mi(sual).com

Kan mamawh hre turin ngaihtuahna kan hmang em?

~ LTP

(He article hi a neitu phalna a lakchhawn a ni a, a thu a inzawm mar that em avangin part-ah then loin a vaiin ka rawn dah e. Muang changin chhiar teh khai!)

Sumdawng mi i ni thei e, sumdawnna-ah i thil enkawl a lian ve thawkhat hle pawh a ni ang. I hnathawhna-ah hmasawnna kawng awm zel tura inhai kuak tumna rilru a awm em? Nge ni tuna i tih dan ang pangngai kha ngaiah neiin zing tin tui takin i ti ve zel zawk?

Chhang siamna khawl pui tak bunin dawr lian tak i din ve a, a nih loh pawhin Printing Press lian tak i nei ve rup mai emaw, processing industry (food, cane, fruits, etc) i siam ve emaw pawh a ni ang. Order delivery a regular thei bawk si lova, rilru hah vangin dawr inlengte nen inhauh hrep a tam chang a awm pawh a ni thei e. Ina haw tlai viau phah nana hman khan rilru hah a tikiang chuang si lo. Chhungkua, nupui -fanau leh chhungte nen inkungkaihna a chhe tulh tulh mai bawk nen. Changkanna tur ngaihtuah lam ai mahin “Kan ram hi chu hnathawh vel a buaithlak a nih hi?” tih rikngawt chang pawh a tam a rinawm hle.

Management Concepts leh mi hlawhtlingte thawnthu te han hre ve zul thin mah ila, kan hman tangkai thiam leh bawk si loh chuan awmzia a awm bawk si lo. Commerce-ah te pawh question paper chu chawk ve zung zung thei mah ila, a practicality kan hrechiang leh tawh thin bawk si lo.

Just In Time (JIT) leh Economic Order Quantity (EOQ) Concepts (heng hi Foreign Companies ho chuan an Quality Control nan an hmang uar ve hle) tih vel pawh han hre ve zul mah ila, enge a nih tak kan ngaihtuah zui leh chuang si loh chuan a hman tangkaina (application) chu kan la hlat viau ang.

Mahni inenchiang mang si lova mi zinga kan ram that lohna chhan, kan changkang theih lohna chhan hahipa sawi thei leh si pawh hi kan tam tawh em em a ni lo maw? Mahse hetiang kan pawngpaw sawi vak vak ringawt hian kan changkan phah dawn chuang lo. Sawrkar khawngaihna azarah a tam zawkin eizawnna tur kan la hmu ve tawk tawk a, chutah a tam zawk chuan sawrkar bak sawi chhiat tur kan hre leh bawk si lova. Hmasawnna kawng rahbi tur hrang hranga ngaihtuahna a len vel laiin, a sira mi te bawkin, “Kawng tha chu nei ilang chuan”, “power leh infrastructure tha chu nei ve ilang chuan chutiang khatiang kha chu kan ti ve thei ang mawle” an han ti vawng vawng a. Mahse hengte hi a kum sawm tel a ral hma loh chuan thawk leh khata rawn inbun rup thei a ni bawk si lo. Keimahni a hmasain kan inenchian a ngai ber a ni.

Kan nitin eizawnnaah engte nge kan mamawh a, kan hlawhtlin theih loh thin tih han inenchiang ta zel ila. A hmasain, a hnuaia kan tarlan ang harsatna te hi kan nei em? Lo nei ta ila, engtin nge kan chhan ang?

