Nimin(17 Dec) khan 2009 Moto Sports Meet chu Tuirial Air Field ah tan a ni ta a, vawiin dar 10- atangin chhunzawm a ni ang a, final-ah hian Sports Minister Pu Zodintluanga khuallian a ni ang.
He Moto Sports Meet-ah hian inelna chi hnih-Circuit Racing leh Intlanmuansiak (Skill Riding) hmanga inel a ni a. Nimin khan Circuit Racing chu tan a ni tawh a, vawiin hian Intlanmuansiak inelnaa chhunzawm a ni ang.Tin, Bike Class chi hrang hrang final pawh neih nghal a ni bawk ang.
He Moto Sports Meet tannaah hian Pu Hmingdailova Khiangte MLA, Mizoram Youth Commission Chairman chu kual lian a ni a. Pu H.Thangchuanga, Working Chairman MMSM chuan hawnna inkhawm a kaihruai a , ‘Khawlai a chak tak taka tlan thinte hian kan sim a hun tawh a, hetiang sim duhna nen intiamkamna nei in awm hi a lawmawm hle a ni’ a ti. Khual lian chuan Motor Sports lam a Zoram thalaite’n tuina an nei chu thil mak a ni lova, an kal dan tur ngaihtuahsak erawh chu kan mawh a nih angin MPCC Sports Cell lamte’n awmze neia kaihhruai tumin bul an tan a, Association pawh a hring chhuak nghe nghe a ni tiin, Mizo thalaite hi zuk leh hmuam leh ruihtheihthil lama an fihlim a tul a ni tiin Mizoram a AIDS lo hluarta te hi kan insumtheihloh rah a ni a, a dona tur atan infiamna hi a pawimawh hle a ni a ti bawk.
Racer te aiawhin Lalruatsanga (RS-a)’n Intiamkamna thu a chhiar chhuak a, khual lianin Race a Flag Off ta a ni. Bike Class chi hrang hrang tana inelna chu Below 160 Cc atangin tan a ni a, Heat-a tlanin mi 2 zel thlanchhuah an ni a, Below 160 CC ah Racer 17 an tel a, 161 cc to 250 CC inkarah Racer 38 telin Open Class-ah pawh Racer 21 lai an tel bawk. Hmeichhe tana buatsaih Scooty Class-ah pawh mi 13 lai telin Skill Class-ah tel tur an thahnem hle bawk.
Zoram thalaite ngaihven ber Open Class-ah hian India No 1 nilai TVS Rider Karthik pawh an engineer te nen Chennai atanga Champion nih ngei tumin a rawn thawk chhuak a, India rama ama dawttu ni thin Hari Silvester Beli Krishna chuan champion a tum hle bawk a, an ni pahnih hi National level pawha lo inel thin TVS Rider ve ve an ni. Mizo rider Open Class-a teltumte chuan an huphurh loh thu leh an zinga tlan thei an ni chu vannei an intih thu an sawi bawk.
Vawiin (December 18) dar 11 ah Final Function neih a ni dawn a. Zofate dinhmun fiahin a awm tan mek a ni. He Moto Sports Meet hian a thalam kawnga nghawng a neih chhoh beisei a ni a. Safety lam ngaih pawimawh anih avangin entu mipuite an lawm hle.
