Hmàn lai hian fahrah khawngaihthlàk tak mai Rahtea hi a awm a. Nuhrawn a hrawn a, a nuhrawn chuan a tirethei èm èm thìn a. Chaw puar khawp paw’n a ei ve a phal ngai lo va; a ei atân favai leh chaw chawhpawlh hlìr a pe thìn a. A ei chhiat èm avàngin Rahtea chu a chèr èm èm reng a —ruh kal thei hi a ni ngawt a.
A nuhrawn chuan silhfèn tha pawh a pe phal ngai lo va. Thawmhnàw tet leh hlui, chhe èm èm chauh a silhin a fèntîr thìn a. Khaw vàwt hnuaiahte hian a intuam lùmna tùr thàwmhnaw tha pawh a neih loh avàngin hrehawm a ti thei hle thìn a. Ni lo chhuah hunte hi a nghàkhlel èm èm thìn a. A tân chuan a kawrlum neihchhun a ni ngawt a. Meilum ai ve a tumte hian a nu chuan ai ve a phalsak ngai lo.
A nuhrawn chuan hna hahthlàk tak tak hlìr a thawhtîr thìn a. A hah deuh chânga chawlh ve a tumte hian a chawlh ve pawh a phalsak ngai lo va. A nuhrawnin a hau ang tih hlau tak chunga hna a thawk chung pawhin a hau hrep hrep reng a, a vaw deuh reng bawk a. A nuhrawn bulah chuan awm pawh a awm tha ngam ngai lo va. A hau ang tih hlau rèng rèngin a awm a, a khùr ru zawih zawih reng thìn a ni.
Thian kàwm vete pawh hi a phal lo va, a thiante zînga a awmte hi rang takin a ko hàw a. Engkhàw sawi set set lovin a vaw leh chiam mai thìn a. A nuhrawn chuan Rahtea chu a huat èm avàngin tihhlum daih a duh a, tihhlum dàn tùr mawlh mai chu a ngaihtuah thìn a. Vawikhat chu tihhlum dàn tùr a ngaihtuah-chhuak ta a. A pum a tina der ta chiam a, a lo dam leh theihna tùrin âr te, vawkte, ui-tein nasa takin an thawi chiam a, engmah a ang thei chuang lo va.
Inthawi nâna ran zawng zawng an talh zawh hnuah pawh —a pum nâ chu a dam thei ta chuang lo va. Rahtea pâ hnènah chuan a lo tumlàwk ang ngeiin, “Ran dang paw’n min thawi leh thìn mah ula, ka dam thei chuang lo vang. Ka dam hi i duh takmeuh a nih chuan Rahtea hian min thawi ula, ka dam ngei ang,” a ti ta a. Rahtea chuan a nuhrawn thu sawi chu a lo hre ru kiau va, a hlau ta èm èm a, ramhnuaiah a tlànbo ta daih a.
Rahtea pa chuan, a nupuiin, “Rahtea hian min thawi ula —ka dam ang,” a tih avàng chuan a inngaihtuah nasa hle mai a. Mihringa inthawi chu dikin a hre meuh lo va. A nupui chu a hlau bawk si a, a tàwp a tàwpah chuan rem a ti ve ta a. Rahtea chuan inthawi chu an tum ta a. Rahtea chu an han zawng a, an hmu ta mai lo va. A tlànho tih an han hriat chuan pawi an ti hle a. ‘Rahtea chu engtin nge ka koh hàw theih ang aw,’ tiin an ngaihtuah nasa ta mai a. A tàwpah chuan, ” ‘Khuang kan chawi dâwn,’ ti ila —a lo hàw duh mai ang,” an ti a.
Rahtea ko hàw tùr chuan Rahtea û chu an tîr ta a. Rahtea chu Thingsìri kùngah a lâwn a. A pârzû chu a lo tlàn melh melh a.
