1st Saturday: Dawrpui Vengthar Branch YMA chuan vawiin khan Aizawl Civil Hospital-a damlo a mamawh apiang hman atan thisen unit 44 an pe a, thisen pete hi mipa 40 leh hmeichhia 4 an ni a, an thisen hi Civil Hospital Blood Bank-a thawkte’n an Veng YMA Hall-ah an laksak a ni.
2nd Sunday: Assembly Dy. Speaker hlui, Pu Vanlalngena (72) Electric Veng chu thla hlui ni 29, Nilai zana an In bula a chetsualna avanga a hliam tuarlovin tukin zing dar 6 khan, Aizawl Civil Hospital-a damlo na bik enkawlna, Intensive Care Unit-ah a boral.
3rd Monday: Mizo zinga Mt.Bhagirathi leh Mt. Abhighamin lawn chhuak tawh mi 11-te’n zanin khan tun hnaia Mt.Everest lawn chhuak, Capt. Samuel Lalrintluanga chawimawina hlan pahin zanriah an kilpui.
4th Tuesday: Thenzawla Police Training Centre-a 4th IR Battalion training zo, mi 468 ten vawiin khan Home Minister, Pu R. Lalzirliana hmaah Passing Out Parade an nei.
5th Wednesday: Vawiin khan Treasury Square-ah vai (sipai, AR mi nilo) Prem Suresh, kum 32 chuan Pu Ngurbela, kum 82, Chaltlang Veng chu Bike-in a su a, Bike khalhtu hian a mi sut hi a ngaihsak loh avangin Mizo leh Assam Rifles-te inkarah buaina tenau deuh a chhuak.
6th Thursday: Tunlaia khawvel puma hri leng mek Swinflu chuan kan Aizawl khawpui pawh a tibuaiin nunphung a tikhaihlak nasa hle.
7th Friday: Vawiin chawhnu dar 1:45 khan Pu Bualhranga In Dawrpui West a mi, Pu Suresh-a luah lai mek chu Cooking Gas Cylinder an thlak tur Cylinder washer that loh avangin a bula mei an chhem nen chuan a in man kai ta a, tichuan in chhung bungrua engmah pawh senghawi hman lovin a kang ral vek a, mihring nunna chan em chu an awm lo nain in neitunu Judith Vanlalzawni leh in luahtu nu Rita-i te chuan an kutah hliam an tuar a, Civil Hospital, Aizawl-ah kalpui an niin first aid pek an nih hnuah an chhuak leh nghal a ni.
8th Saturday: Anthurium Festival, Reieka hman mek, a ni 2-na chu vawiin khan Chief Minister, Pu Lal Thanhawla’n a tlawh.
9th Sunday: Vawiin kha Pathian ni a nih angin Zoram hmun hrang hranga Kristiante chuan Pathian biak nan an hmang hlawm.
10th Monday: Lalbiakngheta (26) S/o. Hauhnuna, Mission Vengthlang chu vawiin chawhnu dar 2 vel khan Mission Vengthlanga Pu C.Rokhuma huan bul thingzar tetakte-ah a kawnghrena inkhaiin inawkhluma hmuh a ni. Kekawr ha lovin kekawrte a ha a, pheikhawk a bun lo bawk a. A ke phah vel chu a thi nual a, a ruang an hmuh hian a thi farte pawh ala khang lo nia hriat a ni.He thil thlenna hmunah hian Police leh Forensic Expert te an thleng nghal a, inawkhlum a ni ngei em tih an chhui nghal a ni.
11th Tuesday: World Health Organisation (WHO)-in khawvel hripui lenga a puan, H1N1-in Mizoram a lo luh loh nan vawiin atang khan Lengpui thlawhna tumhmun atanga khualzin lo lutte chu an khawsik leh sik loh endik vek an ni.
12th Wednesday: Aizawl atanga Kilometre 20 a hla a awm Mizoram university a zirlaite chuan kal vel nana an bus hman chu an in daih tawk loh a vangin Vice chancellor hnenah 5 an dil belh a,Vice chancellor hian hmanhmawh taka a ngaihtuah sakloh a vangin Vawin August ni 12 chawhnu dar 1 khan lungawilohna an lantir.
