mi(sual).com

Mizote’n driver-te dinhmun kan dah sang lutuk deuh em?
By Darsiemlien Ruolngul

Mizote hian Driver hi kan lo ngaisang viau thin a ni ang. Tun hma lai deuh phei kha chuan Driver chuan khawkhat nula hmeltha a duh duh a thing thei an ti thin. Hetiang em ema Driver kan lo ngaihsan na chhan ni tura ka rin chu hmanlai deuhva kan A AW B hla, ˜Ke a kal silovin thui tak tak ka kal, tia an lo sak thin angin, kea kal lova thui tak tak min thlen tu, motor leh a khalhtu(Driver)te kha kan ngaisang lutuk niin a lang.

Tun hma ang em khan Driver te hi ngaisang tawh lo mah ila, kan la dah hniam em em lo niin ka hre thin. Delhi-a ka awm hnu hian Mizoram atanga lokal officer thahnem tawk tak kan inah chaw eiin an rawn kal ve tawh thin a. Chung officer tam zawkte chuan an Driver te inchhungah rawn hruailutin, chaw pawh kan rualin an ei ve deuh zel thin. An rawn hruai luh loh pawhin an eitur chaw emaw thil dang dang kha pek ngei ngei turah an ngai tlat bawk thin. Heng Driver an rawn hruaite hi Vai an ni deu vek zel a, a tlangnel zual deuhte phei chuan Mizo tawngpai em em in ti ti hruai phet an tum loh leh an inrawlh sek thin lehnghal! A zialo lampang deuh chu ka ti thin, ka rilru te te in.

Keini ho hian heti em hian Driver te hi kan ngaipawimawha kan duhsak lai hian hnam dang leh mi changkang zawk te chuan an lo ngaisang lo chauh nilovin an dah hniam hle thin a. An inchhung luh tir leh ei leh in pek tihte chu a hnai lo nasa mai! Hemi chungchanga ka experience han sawi ve ka duh a ni e.

Mumbaiah Protector of Emigrants hna chelha ka awm lai khan, vawikhat chu ka ka thiante pahnih, Manpower Export company-a Managing Director ve ve nen Pune-a week-end hmang turin kan thianpa motor, Mitsubishi Pajero-in kan kal a. Khang hunlai kha chuan India ramah SUV a la tam lova, Mitsubishi Pajero hi a tha pawl tak a ni.(tun thleng hian a la ni tho) Mumbai – Pune Expressway kha a thar lai a ni bawka, tlan pawh a nuamin kan speed pawh a sang duh hle mai.

Kan thian pakhat chuan kan motor chu a khalh hmasa a, kawng chanve aia thui kan tlan hnu chuan keiin ka khalh ve ta a. Mumbai kan chhuahsan hmaa programme kan lo siam angin Lonavala-a an thianpa inah inphih fai leh zunram thiar pahin thingpui te ina, rei vaklo chawlh tur a kan riruat kha a ni a.(Lonavala hi Mumbai-pune inkara hill station a ni a, a boruak a nawm vang leh a ram hi a mawi em avang hian tourist in a bawr hle a ni)

Lonavala kan thlen chuan a khaw chhungah lutin ka thiante thianpa in chu kan pan nghal a. An in pawh hi a nalhin compound pawh a nuam a, a mawiin a changkang hle bawk. Compound-ah motor kan han khalh lut a, motor ka park hman hma chuan ka thiante zunchhuak tawh lutuk chu inah an lut nghal a. Kei pawh motor ka’n park zo chu in lam chu panin ka han lut ve mai a. Ka’n lut chiah chu in neitunu, nu valai tak, pian nalh leh hmel chhe lo tak chuan thinrim deuhva mi melhin “Eng tiziaa heta rawn lut ve ngawt nge I nih chu le? chhuak vat rawh, rang deuhvin chhuak nghal rawh” a ti ta mai a.

