FPAI (Football player association of India) chuan a vawikhatna atan Taj Bengal Hotel, Kolkata ah Indian football a hmingtha leh che tha te hnenah chawimawina chi hrang hrang an sem a. Heng chawimawina an sem chhuah te hi sawi leh sel a hlawh nghal hle a. Sawisel tu tam tak te sawiselna hi awm tak tak vek a ni.
A bik takin Mizo te tan phei chuan he chawimawina sem lung ti chhe tu a ni pawh ti ila a dik awm e. Mizo tlangval Robert Lalthlamuana chu Best Indian player leh Best Young Player chawimawina dawng thei turin a hming chhawp chhuah a ni ve a. Result puan dawn hnaihah player hming pathum chhawp chhuah leh a ni a. Robert Lalthlamuana hming a lang zui ta lo.
Hetia kan lo ral khat thlir ve dan atang leh Indian football tuipui tu India ram hmun danga, media mi leh sa te pawh be kualin, ngaihdan a siam zui a. Best Indian player ah chawimawina hi dawng phak lo pawh nise, amah a la junior deuh vangin a awm deuh pawhin a hriat theih a. Best Young player ah tal hi chuan chawimawina hi a lak ngei beisei a nih laiin Baljit Singh Sahni(JCT) a khel lai thlan a ni a. Best Young player atan thlan hi season hmasa leh tun season a khelh dan leh a perfomance atanga thlir chuan a awm ang lo hle.
Best Young player atana thlan tak JCT player Baljit Sahni hi nikum khan I – League ah chuan goal 4 a thun ve ngei mai a, a goal thun zat hi chu engpawh nise, bike accident vangin hun rei tak chhung a inkhel thei lo a. Chuti chung chuan Churchilll Brothers a season tluan a khel tha tluan chhuak zak, I- League, IFA Shield leh Goan Professional League khel tha em em Robert Lathlamuana aia thlan awm a nihna hi hriatthiam a har hle. Robert a hi an thlang lo a nih rau rau pawhin Subhash Singh, Rakesh Masih, Rowilson te pawh hi a dawng awm tak chu an la ni tho tho mai. Indian football tuipui, ziakmi thenkhat te pawhin Robert Lalthlamuana aia thlan awm an awm loh thu an ziak ve chuai chuai tho.
Best coach atan David Booth (Mahindra United) an thlang daih pawh hi a mak ang reng hle. David Booth hian a club enkawl Mahindra United te hi tournament lian thamah champion nih pui a nei miah lo a. Sawi hnawk duh chuan sawi tur a tam hle awm e. Tun tumah hian Mizo tlangval, FPAI award dawng thei tur nei rih lo mah ila, engtikah emaw chuan heng chawimawina hi Mizo tlangval ten an la hui vek mahna.
Chawimawina dawngtu te chu:
Best Coach: David Booth(Mahindra United)
Best Player (Fans Choice): Sunil Chhetri (Dempo S.C)
Best Foreign Player – Odafe Okolie (Churchill Brothers)
Best Indian player – Sunil Chhetri (Dempo S.C)
Best Young Player – Baljit Singh Sahni (JCT)