13th Thursday: Vawiin tlai dar 5 leh a chanve vel khan Lawngtlai bul, Nalkawnah Taxi pakhat chu kawng diak lai an helnaah kawng nal vangin kawng thlang awih sang takah an tla, Lalrinngheta, Neinei leh Thluaiteii, Saiha khua vekte chu an boral a; motor khalhtu leh a neitu ni bawk La-la leh naupang pahnihin hliam an tuar a ni.
14th Friday: Vawiin khan Mizoram Police Wives’ Welfare Association chuan an din champha vawi 11-na, PHQ-a G.S Arya Mess-ah an lawm a, Chief Minister nupui, Pi Lalriliani’n a hmanpui.
15th Saturday: India zalenna champha vawi 62 chu Mizoram ah pawh ropui takin Sipai Lammual ah hun hman a ni a, Mizoram sorkar lu ber berte an kim hle.
16th Sunday: Vawiin kha Pathian ni ni mahse Mizoramah Kristian 100% kan nih tawh lohzia tilang chiang turin Aizawl Civil Hospital pengah chiseh zuar an tam leh hle.
17th Monday: Vawiin khan Falkawn YMA leh VC-te chuan Health Minister Pu Lalrinliana Sailo hnenah tunlai hrileng N1N1 chungchangah lungawilohna lehkha an thehlut.
18th Tuesday: Pu R.L. Rinawma, IRS chuan vawiin khan Mizoram sorkar-a Commissioner/Secretary hna a zawm ta a. Industries, Geology & Mining leh Land Revenue & Settlement te a chang ang. Pu R.L. Rinawma, IRS hi 1978 batch niin Asst. Commissioner in Pune, Bangalore, Mumbai leh Mysore ah te a awm tawh a. 2001 khan Commissioner Income Tax ah kaisangin Mizoram a rawn chhoh thlengin Commissioner a ni.
19th Wednesday: Tunkar Thawhtan zan atanga bo Pu C.Laldinpuia (kum 33 vel nia hriat) Electric Veng Lunglei chu tukin dar 9:00 vel khan Lungleia Agriculture Lui (an tih) mawnglam, KK Home thlang-a kham-ah thi-a hmuh a ni.
20th Thursday: Hman ral theih loh chakna thahrui (Energy) siam chhuah leh hman theihna tura Prime Minister hlui, Rajiv Gandhi-an ruahmanna a lo siam tawhte chu vawiin, a pian champha vawi 65-naah khan ram chhung hmun hrang hrangah inkhawm buatsaiha tarlan a ni. Mizoramah pawh Rajiv Gandhi Akshay Urja Diwas hi District Hqrs. hrang hrangah hman ve a ni.
21st Friday: Frankie Lalrinnunga (25) S/o Rev. CL Biakliana chu tukin dar 8:00 khan Pneumonia leh Swinflu inkawp avangin Pune khaw daifema Pimpri YCM Hospital-ah a boral. Pune-a an awm rei tawh avangin a ruang hi halral a nih hnuah a chhungte hnenah hlan a nia; Vawiin tlai khan Pune-a Mizo awmte’n an vui liam ta a ni.
22nd Saturday: Mizoram Police hnuaia Anti-Corruption Bureau chuan AH&Veterinary Dept. Director Dr C Sangnghina chenna in Durtlang ami chu tukin khan hlemhletna chungchangah puhna a awm avangin dap a nia; amah hi man nghal a ni.
23rd Sunday: Rev. Chanchinmawia, a boral atanga kumhnih dawn lai a liam hnu paw’n sawi a la hlawh hle.
24th Monday: Thailand leh Mizoram thawh dun dan tur kawng dapa Mizoram-a lo zin, Thailand ram palai Dr. Chira Hongladarom chuan vawiin tlai khan Chief Minister Pu Lal Thanhawla, a office-ah a kawm a, an inkawmna-ah Dr.Hongladarom chuan lo neih lam leh a kaihhnawih peng hrang hranga eizawnna ah te, Tourism leh Industry lamah te Thailand hlawhtlinna chu Mizoram tan a taka hman tangkai ve theih a nih dan tur thute a sawipui a ni.
