thatna tur a ni si, ka nihphung chuan ka hmangaih chu min hmangaihtir a phal lova, nakin hun kan neih a remti tawh si lo.
A chhan a hriat ve loh avangin ka chungah a thin ur a, a chhan chiang taka ka hrilh hma chu inthen a duh lo tih min hrilh tawh si. Inhmu tawh miah lo tura, ngawi renga kiansan ka duh zawk a, mahse a hriatthiam duh tlat loh avangin thudik a hriat a ngai si.
A kiangah chuan ka thu a, Bangalore-a lehkha zira min kal bosan dawn tlaia huaisenna ka mamawh ang kha ka mamawh tih ka hria, a hmel ka hmuh rual rualin chu huaisenna ka nei tawh nia ka hriat chu a bo nghal a, ka sawi tum leh hrilh ka tum chu ka ka atang chuan a chhuak thei ta hauh lo.
A kianga tape chu a zaitir a, hla dang a ni lo, “Ka bialpa ban dawn ta ila, he hla hi min ngaihthlaktir sela chuan ka rilru ka sawhsawn leh duh hial ang,” tia a lo sawi thin Celine Dion-i hla Think Twice ngei mai chu a ni.
Kekawrtluan thawl lam deuh a ha a, a kianga side table-ah chuan ciggarette bung sawm chuang a let ram bawk a, sweat shirt thawl lam deuh ka hriatchian em em chu a ha a, sweat shirt pawl a inang chiah pahnih a nei a, a pakhat zawk chu min pe tawh nghe nghe. Ka sum khawl ve tang tanga ka leisak tangkaraw thi chu langchhuak thei ngei turin a kawr pawn lamah a awrh a. Valentine’s Day liam taa ka card pek “A kiss is a lovely trick designed by nature to stop speech when words become superfluous” tih chuanna chu a hum a, a kheuh niap niap a, a biangah chuan mittui a rawn luang thla leh ta ngiai ngiai a.
Ka huaisenna ka sawm khawm a, mahse ka sawi duh chu ka sawi ngam chuang lo, ka hmangaih chu ka then phal lo. Mahse, ka then a tul a ni; tuna ka then phal loh pawhin rei lo te-ah loh theih loh thil avangin ka then leh a tul dawn tho si a, a tan a na dawn lutuk tih ka hria. Ka rilru tawt lutuk avang leh ka ngaihtuahna a kal thui luat avang chuan ka thisen a lum a, ka lungphu a rang a, ka taksa chhungrilah namen lovin ka chau a, ka hmelah a lang chhuak ang tih hlauvin ka inthup hram hram a. Chutihlai tak chuan Celine Dion-i chuan helai tlar tak mai hi a lo sa ve mek bawk a.
“Don’t think I can’t feel there’s something wrong
You’ve been the sweetest part of my life for so long
I look in your eyes, there’s a distant light
And you and I know there’ll be storm tonight
This is getting serious…”
A dik em em vek mai, thil duhawm loh em em mai kan inkarah a awm tih chu inhrilh kher ngai lovin kan chiang. Hlim takin hun kan hmang dun thin tih inhrilh thar leh chuang tur kan awm lo, mahse chu’ng hunte chuan kan inkarah hmun an chang tawh lova, ka hreh em em mai chu sawi a ngai tih ka hria.
A tape zaitir chu khawl a nih miau avangin a zai zel bawk si a. A sak tur hla thu te chu ka hre lawk a, sa tawh lo mai se ka ti hle…
“… Are you thinking ‘bout you or us
Don’t say what you are about to say
Look back before you leave my life
Be sure before you close the door
Before you roll those dice
Baby think twice
Baby think twice for the sake of our love,
For the memory
For the fire and the faith that was you and me…”
A sawi tur zawk ka ni si, ka sawi tum a hria a, a chhan erawh a hre si lo. Siamthat ka tum tawh hnua ka siam theih tawh loh a ni a, a pumpelhna ka hre tawh lo, sawi lo ila ka duh, ani pawhin sawi lo ila min duh. Kan hla ngaihthlak chuan inngaihtuah nawn leh a rawn dil lawm lawm mai si, mahse inngaihtuahnawn tur kan awm tawh si lo.
Ka sawi tur chu sawi lo mah ila nihphung hlui engmah beisei tur a awm tawh si lo, ngaihtuahnawna tha leh tur chu ni se vawi za tam a tha leh tawh ang tih ka hria. A zai laklawh lai chu a ti tawp a, a hlum let a…
“You’ve been the sweetest part of my life for so long
I look in your eyes, there’s a distant light
And you and I know there’ll be storm tonight
This is getting serious…”
tih lai tlar chu a vawi hnihna atan kan ngaithla leh a, sawi tur ka neih chu ka la sawi ngam ta chuang lo.
|henna biahthu hlan tura kal ka ni a, sawi tur ka nei si, zan dang chu ni se a ciggarette ngainat em em WILLS chu tui ti tak leh ngaihngam takin a zu leh tawh ngei ang a, a graduate hlima zir zawm a tum thulha Lungleia awmdun a thlan zawk thute sawiin a nui leh sen sen tawh ang. Kawng lak atanga a rawn haw leh laia a rilru buaizia te pawh min hrilh leh ngeiin ka ring. Kan hla ngaihthlak chu a hmatiamin rilru hneh em emin a ri zui vawng vawng a, thil theih tawh loh a ni tih ka hrechiang si, mahse chu hla chuan min theihtir leh a tum a ni berin ka hria. A theih loh tih chu keima’n chiang takin ka hria a, mahse ka beidawng thei si lo, beidawn duh loh avanga thil fel leh duak thei a ni si lo, vawi sang tam ngaihtuah nawn mah ila chu kawngka chu ka khar a ngai a ni tih ka hre chiang si, ka duh loh chu tih a ngai a, ka rilru ka siam tawh a, ka tih a ngai si.
