Kum hnih lai a lo liam ve ta, Vawkhniakzawn thla a ni a, ruah a sur duh tlauh tlauh hle mai. Khua a nuam lo a, mahse kan hmabak erawh tlingtlak ngei a ngai si. July ni 13 a lo inherchhuak a, ‘a pa nge a nu?’ tih lam ai chuan ‘kut ke kimim lo piang se’ tiin thin phu dap dapin kan thlir che a nih kha.
Ka mobile phone chu a lo nghing dar dar a, a nihphung pangngai a ni, ka tan thil thar a ni lo. Ka nu-in thu tawi (sms) min rawn thawn tih a lang a, ‘It must have been a rainy day when you were born, but it wasn’t really rain, the sky was crying because it lost his most beautiful angel,’ tih lo inchhu chu ka ta tur a ni lo tih ka hre nghal a.
Kum hnih lai a lo liam ve ta, Vawkhniakzawn thla a ni a, ruah a sur duh tlauh tlauh hle mai. Khua a nuam lo a, mahse kan hmabak erawh tlingtlak ngei a ngai si. July ni 13 a lo inherchhuak a, ‘a pa nge a nu?’ tih lam ai chuan ‘kut ke kimim lo piang se’ tiin thin phu dap dapin kan thlir che a nih kha.
Khawvel eng i lo hmuh ni khan ni a chhuak lo emaw tih mai turin van chu a tap a, a fapa duhawm leia a lo piang ta chuan a tilungngai em ni? Nau lian tak tak an piang a, mahse nang chu chung naute tiat pha lo tur rengin khuanin a lo duang ve che a, mahse kan tan chuan khawvela nausen lian ber i ni ta tho tho a ni.
Khaw eng i hmuh rualin fiah takin i rawn meng a, ‘ka chhung leh khatte chu hengte hi an ni maw…’ ti ang maiin i hawikual vel a, i va’n duhawm em! Tunah chuan nangmah vang liau liauin thiante zingah ‘pa tak tak’ ka lo nih phah ve ta a, i tih theih tawk tlem hle mahse ka chhuang lutuk che hi a mawi lo zawk lek lek hian ka hre thin a ni.
Kum i tlin hmain vanduaina i han tawk leh te te a, i kutphah vei lam chu hman tlak lohin i lo tikang a, i kutzungtang kawm vek, hman tuma i han chelek thinte khan i pa thinlung hi a ti rum thin asin! Neih zawng zawng bak zawngkhawmin plastic surgery ti turin kan intirliam ve ta a, tunah chuan mite angin i kut pawh i lo hmang ve leh thei ta a, mutmawh hnar mawha ka lo neih thinte chu a lo ziaawm ta e!
Kum 2 i lo tling ve ta a, nitin thiam thar i nei ang bawkin i lo changkang ve tial tial a, he khawvel sualnain a hual velah hian ei i la zawng ve ang a, nitin sualin a la thlem dawn si che a, engtia enkawl tur nge i nih ang le. Bawihte, ‘rinawmna leh taimakna’ hi i pa thuvawn a ni a, he thu pahnih hi i kalna apianga i vawng reng a nih chuan ngaihtuahawmin i awm ka ring lo.
Happy Birthday Rintea (2 year)
