mi(sual).com

Mizorama, pumpui leh chaw kawng cancer hi a tamna em em chhan hi ka ngaihtuah fo thin a. Dr. Jane R. Ralte chuan The Aizawl Post, November 25, 2009 a sawi danin, “Mipa hrawk bawr leh chaw dawt cancer leh hmeichhia leh mipa pumpui cancerah khawvelah a ber nihna kan chang a ni,” a ti a.

Hetianga khawvela ‘Ber’ kan kaina te hi thil duhawm lo tak zawng an ni. Hman ni khan Internet kan lut vel mai mai a. Article pakhat, ‘Mizoram Leads the World in 4 Types of Cancer’ tih kan hmu a, Internetah meuh khawvel chhiar theih tura kan han lang te chuan min barakhaih hle mai. Khawvel pumpuia ‘ber’ kan lo kai theihna chhan leh he mi do tur hian enge kan tih theih ang tih hi tun tuma kan article in a rawn tar lan tum ber chu a ni.

PUMPUI CANCER AWM THEIHNA DAN:

Tunlai Science lam atanga an hmuh chhuah, pumpui cancer chhan bulpui ber chu, bacterium chikhat, Helicobacter pylori (H. pylori) vanga infection hi a ni. H. pylori infection hi ei leh in thiangthlim tawk loh vang leh kut silfai tawk loh vangte hian a kai theih a. Ram changkanglo ramah a tam bik an ti bawk. Kaw chhung an han thlen tawh chuan pumpui thuah karah emaw ril vun chhung lamah bu an khuara, tichuan, an mahni atang khan enzymes leh tur (toxin) an han siam a, chu chuan, pumpui emaw ril emaw vun kha an ei tan a, a lo hliam a, lawng emaw pan a lo chang ta thin. Kha hliama pumpuia acid thur awm ten an han luan khan a thipin a na duh hle a, pum na te kan lo nei thin a ni. Heng pumpui lawng (ulcer) te hi a reiah chuan cancerah an lo chang nge nge thin. Heng natna hrik (bacteria) te hi an lo inthlah pun tawh chuan an tawh khirh em em a, antibiotic chak pui pui chi hnih chi thum te ei a ngai thin.

Science lam enchhinna, New England Journal of Medicine September 13, 2001 issue ah chuan he H. pylori hi pumpui cancer siamtu bulpui ber a ni tih an tar lang a. An enchhinaah chuan , H. pylori infection vei ho zinga za zela 82 (82%) hian pumpui cancer an vei tih an hmu a ni. Japan ram khi pumpui cancer sanna pawl tak an ni a, chutih rual chuan H. pylori infection vei an tam em em an ti bawk. Ziaktu then khat chuan, “H. pylori infection laka i fihlim chuan pumpui cancer lakah i fihlim a ni mai,” an lo ti mek bawk a ni.

Pumpui Cancer Tantir Lan Chhuah Dan:

1.Pum nuam lo leh daikal dan mu mal lo.
2.Chawei khama (chaw tlemte ei pawhin) pum puar, mi hnawh deuh ul ang a hriatna. 3.Luak chhuak deuh reng.4.Chaw chaklohna.5.Thin dip na.6.Chau ngawih ngawiha inhriatnaPumpui cancer hi hriat chhuah a harsa hle a. A tantirhteah chuan a chunga kan han sawi takte hi a awm lo mai theiin thil dang, ulcer emaw vanga awm thei an ni bawk. Hmuh chhuah a han nih hian a tlai lutuk duh hle. Damdawiina pumpui cancer daktawr ten an zai hi kan lo enkawl ve f ova, a lo nasa lutuk tawh avanga an khar leh mai hi an awm nawk fo a ni.

Pumpui Cancer Nasa Tawh Lan Chhuah Dan:

1.Ek thi
2.Luak vak vak.
3.Buk rih zawng tla hniam vak vak.
4.Pum na te an awm thei a ni.

H. pylori hi pumpui chaklo leh lawng (ulcer) leh pumpui natna dang thlentu bulpui ber anih avangin, hetiang veite hi H. pylori screening tih nghal mai se la, positive an nih chuan damdawia enkawl nghal mai ni se a tih chi hle ang. H. pylori kan pai leh pai loh hi chi thumin a en theih a. Thisen atangin leh thaw (breath) leh, ek lam atangin a test theih a ni. Kan daktor thiamte hian a test dan an thiam em em in a rinawm. H. pylori infection leh pumpui cancer hi ram changkang lo ramah hian a tam em em bik a, ek atanga kai theih anih avang hian, kan public inthiarna hmun te a chuah em avang hian thu neitute hian siam that ngaihtuah a hun tak meuh a ni. Mitinin kan tihtheih dai kal zawh emaw englai pawhin kut fai tawk taka silfai fo hi thil tangkai em em chu a ni. Tin, kan Health Minister te leh kan CM leh a nupui Pi Rii te hian vaihlo an do ang zet hian H pylori hi han bei ve se chu pumpui cancerah chuan kan tlak hniam deuh chu a rinawm hle a ni.