A chhan nen chiang takin ka sawi ang ka ti lawk kha a ni a, mahse a chhan ka sawi chuan a tawrhna chu a na zual dawnin ka hria a, a theih tawh loh tih mai loh chu ka sawi ngam ta lo. Ka rilru a hah a, ka ngaihtuahna a tawi vek a, ka thisen zam chhunga ka thisen luangte chu a khang dawn ni berin ka hria. Ka lungphu a rang a, ka hriat fo tawh thin ka lung sa hut hut mai bawk chuan ka taksa a rawn hmet chau a, ka lu a hai a, ka thaw a pik a, mahse a hriatthiam ka hlauh avangin kan intipachang a, na nei lo ang chiaha lan ka tum lui a, a harsa a, na ka tuar a ni tih a hriat avanga a tawrhna zual tur ka phal loh avang chauhvin ka inthup thei a ni.
Intipachang chawpa sawi ka tum mek lai chuan a hla ngainat em em mai chu a zai zel a, chu hla chuan ka huaisenna a tidawih a, ka intihpachanna a tinem. Ka thluak ni lovin ka thinlung zawkin ro a rel leh ta.
“… Don’t do what you’re about to do
My everything depends on you
And whatever it takes, I’ll sacrifice
Before you roll those dice
Baby think twice…”
A harsa a ni, ka hmangaih si a, hmangaihna mai a ni tawh lo, ka lainat a, engmah buaina awmlo ang maia awm a, kuah vawng vawng a, ka damchhunga ka hmangaih tur thu hrilh mawlh mawlh chu ka duh.
Ka chan ngam a, mahse channa chu hlawkna a ni tawh lo, hunin zawi zawia a her bopui turin chu hmangaihna chu phal lo leh ui chungin ka thlah a ngai a, kan hla ngaihthlak chang tawpna chu a thu hriat phak loh thlenga a ri ral riai riai ang bawkin chan huam lo em em chung chuan chu hmangaihna chu kei chuan ka hmehmih a ngai ta, a ri ral ta riai riai a.
A mitmeng sen ram leh mittuiin a chiah kiang maite chu hrukhul lohva kalsan a ngai a, mang tha tak nei tura a hmuia fawpa duhsakna ka hlan thin chu zan khat atan mai a ni tawh dawn lo tih kan hre tawh. Mangtha chhinchhiahna chuan zan tam tak a daih a ngai tawh. A hmaikhuhtu a chal hma sam chhawlleng dum mawi em em mai chu a bengah a zep a, hreh tak si chungin min en a, chu mitmeng chu mitthlaa cham reng atan chuan a lungchhiatthlak hle, mahse theihnghilh phal rual lohva hlu a ni bawk si. A hla duh em em mai phuahtu min zawh thin pawh chu ka hrilh hman ta lo. Hmangaih em emtu a hmangaihin a kalsan tur ui beh tumna hla Think Twice hi Andy Hill leh Pete Sinfield te phuah a ni tih chu he lehkha ziak hi a hmu a nih ngai chuan a hre ve ngei ang le.
Ka kuah a, nghet takin ka pawm a, a hmuiah chuan dim takin ka fawp ta a, a mittui luangin kan hmui a rawn chiah rualin ka thlah a, aw tham tiak mai, damlo kal mai tur aw ang leka chau hian “A nih leh, mangtha aw” a ti a, an inchhung lam min luhsan ta a, ka thlir reng a, ka mittui a tla zui ve ta a. Ka taksa a chau a, ka lungphu a buai a, ka taksain a hua tih hrereng chungin Charminar ka phawrh a, Davidoffs lighter chuan ka tan a, a ling kal kawk khawpin ka fawp a, ka lu a hai a, thawk harsa khawpin ka awm chhungrilah hian min hnawh a.
ME
He thuziak hi tuna a tawngtu ziah hi a ni lova, a kalsan tak a nula hmangaih em em keima ziah a ni. Hreh em em chunga min kalsan kha a mak ka ti a, ka hrethiam thei ngai lo, mahse a diary-a thuziak ka hmuh atang chauhvin a chhan ka hrethiam ve ta a ni. Min hmangaih em emtu hian kan pahnihin nakin hun tur kan nei thei lo a ni tih hriain hrehawm ti em emin min kalsan a lo ni. A boral atangin thla li a ni tawh a, kan inthen hnu kar khat vel a liam khan Kolkata-a Birla Heart Centre lamah in-entir turin an hruai a, hmanhmawh taka zai a ni a, mahse mihring a chang zo ta lo!
Lung natna khirh tak a vei avangin bypass heart surgery hmanhmawh takin an ti a, mahse an beisei aia a dinhmun a lo chhiat tawh avangin ka hmangaih chuan he khawvel ata min liamsan ta a ni.
Ka hla chuam Think Twice chuan na takin min khawih a, he khawvel ata min chhuahsan hma khan a ngaihtuahnawn hman ang em tih chu ka rilruah a riak reng a, inzaina khum atanga an lakchhuah hnua ICU-a minute 15 vel nungdama a awm chhung khan he hla a thinlunga riak reng chunga min kalsan a nih ka ring tlat a. Ka ngaithla nawn leh a…
“You’ve been the sweetest part of my life for so long
I look in your eyes, there’s a distant light
And you and I know there’ll be storm tonight
This is getting serious…”
