A tribute to Lalhmaa
– SANGZUALA HMAR
Chhum dum chhah tak tak karah ni chu ngui nghuai hian a lang a, Durtlang khawpui chuan a fapa chuam a chan a ni tih chu Leitan pelh atanga mipui hmelah a lang. Leitan kianga dawr pakhat atanga “An lung a leng ve ngei ang” tih hla an zaitir thawm pawh a ri vai vai a, kawngsir tawn tawnah motor a ding thuap a, Lalhmangaiha thlah tura kalte an ni.
Pa hlim thei tak mai C Sanga leh a nupui chu kawngpui dungah thuam dum lam hain thutna chang tawh lo zingah ngawi rengin an lo ding a, C Sanga chuan a mak a tih thu a sawi mawlh mawlh a. “Ka ngainat zawng tak mai a ni a, heti teh thut chu a mak ka ti khawp mai,” a ti sup sup a, C Sanga hi pa fiamthu duh ve tak mai a ni nain a hmelah fiamthu a lang lova, rimawi khawvela a hmelhriat Lalhmangaiha hi chuti takin a hre chiang a, a kawm thin pawh a ni hran lo, mahse he thihna hian Durtlang Leitan thleng a ko a ni.
Rimawi khawvela a aihnah phahpui Mizo Idol contestant te hmel chuan he Mizo tlangval hi a uihawm a ni tih sawi kher ngai lovin a ti lang. Gospel huang emaw, lengzem huang a awm tawh lova, Lalhmangaiha avanga kalkhawm zaithiam rualte hi rimawi in a phuarkhawm a ni.
A Pa Kungtea, Gospel Echo-a a telpui tan phei chuan tawrh thiam a har hle ang. A chhuah dawn hian Lalhmaa hian kalpui turin a sawm nghe nghe a, mahse a ni hi a hman loh avangin a kal ve ta lo, an tlan liam a, chumi hnu lawkah Lalhmaa chanchin hian a deng zui ta a ni. Male Voice an tih ho lai atanga inkawmngeih zual tak an ni a, veng khat an ni a, nitin zantin inkawm an ni, heti teh thuta Lalhmaa’n a kalsan hi a tan hian tawrh har tak a ni ngei ang, a mit bui a, a mittui a hru zauh zauh reng a.
My Account:
Mizo Idol-a Leikapui style deu deuh zawnga an sawi ka lak nat thin em avangin Leikapui style rawn phochhuaktu Lalhmaa hi ka tan hle thin. Contest a zawh hmain a album produce thlenga ka inhuam thu a thiante kiangah pawh ka sawi nghe nghe a. Tun hun chiah hi a ni Mizo Sentimental tia ka sawi thin Leikapui style thuam thatna hun remchang chu tiin ka theih ve ang anga Lalhmaa buaipui chhoh chu ka inhuam mai a ni lo, a chak tak takin ka chak. John mawitea leh Mapuii Fanai te chuan Lalhmaa an buaipui deuh tih ka hriat veleh anni nupa pawh ka bia a, Lalhmaa hi hmuh ka duh a ni, ka ti a. Mecca of Mizo Music – Vanapa Hall-ah kan intawng hlauh a, ka ngainat thu leh a rimawi ken theihpawtawpa chhuaha phochhuah pui ka inhuam thu ka hrilh a, a ni pawhin tanpuitu a mamawh thu leh remchanga inbiak a tul a nih chu tiin kan inthlah a, hemi zan pawh hian “An Lung Leng Ve Ngei Ang” tih hla a sa a, Vanapa Hall-a mipui pungkhawmte pawhin a thiam an ti kher mai!
Phone-ah kan inbe ta zeuh zeuh a, ka rawn leng ang a, kan inbe chiang dawn nia, min buaipui loh chuan… a ti ve thin a, recording a tih tan tawh thu leh a zawh har tawh loh tur hmanni lawk khan min hrilh a, mahse ka office-a lo len a tum erawh a ti puitling thei dawn ta lo a ni.
“I rimawi ken hi ka duh a, hetianga kan Mizo style dik tak mai thalai zaithiam zinga rawn vawrh chhuak leh thei tlemte zing ami i ni a, i album hi han chhuak chiah se, Leikapui style tiin a album hming te pawh phuah ila, zawrh a nuam dawn a ni, Leikapui style deuh ve hla pawh thlang rawh” tia ka thiam ang tawk tawka ka fuihna te a zawm em chu ka hre lo, mahse Leikapui style tunlai tak si a damlai ngei min hlui hman ta lo chu a pawi tih mai bak a sawi theih tawh loh!