25th Tuesday: Zanin dar 10 vel khan truck pakhat, AS-25 B 4531 chu, Aizawl Civil Hospital gate bul atangain a hnuai kawng puiah a tawlh liam a, a hnuaia taxi pahnih leh Scooty pakhat a delh a, vanneihthlak takin thi leh hliam an awm lo. He truck hi Allam Uddin, Korakhpur, Silchar khalh a ni a, Aizawl Civil Hospital bulah hian bungrua a dah a, a dan zo tawlh let tur chu Hospital peng kawng ko-ah hian a tawlh liam a, a hnuai kawngpui sira motor ding, Taxi MZ-01D 4019, Nghakliana Electric Veng ta, Taxi MZ-01E 7464, Lalnunmawia, Republic Vety Mual ta leh Scooty MZ-01D 9955, Lalchawimawia, Salem Veng ta chu a delh a, MZ-01D 4019 hi a delh chhe nasa hle a, driver hi motor chhunga a awm loh lai tak a nih hlauh avangin a him phah ni-a thu dawn a ni. Truck-in taxi dang pakhat leh Scooty-te hi chu a delh thawi deuh a, delh chhiat lai erawh a nei nual tho a ni. Truck driver, Allam Uddin hi a chetsual hnu hian Aizawl Police station-ah a inpe nghal a ni. Truck chetsual avang hian Hospital hnuai, Upper Bazar kawngpuiah lirthei lian a tlan tlang theih loh avangin, Traffic police ten zanin la la khan an hnuk sawn nghal a ni.
26th Wednesday: Vawiin kha International Youth Hostel Founders Day vawi 100-na leh Youth Hostels Association of India Day vawi 60-na a nia;Youth Hostel Founders Day lawmnaah hian CM Pu Lal Thanhawla’n a hmanpui.
27th Thursday: MHIP enkawl, Zemabawka Hmangaihte Run chu vawiin khan Social Welfare Minister, Pu PC Lalthanliana’n a tlawh a, tanpuina sum cheng 5,000 a pe.
28th Friday: Home Minister Pu R. Lalzirliana chuan, “Mizoram chhunga Remna leh Muanna hlu tak kan neih tibahlah tura chet thawhna reng reng hmeh chimih zel a ni ang,” tih Vairengte-a NGO hruaitute leh sawrkar hnathawkte hma-ah vawiin khan a sawi.
29th Saturday: Mizoramah Swine Flu vei thar pakhat, naupang kum 12 mi hmuh chhuah leh a nil eh ta. Mahse a hming leh vengte zep rih a ni.
30th Sunday: Aug ni 27 zana PHE Pump Operator, Tuithum Tanhril a thawk IC Mishra kum 52, Bihar lam mi thattu ni ngei hriat Joseph Thanga S/o Sikar Manazoli, Mualbuk Kawnpui, Lawngtlai Dist, tuna Tuithum Quarry a awm mek chu Bethlehem Vengthlang kawn ah Luangmual Police Outpost a thawk te chuan vawiin tlailam khan an man.
31st Monday: Vawiin kha Ramthar Ni a ni a, Mizoram Presbyterian Kohhran tan Ni pawimawh bik a ni. A chhan chu Mizorama Presbyterian Kohhran rawn dintu Rev. David Evan Jones (Zosaphluia) Mizorama rawngbawl tura a lo thlen ni a nih vang a ni. Kum 1972 Mizoram Synod Inkhawmpui chuan, Synod Ramthar Board-in, ‘August ni 31, Pu Zosaphluia Mizorama a lo thlen ni hi Synod Ramthar Ni atan hman ni se’, tia a rawtna chu pawmin kum 1973 atang khan August 31 chu Ramthar Ni atan hman tan a lo ni ta a ni.
