A tak ram, khawiah nge?
Suangtuahna ringawtin a tak ram min thlen thei lova, thusawi tha in kan nun a siam tha lova, kan inkhawm hnem avangin kan tak phah chuang lova, Pathian thu in kan nun a khawih danglam tak tak hek lo. Simna thu, piantharna thu te leh Eden huan atanga Kalvari tlang thlengin kan hre bel em em vek! Sawi loh pawh kan nei tawh lova, hriat lah kan hre hnem! Mahse sual chuan min chenchilh a, he ram, Kristian za a za inti ram nisi ah hian zalen takin sual chuan khawlai a leng a, inchhungah kan chenpui a, sual nen chaw kan kil tlang a, kan mut pindan thlengin sual chuan min luahpui ta hial mai. Kristian ram nisi ah Kristian chhungkaw beihpui thlak a ngai a, Kristian ram nisi ah engvangin nge maw Krista nun nunpui an awm mang loh mai le?
Dikna chu kawtthlerah a tlu a, rahbehin a awm a, kai tho a tungding tur nghakin a au vel ruai reng, mahse dikna chuan kaithotu tur a hmu zo lova, eirukna leh hlemhletna in hmun a chang zo ta he ram ah hian! Eng ber hi nge dik lova, khawi lai ber hi nge maw siamthat ngai a thlak danglam ngai chu le? Heti em em a Kristian rama sualna a punlun tak mai?
Chhungkua atanga inzirtirna dik leh tha a awm loh chuan Kohhranin a tuar a, khawtlang nun a nghawng a, ram leh hnam thlengin a tuar thin. Chhungkua ah pa berin a mawhphurhna a hriat a ngai a, nu berin a fate chunga a rawngbawlna a hlenchhuah a pawimawh thin. Khawtlang nun siamtha tur chuan chhungkaw nun atanga bul kan tan that a ngai a, chhungkaw nun a dik loh chuan Kohhran a kal dik zik tluak thei thin lo. Pathian Kohhran thianghlim tak chu zah zo lovin in phennan leh lanmawi tum nan ringawt Kohhran chu kan hmang a, Kohhran tan sum leh pai kan chhun luh hnem chuan kan lungawi a, rawngbawlna dinhmun chelh theihna a nih dawn phawt chuan Kohhran tan eng hmanrua mah kan hmang hreh tawh lo! Nu leh paten chhungkaw rawngbawlna aia pawn lam thil an ngaih pawimawh chhung chuan Kristian Chhungkua tih hi thupui ah vawi za tam pawh hmang mah ila a hlawkna tak tak kan hmu chuang lovang!
Thil hi ti ila, sawi ringawt lovin nunpui ila, kan nun atangin thil tih hmangin langchhuak se a fel a ni mai. Pathian thu kan sawi a, pawn lama kan nundan ah hmuh tur a awm leh si lova, nun chhungril ruak leh lemchanna nun kan tu leh fate kan hnutchhiah a. Nun chhungril ruak leh lemchanna nun avang chuan thalai chu sawi loh naupangte te te nunah sual tih pawi tih lohna a lian a, simna leh piantharna dik nei si lova Kohhrana in hman pawisak lohna a len phah bawk! An nu leh paten in phennan leh lanmawi tum nan ringawta Kohhran an hman avangin takna leh sual huatna tak tak thalaite nunah hmuh tur a awm lova. Biakin a inkhawm chu Kristiante tih tur pawimawh tak leh thlarau nun chawmlenna hmanraw pawimawh tak a nih zia lam ngaihtuah lovin thawmhnaw nalh phochhuahna hmanraw pawimawh tak pakhat ah an hmang a. An nunin a mamawh vang lam ni lovin inkawm hlimnan leh in hmuh khawmnan Biak in leh a vel chu an hmang thin. Pathian thu aiin mawi, nalh leh changkanna in an nunah thu a sawi tam zawk a, Lal Isua Krista chanchintha puandarh aiin sum thawhchhuah hnem an ngai pawimawh zawk bawk!
Nun in a zir miau loh chuan inkhawm hnemin awmzia a nei lova, zing tawngtai inkhawm kal ngunin nghawng a nei lova, hlim lam ringawtah Pathian Thlarau Thianghlim a in rawlh hek lo! Miten kan nun atanga chhiar tur an hmuh miau loh chuan chawnghei tawngtai in awmzia a nei chuang lova, Biakin that avangin inkhawm an pun phah lova, thawhlawm thawh hnemin chhandamna a lei thei hek lo! Simna dik tak kan Lal Isua in min zirtir hi nunpui ila, kan dam tlang a ni mai. Thusawi aiin thiltih hmangin entir ila, Pathian rawngbawltu kan nihna hi kan nun hmangin tarlang ila, pawn lam lan mawina aiin nun chhungril nghet a pawimawh zawk a, a der a rawngbawltu nih tum phet ai chuan bansan ngam ila! Kristian i nih chuan thutak ah i dingnghet ngam tur a ni, Pathian rawngbawltu i nih chuan i rawngbawlpui te i thawhho pui thei tur a ni, mi piangthar i nih chuan Pathian rawngbawltu i ni a, nangmah chauh pawhin i rinawm ngam tur a ni. Sual i haw tak tak a nih chuan sum ah i rinawm ang a, pai ah a rukin sum i chhunglut lo ngam tur a ni.
Tunah chuan simna dik leh piantharna dik tak nen kan Lal Isua hnen pan a hun ta, kan sualte chu dum mah se Aman min silfai dawn si a.