Lalhmaa nen
Kan inhmuh hmasak ber chuan min lo hre hauh lo, a mobile phone-a rimawi chu headphone in a ngaithla vung vung a, ka va bia a, eng teh ualah mah min lo ngai lem lo, “Enga” a ti a, a rimawi ngaihthlak chu a zawm mual mual a, a kianga thu Mathlenga chuan a nghawk deuh zoh a, a beng bulah a phun sup a, “E” a ti hluai a, min be ta bawrh bawrh a. Mihring, a nih ang anga lang ve tawp mai, inthup mawi tehchiam pawh tum lem lo, lum ve tawp mai ti ila ka swisualin ka ring lo. Pa tha tluangtlam tak, thian ngaina em em a ni tih ka hria. Hemi zana kan inhmuh pawh hian ka office-a leng kawi turin ka sawm a, mahse a thiante, amah avanga Vanapa Hall kal ve te chu a ngaihtuah avangin a lo kal thei lo. Amah hi chuti takin ka hrechiang lova, mahse mi tlawn a, a dera mi tihlawm tum mi a ni lo tih erawh ka ring ni lovin ka chiang. A hlim em em reng mai hi hmuh a nuam ka ti. A thian hnai tak pakhat hnenah pawh: “Lalhmaa hi mihring awhawm tak a nih hi mawle, a hlim reng mai” tiin a chanchin hi ka sawi nghe nghe.
Leikapui leh Lalhmaa
Khawthlang rimawiin min chiah hneh em avangin kan hla thluk leh kalphung te pawh a danglam nasa em em a, Mizote hi Khuarel (Nature) nena inhne tawn reng kan nih thin avangin kan hla thu tam zawkah pawh Khuarel hian hmun a chang tam hle a ni. Mahse khawthlang rimawi, khawpui nun hlimthla lanchhuahna hla kan ngaihthlak tam luat avangin heng kan hla thu mawi takte hian ka hla phuahtute leh ngaithlatute kan kalsan a, Leikapui rimawi chu thangthar lehzual zawkte tan phei chuan rimawi ninawm tih tur khawpin a ral mek a ni. Nikum Mizo Idol-ah khan Lalhmaa leh Isaac-a te chuan an rawn thlawh chhuak a, hla hlui – Leikapui Style kan tih ngei mai, Mizo Sentimental tia ka pawm thlap chi ho an rawn chhawpchhuak a, anmahni ah ngainatawmna a awm a, an hla sakte a lar leh phah hle a, thangthar zawkte pawhin “An Lung Leng Ve Ngei Ang” tihte chu an sa ve rat rat hman a ni.
American ho khuan an rimawi roh em em an “Utawk tur vawn” tlat country music sa tur an nei reng a, vawiin ni thlengin he rimawi hi khawvelah ala danglam ve lo, artiste thar duhawm tak tak an chhuak zel a, he rimawi hi chhawmnunin a awm zel, chutiang beiseina chu ka nei ve thin, mahse artiste chhuak thar ‘Leikapui style’ rawn bawh chat hi an awm hlei thei lo, Mizo Idol 07 hlawhtlinna ber chu “Revival of Leikapui Style” a nihna kei chuan ka ti lo thei lo, he revival lo awm theihna chhan hi R Lalhmangaiha vang a ni ka ti lo thei lo.
A rimawi ken ka tuipui em avangin a music video tur thlengin ka suangtuah sak a, amah chuan ala hre kher lovang, tin hrilhna hun ka nei tawh dawn lo – thlam namthlakah tingtang hrui khat kim lo nen buh hring dup mai langin tlai ni tla tur thlahnan “An Lung Leng Ve Ngei Ang” tih hla hi han sa se ti tein ka lo suangtuah kual nasa hle thin.
Zo Rimawi tana channa rapthlak
Leitan thlanga a chetsual atang khan Leikapui Style pawh a chesual ka ti a, a kal rual khan Lalhmaa rimawia beiseina awm tam tak pawh a kal ve nghalin ka hria a, Leikapui rimawi ka ngaihtuah chhuah phei chuan a lungchhiatthlak takzet a ni. Lalhmaa nghawngkawl hi tunge rawn phur ta ang le, tunge Leikapui Style hi rawn phochhuak ta ang le?
Leikapui rimawi thangtharte benga thun tur chuan mual min liamsan ta si, Leikapui meichher kengtu Lalhmaa hian a thih hlau em emin a hum der der a, khawthlang rimawi thli na em em mai chuan a chhem mih sak hlauvin a thukru chawn chawn a, he meichher tih mih a nih loh nan hla pasarih vel studio-ah a thun fel hman a, he recording hi a nih ang angin Lalhmaa chhungte hian tlangzarh ngei se, chu chuan Mizote rimawi Leikapui Style meichher mit mai tur pawh a chem alh ngei ang!
======================
SHORT BIO
R LALHMANGAIHA
Pian: Feb. 19, 1988
Pianna: Presbyterian Hospital, Durtlang
Pa: R Lalrinthara
Nu: Zoramthangi
September 2007 khan Lalnunmawii (Temami) nen an innei a, fapa Jakaria Malsawmdawngkima, tuna kum hnih leh thla 10 a upa an nei.
2007 Mizo Idol contest-ah telin Mizoram rimawi khawvelah a rawn lut a, he contest-ah hian Top 10 thleng phakin 8-na a ni a, Leikapui Style a rawn larpui hle a, a hla sak “An Lung A Leng Ve Ngei Ang” tih phei chuan Mizoram dung leh vang a fan chhuak a ni.
===============
