Chhiat tute, Ka thil tawn tak tak ani e
“Thinlai a’n a cham reng thin. Khawnge maw ka di ve kha?!!!” Pu.Rinmawia (C.Lalrinmawia) hla hian ka thinlai ril a fan leh thin. A rei tawh hle nachungin vawi khat tal zawng ka han thai rang ve khanglang teh ang.. in ning em lovang chu maw, sei mahse!
Ka pu, sipai bang, kum 70 chuang tawh, World War II hun laia Mizo tlangval thin kha (fam chang tawh mahse) kei, a tupa hian inentir in Guwahati lamah ka hruai ve hnap a, putu chu titi a rual mawh khawp mai! Generation gap nasa tak karah duh inang lem lo takin kan tih tur ti felin Shillong lam kan let leh. Ni hnih cham a rawt ta (kan haw tlang dawn tawh emaw tih nak a laiin!). Kan cham. February ni 13 ani a, ruahmanna thar, inthlahrung ru tak chung si, ti lui tih hriat tak siin Elephant Fall lamah a tuka len a rawt ta!
Phur lem lo takin a tuk a lo thlen chuan kan hruai chhuak. Kan tlan ta vawng vawng. Fall lam thlen hma chuan speed breaker lian ber chi a lo awm dawn ani tih hre hauh lovin pu thu awih takin kan in khalh phei. “Full Stop” a han ti tuarh a, kan ding a, chu hmun scenario mawi takah chuan a chhak tlangpawng hniamte bula bakthak (khasi) in tlawm te, felfai taka inhung chu a pan ta nul nul mai! Keiin ka zui (a mit a that tawh loh vangin zui a ngai tlat!), mahse chu in kalkawng chu kum 40 hnuah pawh a lo la bel zu nia, vawi khat te pawh a petek lo!
Gate a lut, ka zui, kawngka a kik, ka nghak, a rawn inhawng ta leh. Hairehai! Chu khasi nu (a sam te pawh a lo tuak ve tawh tho mai) chu a bahsam leng siau siau chungin kawngka a rawn hawng ta. Ka pu, ka idol thin, Mizopa zinga ‘man’ ber anga ka lo ngaih thin kha a tuiral titih ta mai, a aw a lawi tan, sipai accent tawk, strict leh fiak taka saptawng hmang thin kha a tawng sin ta rut mai zu nia!!!
Kut zaizirin min hnawl, ka hmuh lai chuan a thiannu chuan saptawng bahlah tak mai, muang ang reng tak bawk siin “hello” a lo ti hnap mai chu leh, ka pu tan khan khawvel hi tawp ta thut se pawi hi a va han ti lo dawn rua emmmm! Body language a min hnawl hnu chuan kei chuan kawtkaiah ka lo nghak ve ta hnup mai zu nia. Mahse ka lungawi tlat!
An inhmu rei lo. Pathlawi leh Nuthlawi a fala awm dun kha a mawi leh mawi loh ka hre lo nachungin an rei miah lo (sawi tur a vang pawh ani mahna!) ka pu, ka hero thin kha kohhran upa ani miau a!!!!
Lo rei ta pawh nise ka va han hrethiam dawn tehreng em! Kei a tupa, boruak la man lem lo tak khan hun thawl zawk pek nachang hriain lo inthiar fihlim thui rei deuh ila zawng kut zaizir tal chuan sawi tur an ngah viau awm si a leh!! Grandpa, wherever you may be, I sincerely apologize!
Upatna hian hmangaihna a ti dal ang maw? “Teuh lo mai, a teuh lo mai…..” kan ti ve anih ber hi! THINLAIA’N A THAR LEH THIN.
