Mizo Tawng hi han bihchiana thumak tak tak, a lam dan hrang hrang avanga hmanna in ang lo tak tak hmuh tur a tam hle a, hetiang kawngah hian khawvel hnam dang tawng aia a hausakna leh a chungchuanna tam tak hmuh tur a awm a ni. Chung thu chi hrang hrang chu tlem a zawng tar lan han tum dawn ila.
Naupang inkhualtelem zawhna leh chhanna chu hetiangin:
Naupang 1: “In Inah kan bel in kawl”.
Naupang II: “In bel kan kawl lo reng reng, tu bel mah kan kawl lo”.
Naupang 1: “Kan bel in kawl reng, chawhmeh kanna bel chu in neih ve reng kha”, a ti a.
Naupang II na zawk chuan chhan ngaihna hre lo leh hrilhhai takin a ngawi ta hle hle a. He zawhna hi zawhna mawl mang tak anga lang ni mah se zawhna khirhkhan leh dik ang reng tak a ni lawi a.
Mizo chuan Samkhuih in Lu kan khuih a, a diktak chuan mipa in Lu kan met a, hmeichhia in sam an tan thung a, mipa in puan kan veng a, hmeichhia in puan an bih leh tut lawi a. Zungbun leh ngun kan bun a, Tarmit kan vuah leh tlat pek a, kawr leh kekawr kan ha a, mawza leh kutkawr kan bun leh lawi a. Lukhum kan khum a, diar kan khim leh tlat pek a, a mak a nia! Thutthlengah thu chungin kan muhil a, kan Thuhil a ni ve thei mai ang em?
Pa pakhat pawhin a thianpa chaw ei turin a sawm a, chaw ei tura a kal chuan a thianpa chuan chaw chauh lo ei tir a tum a, a thianpa tan chuan a hrilhhai thlakin a thinrim thlak duh fu ang. Amaherawhchu fiamthu mah ni se a dik ve tlat , chaw ei turin chawhmeh kan beisei tel nghal tlat a, mahse kan sawina ah chaw leh chawhmeh lo ei rawh kan ti kher ngai chuang lo, kan chiang nghal vek mai a ni.
Thianpa Madina pek hian a lawm ruaithehnaah chawhlui kil aia chawthar kil duh zawk tlat, hei vang hian a nia amah pawh a mum kung a, a ria chum bat. Mak thei ngei!
Kan nawh alh hma hauh atangin Nawalh kan lei a, lehkha in vaihlo kan zial a, mei kan zu leh daih pek a, min kang na lem hlei lova, a huaisen thlak viau lo maw mei han zuk te chu(h)!
Innei tur an awm in naupuak puan an ei a, a tui loh thu sawi phei chu an awm hlei law, naupuakpuan tui awm loh nen tun thleng in ei duh lova hnawl kan la awm lo chu a nia! Thianpa Madina tho hi a lawm hring rau rau ah hring ei rawng mak ti ber a, Ar ah Niar tui ti lo ber tu, khirh tak a ni.
Heng lo pawh hi thu chi hrang hrang maksak tak tak, ngaihtuah peih leh thluak hmang peih tan haichhuah tur tam tak a la kuh tul a ni.
