1, Tuesday: Urban Development leh Poverty Alevation, Trade and Commerce leh Soil and Water Conservation Minister nilai Pu Aichhinga (68) chu zunthlum natna avangin vawiin chawhnu dar 1:40 khan a chenna Babutlangah a boral.
2, Wednesday: Gauhati High Court chuan Mizoram Inner Line Permit chungchangah Interim Order 13th June-a a lo chhuah tawh chu ennawn lehin hman zui rih loh turin a dah. Amaherawhchu thutlukna erawh chu tun thla ni 22 lo awm tura hemi chungchang ngaihtuah hunah siam a ni ang.
3, Thursday: Tv Lalnunfela (Papuia) 18, S/o H. Darhmingthanga, Sihphir chu khawsikpui natna avangin a boral.
4, Friday: Sual thupha chawina atana Lawngtlaia Dokulha Hall-a ni 40 leh zan 40 tawngtaina, 23rd June chawhnu atanga tan chu urhsun taka kalpui zel a ni.
5, Saturday: Zonunthara (Azaia/Chabetkaia) chu Atlanta USA-ah an lawng chuanna tuilianin a tihbuai avangin a thianpa pakhat Thanga nen an thi.
6, Sunday: MHIP Day vawi 34-na a nia; Chawlhni a nih avangin naktukah lawmna neih a ni ang.Branch thenkhat chuan nimin lam khan an lawm bawk.
7, Monday: Mizorama innei tharte chhinchhiah ngei ngeina tur dan, ‘The Mizoram Compulsory Registration of Marrage Act and rules’ chu Mizoram pumah ataka hman a nih tawh tur thu Law and Judicial Minister Pu H. Rammawi chuan vawiin khan Aizawl Press Club-ah thuthar lakhawmtute a hrilh.
8, Tuesday: Tun hnai-a pawl thar din, People’s Action Committee (PAC)-te chuan Vairengte-a Sipai ram luah leh ram thar lâk tur nei nia insawi zingah diklo taka thil ti an awm tih vawiin khan Aizawl-a thuthar lakhawmtute an hrilh.
9, Wednesday: Vawiin khan New Serchhip Joint YMA Hall-ah 4th Assam Riffles te chuan Hepatitis B Vaccine naupangte hnenah an pe leh a, Serchhip Tlangnuam Branch YMA ten an pui bawm a ni.
10, Thursday: Tukin zing dar 8:00AM khan Legacy Finace Company Ltd. Mizoram Lunglei Branch Office thar Pu K.Lalthanmawia 
Building, Chanmari-I a mi chu Lunglei mipuite dawr theih turin Lunglei Bawrhsap Pi Margaret Zohmingthangi chuan a hawng ta.
11, Friday: Mizoram Congress Party chuan a vawi khatna atan vawiin khan Vanapa Hall-ah General Conference an hmang a; he huna thusawitu an party President Pu LT Zothankhuma chuan, kumin MLA inthlan lo awm turah MCP-in MNF a thawhpui dawn tih a puang a, “MNF mipui leh pawl danga kal rilru milpuite nen thawkhoin sorkar siamtu nihho ngei kan tum,” a ti.
12, Saturday: Tukin zing lampang (nizan) dar 12 leh dar 1 inkar khan Ngaizel khamah Rochungnunga, kum 35 vel mi chuan a hmeichhe tawmpui Lalsangpuii, kum 19 mi chu a nam lum. Lalsangpuii hi a thi lova; Rochungnunga hi hmeichhe khawih leh tualthah tum thubuai siamsak a ni.
13, Sunday: Chandigarh-a marksheet la tura kal, Lunglei Rahsiveng tlangval Joseph HP Lalchhandama chu Chandigarh-a an In luah thinah thia hmuh a ni. Forensic expert lamte chuan amah-ah hian thil tha lo a awm an hre lova; lungphu chawl a nih an rin thu an sawi.
14, Monday: Inner Line Regulation hman vena state pahnih, Arunachal Pradesh leh Nagaland tlawh turin Law Minister, Pu H.Rammawi kaihhruai, lam kal mi 15, Mizoram aiawh-te chuan vawiin khan Aruanchal Pradesh khawpui, Itanagar an pan ta.
15, Tuesday: Ni 5 chhung awh tur Synod Bookroom Grand Reduction Sale chu vawiin atang khan neih tan a ni a, July 19 (Inrinni)-ah khar a ni ang.
16, Wednesday: Vawiin khan Mizoram State Plants Board chu Health Department Conference Hall-ah thukhawmin, Action Plan / Road Map buatsaih dan tur an sawiho.
17, Thursday: Vawiin khan Mipui Tangrual Pawl chuan Mizoram mipuite hnenah ngenna siamin thuchhuah chi hrang hrang an siam.