A û chuan —
“Rahte, Rahte, lo hàwng rawh,
I nu’n khuang a chawi dâwn e;
I pa’n sial a chhun dâwn e,
Rahte, Rahte —lo hàwng rawh,”
a va ti a.
Rahtea chuan —hlà bawkin a lo chhânglèt ve a —
“Ka u, ka u, kìr leh tawh,
Ka thin ka lung in ei ai chuan;
Thingsìri pâr ka tlàn e,
Ka puar e, ka fân e,”
a lo ti a, a haw duh ta lo va. A û chu beidawng takin a hàw ta a. A nu leh pâ hnènah chuan, “Ka koh pawhin a lo hàwng duh lo, ” a ti a. Rahtea’n a chhàn dàn zawng zawng chu a sawi vek a. A nuhrawn chuan a pî a tîr ve leh a, “Nangin va ko tawh, I koh chuan a lo hàw duh ngei ang,” a ti a.
A pî chu Rahtea ko tùr chuan a kal ve leh ta a. Rahtèa û-in a koh angin a va ko ve leh ta a. Rahtea chuan —
“Ka pi, ka pi, kìr leh tawh,
Ka thin ka lung in ei ai chuan;
Thingsìri pâr ka tlàn e,
Ka puar e, ka fân e,”
tiin a lo chhâng leh a, a hàw duh ta chuang lo va. Beidawng takin a pî pawh chu a hàwng ve leh ta a. Rahtea’n tàn a khawh tlat dàn chu a sawi a. Rahtea nuhrawn chuan a pasal chu, “Nangin va ko ve tawh, I thu zàwng a awih ngei ang. A lo hàw mai ang,” a ti leh ta a. Rahtea pà chuan a va ko ve ta a, Rahtea û leh a pîten an koh ang bawk khân —
“Rahte, Rahte, lo hàwng rawh,
I nu’n khuang a chawi dâwn e;
I pa’n sial a chhun dâwn e,
Rahte, Rahte —lo hàwng rawh,”
a va ti ve leh a. Rahtea chuan, hla bawkin a pa chu a lo chhâng ve leh a —
“Ka pa, ka pa, kìr leh tawh,
Ka thin ka lung in ei ai chuan;
Thingsìri pâr ka tlàn e,
Ka puar e, ka fân e,” tiin.
Rahtea pa pawh chu beidawng takin a hàw ve leh ta a.
A nupui chuan thinrim takin a lo àn khum a. “Khaw’nge —keimà’n ka va ko ang e,” a ti a. Rahtea ko tùr chuan a kal ve leh ta a. Rahtea awmna hmun a va thlen chuan —
“Rahte, Rahte, lo hàwng rawh,
I nu’n khuang a chawi dâwn e;
I pa’n sial a chhun dâwn e,
Rahte, Rahte —lo hàwng rawh,”
a han ti ve a. Mahse, Rahtea chu a hàw duh chuang lo va. Ti’hian a chhâng a —
“Ka nu, mi ngai ma’nàng che,
Keiin ka ngai ma’nàng che — Reng,”
a ti a. Thereng-ah a chang a, a thlàwk bo ta daih a.
Tùn thleng hian thereng chu thil ei lovin —a zai puar ta thìn a ni, an tia làwm!!
Source : Muantea in ZOIN.INFO
Naupan laia ka hriat dàn chuan RAIRAHTEA tih a ni thìn. Primary School-ah kan zir thìn a; thereng hi Rairahtea ni thìn ngei tùrah hun engemaw chen chhûng kha chu ka lo ngai hial thìn. Rairahtea û hi Rahtea chhùlkhat kualpui a ni ang em le âw? Rahtea nu hi a thi tawh nge —Rahtea pe nèn an inthen ni ang âw? Rahtea nuhrawn hian Rahtea nu hi a luahlàn em ni zàwk dâwn le?
Nia, Like tur dik tak hi Like a ngai a...
