mi(sual).com

Hlim zai leh lam thawm chuan khawtlang a nghawr a, mahse khawhungna kawngkhar, “A kila lung pawimawh ber”, chu an mangnghilh si. “Tlaikhua I var za ang” tiin tual an chai a, mahse an tan khua a var ve ta ngai lo. Ni e, ral hmaa zamngailo val a tlawm a, hmelma hma a tlan ngailo mizo tlangval a tlu ta. Nu nau mangang au thawm chuan vantlang a fan a, mahse chhawntu leh chhantur a ke pen chhuak tur an awm si lo. “Zawlbuk an hual e” tiin an au a, mahse khawpui a thangharh theilo. Thisen leh thlantui nen a an sah zau, an khua ngei chu, nu nau pawisawilo thisen chuan a bual a, che hlek reng hmuh tur a awm lo a nih kha. “Khawnglung run” kha thangtharte thinlungah hian thihni awm ngai tak ang maw.

Zoram ka ram kan ti a, “Kan zo tlangram nuam..” tiin lamtual kan thai a. Mahse a kila lung pawimawh ber hi kan mangnghilh ve dah lovang maw. ILP hlih lailawkna ralthuam hmangin awze miten an zia an rawn chhuah em ni? Khawnglung min run dawn em ni? Mizo tlangval, mipuite ralhmaa kan tluklohnan I ding zel ang u. ILP Interim order Protest day zofaten lungrual takin kan hmanga, Gauhati High Court-ah PIL No. 19 of 2008 kan thehlut a, mahse engnge ni zel ta hriattur a van vang ta ve. Kan khawhungna hi I mangnghilh lovang u aw. Luchhum banchhum huam a kan pi leh puten an sah zau, he kan ram neihchhun tan hian ke I pen tlang zel ang u. Martarte thisen authawm in min auh lai hian, kan ram neihchhun, zoram hi he ILP hlihna ralthuam avang hian I phatsan lovang u.

Thenkhatin “Chimral kan duhloh chuan min chimral lovang” an ti maw? “Tihboral a ka awmlo hi Lalpa zahngaihna ani” tih kan hre lo em ni!!! Kan thenawm, Tripura te hi I thlir teh ang u. Chimral an duhvang reng a chimral em ni an nih le.. Nilo, mahse chimralin an awm tho a ni lawmni. Chuvangin, zofaten he ILP hi hnam humhimna lungphum a ni a, kan chanvo ani tih hriain, he mizote humhalhna tura dan kan neih BEFR 1873 hi kan neih zelna turin, mizo mipuite kan hliam a damlai leh kan thathrumte a kian lai ngei hian thovin I ding zel ang u.

“Thola ding ta che, I hliam a dam e
I thathrumte a kiang e
Hnutiang dawnlovin ram kal siam ta che
Khuavel I la chhing ngei ang”

Similar Posts:

• A Tlawm hlen lo Japan. Zoram i tlawm hlen bik dawn em ni?
• Zo leh zo ngei runhmunah i leng ang aw
• Mizo hmelma chu Mizo!
• Lunglen hi tuar a har ka ti
• Nuclear Security Summit

Recent Posts:

• L.Kira an tih chu (The man behind Lalzova)!
• LUNGPHUNLIAN TUMKAWNG
• A liampui ta si
• ZU HI SUAL A NI LO, A IN A TE PAWH AN SUAL HEK LO
• Like!

This entry was posted on Thursday, July 10th, 2008 at 4:30 pm and is filed under More than words. You can follow any responses to this entry through the RSS 2.0 feed. You can leave a response, or trackback from your own site.