18, Friday: November 29, 2007-a Chhattisgarh-a helho bomb tihpuah vanga thi ta, Mizoram 2nd IR Police 10 chhungte hnenah vawiin khan chhawmdawlna (ex-gratia) Rs. 10,50,000/- theuh hlan a ni. Heng pawisa cheque-te hi Home Minister Pu Tawnluia leh DM&R Minister Pu K. Sangthuama te’n Police Hqrs. Arya Mess-ah an hlân a ni.
19, Saturday: MPCC te chuan vawiin khan Sairang-a Venus Bamboo Product Private Limited hmun tlawhin, he hmun hi awmze nei lova sorkar sum khawhralna mai ni-a an hriat thu an sawi.
20, Sunday: S.E.Asia-a rawngbawl tura kal, Ralvengtu Founder Editor CT Lalrinawma chuan amah tawngtaipui thintute hnenah lawmthu sawiin, lo tawngtai pui zel turin a ngen.
21, Monday: Zonet Cable Network buatsaih Mizo Idol 2007 thlanna a 8-na, R.Lalhmangaiha (20) Durtlang Leitan chu Bike (Karizma) a chesualin vawiin khan a thi.
22, Tuesday: Zanin khan Central-a UPA sorkar chak tawk leh tawk loh buk a nia, UPA tan tute buk a rit zawk. Mizo MP pahnih Pu Vanlawlzawma’n vote a thlak duh lova; Pu HT Sangliana’n UPA a vote thung.
23, Wednesday: Vawiina Central BJP thuchhuah chuan Thawhleh zana sorkar buk a nih a, BJP duhdan kalha, UPA sorkar thlawptu an party MP 8-te chu hnawhchhuah vek an nih thu an sawi. Hetah hian Mizo pa Pu HT Sangliana Bangalore North bial vawngtu pawh a tel.
24, Thursday: Vawiin khan Synod Revival Speaker-te chuan August-September thla chhunga Mizoram puma beihpui thlak dan tur chungchang an relho. Kumin kum tawp lama MLA General Election neih tur chungchangah Pastor bial tin leh Kohhran a tam thei ang berah camping emaw, crusade emaw nei turin ruahmanna an siam.
25, Friday: Vawiin khan Kristian Thalai Pawl, Central Committee hmalaknain Chhanchhuahna Camping buatsaih tur chungchanga inrawnkhawmna neih a ni.
26, Saturday: Vawiin khan MZI Sub. Hqrs. Lunglei te’n Gen. meeting BRC (SSA hall Venglai)-ah an nei.
27, Sunday: Wales rama Mizo Missionary Pastor Rev. Dr. H. Sangkhuma te chhungkua chu hmangin tunlai hian Aizawlah an awm mek a, Vawiin khan Ramhlun South Bialah hun a hmang.
28, Monday: Vawiin chawhma lama MNF chhung inkhawm, Mizo Hnam Runa neiha thusawitu, MNF Treasurer Pu R. Tlanghmingthanga chuan, “MNF chu Mizo hnam dinkhawchhuahna tura thawktu a ni,” tih sawiin, “MNF-a awm chu Mizo zawng zawngte tihtur a ni”, a ti.
29, Tuesday: National Cadet Corp (NCC)-a Hmarchhak bialtu Brig. P.R.Sharma chuan tukin khan Chief Minister Pu Zoramthanga chu a chenna in-ah a hmu a, Mizoram-a NCC Air Wing tih chak dan tur a sawipui.
30, Wednesday: Vawiin khan Mizoram Council of Ministers te chuan Chief Minister’s Office-ah Cabinet Meeting Chief Minister Pu Zoramthanga hovin an nei.
31, Thursday: District thar an duh avangin tukin zing dar 5 atang khan Khawzawlah Bandh huaihawt a nia, he band hi naktuk zing dar 5 thleng tura ruahman a ni nachungin chu vawiin tlai dar 5 khan mipuiin an thlawp that tawk vang leh, Khawzawl District siam mipuiin an duh zia an tarlang tawk nia hriat avangtein vawiin tlai dar 5 khan tihtawp a ni.
Similar Posts:
- August 2008 Mizoram Diary
- June 2008 Mizoram Diary
- October 2008 Mizoram Diary
- September 2008 Mizoram Diary
- November 2008, Mizoram Diary
August 1st, 2008 at 11:03 pm
Chhana chu a rawn lawrkhawm tha hle mai a. Ama diary pawh a vawng tha khawpin ka ring.
I July thla Diary chu kan lo beisei leh thei nghal mai em?
Report this comment
August 1st, 2008 at 11:58 pm
Lawmna leh lungngaihna lam te pawh a tel nual mai. Engpawhnise a tha khat viau e..
Report this comment
August 4th, 2008 at 11:27 am
LIP chungchang chu a va la lawm awm famkim lo ve le..Mizote hian thil kan tih mai mai chin hi kan bansan a ngai deuh nih awm hi le…Arunachal Pradesh te chu an palzam ngam lo sa turah kan ngai …Mizoram angin Indian hoin an huatthu an khawih mai mai ngam lo
Report this comment
June 6th, 2011 at 9:40 am
A va tha thîn êm!
Report this comment