Broccoli hi H. pylori do nan hian thil tangkai tak a ni tih an hmu a. Jed Fahey of The Johns Hopkins School of Medicine in Baltimore chuan he bacterium, H.pylori infection vanga pumpui cancer awm beih nan hian broccoli hi a tangkai a ni tih a fiah a ni. Broccoli a par, ni thum vela dah hnu hi a tha bik an ti. An enchhinnaah chuan Japan mi, 48 hmeichhia leh mipa, H. pylori infection veite kha nitin gram 70 broccoli par hi an ei tir a. Thla hnih hnuah chuan, an thawk (breath) leh an ek (stool) atanga an test naah chuan nasa takin a lo hniam tih an hmu. A reng rengah, broccoli hi thlai tangkai tak, Vitamin A leh C, antioxidant chak takin an hausa em em a, Mizoram leilung hi a ngeihin a tha duh hle si a, chin uar hle tur a ni.

Vaihloin Pumpui Cancer a Thlen Thei: Vaihlo zuk leh hmuam ching mite, tuibur, sahdah, vaihlo chi reng reng hmang mite zingah pumpui cancer hi a let in a tam bik tih hmuh a ni. Vaihloah hian cancer vei theihna khawp tur chak pui pui an tam em em avangin chuap cancer mai ni lo cancer dang dang pawh a thlen thei a ni. American Cancer Society hian kum 15 chhung, mi maktaduai khat an enchhinnaah chuan vaihlo hmang mi te zingah pumpui cancer vanga thi an tam bik tih an hmu. June 2002 vel laia ‘International Agency for Research on Cancer’ (World Health Organization) in research a beihnaah chuan vaihlo zial zuk hian pumpui cancer a siam thei a ni tih an puang a ni. He enchhinna hi Dr. Ann Chao hova an tih a ni. Tichuan, The Zozam Times, November 25, 2009 issue-a Dr. Jane Ralte in “India Rama Vaihlo Hmang Tam Ber Mizoram” a rawn tih hi, pumpui cancer vei, khawvela sang ber kan nihna nen hian a tin zawn theih chiah mai.

Sarep (Smoked Food) in Pumpui Cancer a Thlen Thei:

Mizo hian sarep kan uar hle a, a lo tui hle bawk vei nen. Shillong sarep, Champhai sarep tih vel hi an lar hle ni awmin ka hria. Vawksa, bawngsa rep hi englai pawhin hmuh tur a awm reng a. Mi thiamte lo hriat tawhna atangin sarep hian pumpui cancer a siam thei tih hmuh a ni.

HRAWK BAWR LEH CHAW DAWT CANCER:
Kum nga dawn lai kaltaah khan World Health Organization (WHO) chuan research an tihnaah kuhva khawr ei tamna ram apiangah hrawk leh chaw dawt cancer vei an tam tih an hmu a. Taiwan ram khi kuhva khawr ei tamna ram niin an sawi a. Hrawk cancer an tam hle a, heng hrawk cancer veite zinga za zela 80 (80%) hi kuhva khawr ei ching an ni. Dr. Wu Chien Yuan,

‘Chief of Cancer Prevention in the Taiwan Health Ministry’ chuan, “Hrawk emaw ka chhung emaw cancer vei in duhloh chuan kuhva khawr ei suh u,” tiin an ram mite a hrilh thin.

Kuhva rah, (betel) ah hian ngawl vei theihna chi, vaihlo a nicotine

awm ang deuh hi a awm a. Mi thiamte sawi danin he thil hian vaihloin cancer a siam theih ang bawk hian cancer a siam ve thei a ni an ti bawk. Tin, kuhva khawr kan tih, kuhva rah leh pan hnah leh chinai (lime) inpawlh hi ka chhung hriselna atan hian a hlauh awm hle a ni. Heng pathumte hi a han inpawlh hian chemical reaction a awm a, han thrial khan a lo sen ta sung a, tichuan cancer siam thei chemical leh free radical te an tam ta thin a ni.

Kumin November thla chhung vela Zoram kan lo zin lai vela thil lawmawm tak pakhat ka hmuh chu kan milar TV-a kan hmuh thinte, chanchin thar puangtute leh nula tlangval zai thiam ho, zaipawlte pawh ha fai tha sar mai deuh vek an ni a, a lawmawm tak meuh meuhin ka hria. Amaherawh chu kan milian, leh politician ho te hi kuhva heh ha hmuh tur a la awm thin hi a zia lo deuh hle. Tun hma kum 10 vel kalta kha chuan kan zai thiamte hi kuhva khawr ei ha deuh vek ni mai hian ka hmu thin.