Min hrechiang hmasa lo leh, tu nge ka nih tih pawh zawt lova chutianga min han lim hrep mai chu ka hrilhhai takmeuh a, mahse ka han ngaihtuah chian chuan Driver pangngaiah min ngai niin ka ring ta a. Hmel te hi a lo tawih tehchiam loh bakah an Inah Motor ka khalhlut ve rup kha a ni si a. Driver emaw tiin chutiang chuan min lim hrep mahse a tawngka kha ka hrethiam tho mai. Insawifiah ka han tum ngial pawhin a thinrim zual sauh sauh lehnghal a. “Tawng tawng lo khan chhuak vat mai rawh, tui i duh a nih chuan I motor park na bulah tuiherhchhuah (tap) a awm kha”, tiin min vau hrep mai a. Chutianga kan rik deuh nak nak lai chuan ka thiante pawh chu bathroom atangin an rawn chhuak ve tawh a.

Kan buaina chhan an han hriat chuan an nuih a za angreng khawp mai. Inneitunu hnenah chuan thil awmzia sawiin, an boss ka nih mai bakah an “Chief” ka nih thu an han sawi a. Thil awmdan a han hrechiang chu a zak ve hle a niang, a hmai a sen tawn tawn mai nia! Nghaihdam dilin pawi a tih zia a sawi chiam a, kei pawh chuan engmah vaka ka ngaih lohzia te ka han sawi ve nual bawk a. A tawp lamah phei chuan nuihzatah kan la a, kei pawhin ka tlangnel phah ta zawk mah in ka hria. Chutia thingpuite kan in zawh hnu chuan ˜bye bye ti in, Pune lam pan turin kan chhuahsan ta a. Thlakhat hnu velah an nupaa Mumbaia an rawn kal tumin chaw eiin min sawma, kan in thiantha zawm ta zel nghe nghe a ni.

Hemi tuma ka thil tawn atang hian ‘Driver Babu’ te hi hnam dangte chuan an lo ngaihsan loh zia ka hrechiang hle mai.

Tlemte a kan han tihlan ang khian Vairam hmun hrang hrangah chuan Driver te hi chhiah hlawh angin en chuang lo mahse an pute nena hmun dang dang tlawha an zinkual chang hian officer ten an rualin chaw an eipui ngai lo hrim hrim a. Manipurah pawh khian driver ten an pute ina an luh chang hian an pheikhawk an phelhziah thin a, chuti chung pawh chuan kawngka bul bak an kal ngai lo.

Zoramah erawh chuan officer leh cer lo, milian leh mite inthliar hranna a tlem a, kan inkawm tlang dial dial a, kan eiin kan in tlang mai thin a. Chutiang bawkin officer-in a driver te pawh dahhniam chuang lovin tlangnel leh inpawh takin an kawm mai thin. A tha e, chhunzawm zel ang u. Hei hi Mizote kan mizia that bik na leh mi hniam zawkte kan ngaihhniam lohzia ti langtu ah ngai ila. Mahse a hun leh a hmun a zirin ramri kan khan thiam a tul a ni. A bikin vairamah te phei chuan fimkhur a ngai leh zual. Officer nelawm lutuk a awm te hi Zoramah chuan kan kan ngaisang a, vaiho erawh chuan ngaihsan a hnehin an hmusit zawk tlat thin si a.

Similar Posts:

• Pafa inbarakhaih
• Ka zin ve a…
• Ho lawk teh ang hmiang
• MLA vengtuten police driver kut an thlak
• Kan value system

Recent Posts:

• mi(sual).com hi!
• KA MITTUI A TLA!
• ȚAHNA NUNHLUI
• March 2017, Mizo(ram) Diary
• NUN THÂMRAL

This entry was posted on Friday, November 28th, 2008 at 2:01 am and is filed under More than words. You can follow any responses to this entry through the RSS 2.0 feed. You can leave a response, or trackback from your own site.