“Kohhran hi Politic leh ram inrelbawlnaah a inrawlh tur ani em?” tihah hian Mizote zingah ngaihdan hlawm hnih, inthen phawk a awm a; “Politic bawlhhlawh zel tur ven nan a inrawlh ngei tur ani” ti pawl leh “A inrawlh tur ani lo, Kohhran chu kohhran…, Sorkar chu sorkar” ti tlat pawl kan awma, ngaihdan nghet leh bulfuk nei lo, ti ti puite a zira “inrawlh tur/ rawlh lo tur” ti a ngaihdan thlak zutte pawh kan tam viau awm e.
Inrawlh ngei rawh se…
Kohhran chuan kan rinna leh thlarau lam nun ringawt niloin, Politic pawh hi a vei tel ngei tur ani. A vei satliah mai niloin, chumi atan chuan theihtawp a chhuah anga, thuk taka inrawlh a tum ngei tur ani. Ram hruaitute hi Politician annih miau avangin Politic hi a hlamchhiah ngawt thiang lo a, a beng a chhungawng tlat tur lah ani hek lo. Ram inrelbawlna athat loh chuan khawtlang nun a chhia a, khawtlang nun a chhiat chuan kan thlarau lam nun thlengin a nghawnga, kohhran a hul/ ro a, sualna apunga…chuvangin kohhran hi ram leh mipui tan Politic ah a inrawlh ngei ngei tur a ni. Chu chu kan Pathian duh zawng leh lawm zawng tak pawh a ni.
Kohhran chu kohhran…
Kan velah pawl kal sual, nunkawng dai sual, zu leh drugs ngawlvei, KS, ringlo mi leh tlarau bo zawn tur tamtak an awmlaia politic leh sorkar inrelbawlnaa lo inrawlh ve phet tum hi a tul lo. Sorkar-in ram a kaihruai anga, kohhran chuan kohhran mipuite thlarau lam nun leh ringtu tha siam, beramte nunkawng dik kawhhmuh bak enghelh dang a nei tur a ni lo. Kohhran chu athianghlima, Politic erawh kan thurin nena inkalh tlat, dawt leh sual tinrenga inpuh/ sawichhiatna, “an ni chhia se, keini tha ila” tih rilru pute awmkhawmna a ni a, engvangmahin Politic tuinù-ah kohhran thianghlimna hi kan chiah bal tur a nilo.
Sawi ho a tan…
1/ Ngaihdan hmasa ang khian inrawh ngei rawh se. Tuna pangin a rah kan seng tawha, Zu khap anih avanga kan khawlai a nuam tak ziate; State dangte mak tih khawpa kan inthlan boruak muanawm leh athianghlim tak ziate; heng zawng zawngte hi a rah chhuah ani si a. Amaherawh chu, inrawlhdan chintawk erawh neih a tha e.
2/ Ngaihdan hnuhnung zawk ang khian inrawlh kher a ngai lo. Politic-a kohhran a inrawlh hian kohhran-ah thuhla ati tamin ngaihdan phir a siama, chu chuan kohhran inlungrualna hial a nghawng theih bakah pawldang (NGO hrang hrang)ten thikin inrawlh ve phet an tum anga, sorkar-ah ngenna leh rawtna an thlen chamchi ang. Anni’n nawrna(Pressure) anilo ti ringawt mahse,(MLTP act. ang hian) sorkar chuan nawrna angah a ngai lo thei thin silo a. Sorkar ti chaktu nilo, ti luhaitu pawl an pung hluai thei.