Pumpui Leh Hrawk Emaw, Cancer Reng Reng Do Nana Thil Tangkai Then Khatte:

Research tam taka kan hmuh danin, cancer hi thur (acid) tamna (environment) ah hian an pung duh bik a. Cancer cell te hian lactic acid an siam thei a, chu chuan cancer vei te taksa kha a ti thur (acidic) avangin, cancer cell te kha an pung tual tual thei. A leh lamah chuan cancer cells te hi al (alkaline) emaw normal environment hnuaiah chuan an pung chak thei lo tih a ni bawk. Taksa thur leh al tehna hi pH an ti a, cancer vei inih chuan i pH kha a hniam hle dawn a ni, cancer hrikte khan lactic acid an siam avangin. (Normal pH hi 7.35 – 7.45 a ni) Chuvangin acid tamna sa leh coke, coffee te ei loh a tha. Alkaline (al) tamna chu thlai leh thei thenkhat balhla, serthlum, broccoli, purun var , ai eng, apple te pawh an ni. Thlai zingah be hi acid a sang deuh a ni. Cancer vei te tana taksa pH hniam tih san nan chuan nitina thirfiante thum soda (baking soda) tuia chawhpawlh in te pawh a sual lovang. Ram changkang zawkah chuan taksa a al (alkaline) theih nan thlai tui siam bik te pawh a awm a ni.

Ezymes: Enzymes hi Pu Remkunga Dictionary chuan, ‘thilnung chhungril cells an tih chhunga thil (substance) insiam, substance dangte inthlak danglam tir thei’ a ti a. Ziaktu thenkhat chuan ‘nunna hnar’ te an ti a, thenkhat erawh chuan ‘cancer cells thattu’ ti te in an lo ziak mek bawk a ni. Enzymes hi cancer enkawl nan Europe ramah te an lo hmang tawh thin. Thlaiah leh theiah hian a tam ber a, mahse a hel a ei anih loh chuan tangkaina a nei vak lo. Eden huana Pathianin mihringte ei tura a lo duan, thlai leh thei hel ngei hmang hian mi tamtakin cancer atanga damna an hmu a ni. Damlo, daktawr te an beidawn tawh hnuah thlai leh thei hel tui sawr ringa dam leh hi sawi tur an tam a ni. Hetah hian kan han sawi seng lo vang a.

Boruak Tha (Oxygen): Cancer venna hmanraw tha tak mai chu boruak tha (oxygen) hi a ni. Dr. Warburg-a ‘oxygen neih tawk loh avanga cancer awm thei’ tih research a beihna, Noble Prize hial hmutu chuan hetiang hian a sawi. Cancer veina chhan bulpui ber pakhat chu kan cells ten oxygen an tlakchham vang a ni. Kan cells tha leh hrisel pangaite chu oxygen lovin an nung thei lova, cancer cells te erawh chu oxygen tel lovin an nungin an pung thei a. Tin, kan cells ten oxygen an tlakchham reng chuan cancer cells ah an chang thuai thei bawk,”a ti a ni. Laboratory lama research bei mite thil hmuh pakhat chu, an cancer cells khawi te (culture) hi oxygen an han tih tlem sak hian an pung thuai a, oxygen an han pek hian a thi thuai thin an ti a ni. Chuvangin, boruak tha tam tawk kan neih theih nan nitina exercise a pawimawh hle. Exercise hian thisen kal vel a tichaka, tichuan, thisena oxygen phurtu, red blood cells an tihte hian taksa bung hrang hrangah oxygen an phur darh zung zung thei ang. He boruak thianghlim, nunna hnar, Pathian thil siam pawimawh leh hlu tak mai mitinin man lova kan neih theih a ni. A ropui zia leh a hlut zia hi i chhut nawn fo ang u.