August 26th, 2009 at 5:47 am
Bàkvawmte-pû leh Rairahtea hi thawnthu thuhmun, inzawm vekah ka lo ngai a, a lo ni lo a nih dâwn hi!
Rawn thawh belh zèl teh u.
Tin, ka punctuation hman dàn hi Mizoram-a ka mi ngaihsànte Pi Zatluangi (w/o H. Zasèla, Lunglei), Lalzova Chhangte (Bible Society of India proof-reader) leh Prof. Dârchhàwna te min zirtîr dàn atanga ka fawm khàwm (culled) a ni.
Ka style ngaithei lo in awm em? Punctuation kalphung zir nân a tute mai pawh hian hmang pah thèn ila maw le! Mizo scholars thu thiam, punctuation-a pachhe ve tak tak ka hmachhawn hnem ve tawh riau! Kei pawh vernacular la lova inzir chhuak ve tho ka ni, tlaikhawhnu-ah Mizo punctuation zir thar leh chiam ka ni tho.
Thawnthu thawhtu khi kan misual.com-a MUANTEA hi a nih ka’n tawngpâwng rìn ngawt a!
Report this comment
August 26th, 2009 at 9:43 am
He thawnthu hi ka pa in min hrilh thin lai kha a rei ve tawh awm mange ka ti.A thawnthu ka ngaihtuah let hian chawnghilh/Muantea te hian ka pa sawi dan ang chiahin in sawi niin ka hria,lung a leng duh reuh.Ka fanu naupang te kum 3 mi bawr vel lek hian thawnthu ngaihthlak a duh thin a,sawi turin min ngen fo mai a,heng thawnthu te hi a awm tih pawh ka lo hre tawh ngai miahlo,ka lawm hle mai.Zanin chu ka’n hrilh ve teh ang,a ngaihnawm a ti dawn e mai.Tichuan maw…..”Rahte rate lo haw rawh,i nun khuang a chawi dawn e,i pan khuang a chawi dawn e” a va ti ta a……a nuam dawn mang e
Report this comment
August 26th, 2009 at 9:47 am
mizo thawnthu hi hriat a lawi ka nei tohlo re re, in rawn post thin hi a lawmawm takzet. rawn post zel teh u, mauruangi tih vel tekha hria in awm lawmi, a dang poh ron ti zel teh u.
Report this comment
August 26th, 2009 at 10:30 am
Kan tet lai khan ngaihnawm kan tiin kan va khawngaih thei thin tak. Rairahtea kan ti deuh kher thin. Pi Nuchhungi Serkawn Graded Reader-ah khan a awm thin kha. Mahni chhiar ai mahin midang chhiar kha ngaihnawm kan ti zawk a, kan Ute, a bikin hmeichhia ngei kan han chhiartir a, thiante hmuh hlau siin a rukin kan mittui kan hru leh zauh2 thin.
Report this comment
August 26th, 2009 at 11:24 am
chawnghilh-a Mizo trawng punctuation vel hi zir tham a tling. A background ka hre nual ka fak tawp heti tak maia thu ziak a lo thiam hi, talent Pathian pek ani ngat ang, Bible atrangin a thiam phah treuh bawk ang .
(Rai)Rahtea chu ka va khawngaih ve mawle, a nuhrawn hi han piai deuh ka duh hial nia mawle. Nuhrawn hrim hrim sual turah hetiang thawnthu chhiar hi chuan ngaih mai a awl ngawt nia :!: Mahse nuhrawn zz an sual lo tih a taka hmu tu ka ni ve.
Pa hrawn hi an fel zawk zel thung. David Copperfield-a pahrawn kha piai ka chak ngawt bawk mai.