Natna Ventu (Immune System) Chak Tak Neih: Cancer do nana tha tak pakhat chu ‘natna do theihna’ (immune system) chaktak neih hi a ni. Mi thiamte sawi danin mitin hian cancer hrik kan pai vek a, kan taksa a chakloh veleh khan an lo punga, bawk an han siama, cancer vei kan lo ni der mai a ni. Heta tana tangkai tur thlai thenkhat kan han tar lang duh a. Pakhatna: Thil hlui tak mai B.C. 4000 bawr vela hriat tawh kha a ni. Johana 19:38-40naa sawi, Nicodema’n Isua ruang a rawn lak tum a, a bula dah tura a rawn ken, aloe kha a ni. Aleo hi chi hrang hrang a awm a, tuna kan han sawi tum tak hi chu aloe vera hi a ni. Aleo vera in immune system a tichak dan chu, amah hi natna hrik thattu chak tak a ni a, bacteria, virus, fungi infection atan hian a tangkai a ni. Enchhintu, (researcher) pakhat chuan aloe vera hian natna hrik thattu chi hrang paruk a nei a, chungte chu pawn lam leh chhung lam hliam atan an tangkai em em a ni a ti. Natna hrik, min rawn bei turte thattu chak tak anih avang hian, hetiang kawng hian kan immune system a ti chak a ni. Aleo vere hi cancer leh AIDS veite enkawl nan pawh hlawh tling taka hman a ni tih hmuh tur a tam mai. Zoram lamah pawh a tam tawh a, mahse a tak leh tak lo laka fimkhur a ngai hle ang. Pahnihna: Purun Var leh aieng hi natural antibiotic leh antioxidant chak tak an nih avangin, immune system tihchak nan an tangkai hle bawk.

Cancer laka invenna tura, natna laka min vengtu immune system tichak tur hian pawisa sen vak ngai lova mahnia tihtheih a awm a. Kan natna tam tak leh a chunga kan han sawi tak, khawvela ber kan kaina chhan hi keimahnia (lifestyle) kan in siam chawp a ni. Kan nun dan (lifestyle) thlaka ei leh in lama insum te hi a pawimawh hle. Kuhva khawr, vaihlo zial zuk, tuibur leh sahdah hmuam chin hi ngawl veina chikhat a ni. Sim a har em em a, mahse Pathian ring mite leh amaha engkim nghat mite tan chuan thil harsa a ni lo, tih hi ring tlat ila. Krista zarah hnehna kan chang ngei ang.

Natna do theihna (immune system) tihchak nana pawimawh ber chu Isua Kristaa rinna nghah tlata a hmangaihnaa kan chen tlatna hi a ni. Zawlnei Pi White-i chuan, “Pathian hmangaihna leh thatna ngaih hlutna malsawmna lo awm hi eng lei mahin a sawi fiah zo lo va, thi thei rilru pawhin a hre thiam pha bawk hek lo. Leiah pawh hian, Pathian Lalthutthleng atanga hnar nei, lawmna tuikhur kang ngailo kan nei thei. Lawmna leh fakna thinlung aia taksa leh thlarau tihrisel thei zawk eng dang mah a awm lo,” a ti a ni. Pathian, a Fapa mal neihchhun min petu, hmangaihna thukzia leh a ropui zia hi chhut nawn fo ila. Tichuan, a hmangaihna tawp neilo chu nangmahah lo eng chhuak ang a, hlim leh lawmna, Pathian Lalthutthleng nena in zawm tlat i lo nei ang a. i rilru hlimna khan i thisen kal vel nasa takin a tichak ang a, tichuan, i taksa bung hrang hrangah oxygen kengtu, red blood cells hi i thisen chuan a phur darh zung zung ang a. Oxygen cancer cells ten an huat em em mai hi tam tawk i lo nei ngei ang. Chu mi rual chuan i thisen chuan, tidamtu, enzymes leh i chaw tha ei nutrients te chu i taksa hmun tinah a phur darh zung zung bawk ang. Tui thianghlim tam tawk i in chuan i taksaa natna hrik leh tur awm te, cancer hrik thlengin a lo tleng fai zung zung bawk ang a. Tichuan cancer hneh theihloh khawpa taksa chak chu Isua Krista zarah i nei thei ang. Unau, hei hi i duhthlanna a ni. Taksa tichhe thei ngawl vei i neih chuan tun darkarah hian lo paih hmiah mai teh.

In Thawhpui,
Health Ministry, First Mizo SDA Church of America

He email hi ka dawn nawlh maia, mi(sual) thriante tan kan inven-na atan nipah-fawmin ka han chhawpchhuak ani e.

Similar Posts:

• Cancer update
• Pumpui Cancer
• Zu hi a va tangkai tehlul em!
• Mizo leh natna
• World AIDS Day pual

Recent Posts:

• mi(sual) member piancham!
• Kal dem dem.
• Nova’n Anchhia A Lawh Sual Emni? {:Sunday Pual:}
• Beiseina nung (Pathianni pualin)
• Burma-ah ka zin Part – IV (Tuingo khuaa lung satel mak an tih kha)

This entry was posted on Thursday, December 17th, 2009 at 6:01 am and is filed under Information. You can follow any responses to this entry through the RSS 2.0 feed. You can leave a response, or trackback from your own site.