Heng Mizo thawnthu .. “hmanlaichuan” tih ziak atrang a intran ang chi kha ka chhiar tawh thanin ka hria … mi(sual) ho hre leh khiau kan awm ngei ang le. Khawlhkawm ila mi(sual) version tichhuak ila download theih turin. Editor ah chawnghilh/Kawnga/muantea te ka propose nghal ngawt ,e min second in awm em
Report this comment
August 26th, 2009 at 11:59 am
Ka thin ka lung in ei ai chuan,
Ka chawn ka ban in ei ai chuan.
Thingsiri par ka tlan e,
Ka puar e, ka fan e.
tiin ka hre thin. A thluk te hi a lunglenthlak reuh bawk sia, lung a kuai tlat alawm. Khawngaihtu kan tam ngawt ang, Rairahtea hi chu.
Tin, a hla tlar tawp khi, kan tet lai chuan a saptawngin kan sa thin. I balloon, I lastic.
Report this comment
August 26th, 2009 at 4:02 pm
Pu Chawnghilh i ti lawmawm thin hle mai.Mahse Rahtea leh Rairahtea hi a hran em ni le? Ka hriat pawlh a ni mai thei,ka hriat ve chu a sei lutuk,kawrpawl ho tih vel te,sakawr thla nei te,bahhnukte tih vel te a awm nuai….eng ber kha nge ni ta ang le???
Zin kawngah hian a ninawm duh sia ka driver nen hian Mizo thawnthu kan in sawi chhawk thin a,hriatchhuah kan nei tlem dun khawp mai
Report this comment
August 26th, 2009 at 5:42 pm
In rawn thawh khawm liam liam takah chuan hriatchhuah ka nei uar uar, winged-horse chunga Rairahtea chuang lai Lehkhabu thin kha … “I balloon,I elastic” kan ti tak tak thin maw kha… kawrpawlho leh bahhnukte kha khawi thawnthu bera mi ni ta ang maw? Mauruangi leh Bingtaituki te kha … chhiar a va chakawm ve.
Thawnthu hi blog thenkhata mi ka rawn pir chhuah an ni ve mai, ka hriat ka rawn thawh a ni chuang bik lo. Lalruanga thawnthu ka hre chak ngei mai.
Report this comment
August 26th, 2009 at 9:19 pm
Ka zawhna pakhatna eh :!: Rairahtea kha chu Chhawnabawraza a mi kha a ni em? Nge Rahtea nen hian a thuhmun nge a hrang :?:
Rairahtea khan Bahhnukte a nei a,Phingnu leh phingpa pawh a lam sek thin kha :!:
Report this comment
August 26th, 2009 at 10:53 pm
XaiA mi va kap deuh ve,,,Rahtea Chu rahtea, Rairahtea chu rairahtea, chhawnabawraza chu chhawbawraza, == Nunna hran nei vek mahse pakhatin a sawi theih .lolzz
Report this comment
August 26th, 2009 at 11:20 pm
Rairahtea kha a tawp berah a nu in a koh ve tho niin ka hria.Ziah hmaih nge khi ti ve reng tur khi.A ngaihnawm khawp mai,A dang han post leh zauh teh a.
Report this comment
August 27th, 2009 at 1:51 am
Mizo Folk Tales chu DOLLAR pawhin an lo zuar ve reng tawh mai … Zopa fel tak tak an lo awm hman reng tawh a nih hi!
https://www.indiaclub.com/Shop/.....Stock=9753
Report this comment
August 27th, 2009 at 2:38 am
Thawnthu ka hmuh belh zèl a, ka hriat dàn a buai tawlh tawlh hlawm … Rairahtea, Rahtea, Thialtea … a hrang hlawm vek a ni àwm asin!
Report this comment
August 27th, 2009 at 2:40 am
@XaiA : Rairahtea fapa hi Chhàwna (Chhàwna Bara Raja) ni àwmin English version-ah ka hmu.
Report this comment
August 27th, 2009 at 2:54 am
chawnghlih ,, i zawm leh a i then leh thin… lolz
rairahtea,, Tearairah,, Tialtea= rahtea.
Report this comment