1. Sumdawng mi tan: Enge ka business hi a nih? Enge ka tum ber? What is my ultimate goal?

2. Industry neite tan: Hei hian kan rama kan neih ve lar zual- Printing Industry/Printing Press, Newspaper Business, Carpentry, Food Processing Industry (thei tui siam, chawhmeh tin siam, chhang/cake siam etc etc) huamtir ta vek ila:
a. Inventories (raw materials, final product siam nana kan mamawh hrang hrang) ka nei tha tawkin ka ngah hle si a, engatinge a hun takah order thawn chhuah hi a va har em em ve? Order thawn chhuak nghal vat theih tur dinhmun a ka din chang te hian thawn chhuah na mai tur a chang in a awm leh thin bawk silo.

b. Ka khawl hman thenkhatte phei hi chu a man sang ber ber an ni si a, engatinge ka production (ka siamchhuah theih zat) hi a hniam viau zel le?
c. Ka Assembly Line-ah te hian bottleneck ka nei em ? (Assembly Line – Kan product tur siamna process a stage hrang hrang eg. Thutthleng siam dawn chuan kan Assembly Line chu: Thing nawh mam > Design > Remkhawm/Kilhkhawm > Varnish/Rawng Hnawih > etc. )

3. “Harsatna tihrem (problem solve) tur chu sawi loh, harsatna leh buaina ka neihna lai ber hre chuang lovin kan nitin tihdan pangngaiin ka ti ve bawp bawp mai zel zawng a nih hi”.

4. “Office ah te hian kan staff thenkhat te hi chu a thiam ber ber pawl leh a taima ber ber te an nia, mahse engatinge maw ni kan hnathawh hi kan zo mawh thei riau mai. Kan nau fel ho phei hi chu an thawhrim tehreng nen?”

5. “Thil thar hi chu ka hre belh ve zel asin mawle, engtin nge ka hman tangkaipui theih ang tih erawh hi ngaihtuahna tak tak seng chung chuan ka lo umzui vak lem hlei nem”.

Mahni sumdawnna theuhah chuan kan hlawkna tur kan um tlangpui. Nimahsela, kan business/sumdawnna leh kan nitin hnathawh dan hi OPERATIONAL MANAGEMENT point of view-in kan chhut ngai vak a rinawm loh hle mai. Kan hlawkna tur leh kan than chhoh zel theihna tur atan chuan a pawimawh ber si a.

A mal malin i han then hrang ila, i han chhut chiang ang u hmiang le:
Bottleneck tih hi a awlsam thei ang bera hrilhfiah dawn chuan “Thil hnawh chih”, “Than mawhbawk”, a awm avanga hna zawng zawng (process) timuang vektu ti ila, a fiah ber awm e. Chu chu engtin nge ka hriat theih ang kan tih chuan, hriat leh thur chhuah a har em em lo thei. A entirna nen awlsam tea kan hriatthiam theihna turin i han en chhin teh ang u:

Scene 1:
Place: Aizawl Sawrkar Office pakhat chhung:-

Remi leh Diki te chu an desk ah thu in hna an thawk malh malh a. Remi hma ah chuan files leh office hna chi hrang hrang buaipui tur a tam hle mai a, Diki erawh hi chu nula taima tak a nih avangin a hna hi a hun tak ah a zo thlap thlap zel mai a. Chuvangin a dawhkan pawh a faiin a ruak thei hle. Department khat a thawk ho tih takah chuan an file vel khawih reng reng hi mi pakhat in enkawl vek lovin mahse chanpual theuh an insem zel a.

Remi: “Diki chu a nuam awm bik, awi tih tur ka la ngah lutuk. Files ho pending a tam lutuk a, ka rilru a hah, min ti buai zo vek”

Diki: “Nia, kei chu ka desk a lo kal apiang hi ka ti nghal char char zel a, Zohma-a te hovin files leh thil dang dang min rawn pek phei thin te hi chu ka ti zo nghal vat zel. Kei chu ka nghak khawl vel peih ve lo, tih zawh vat vat thin hi ka duh”

Remi: “Awi, kei chu chutiang chu ka peih ve lo. Ti hian rawn dah khawl se, vawi khat ah hian ti leh tawk zel mai ila. A hun thlap thlap a tih nghal vel hi chu ka peih lo, a tul hun ah chuan kan ti zo ve leh mai zel”. Chutia sawi pah chuan Remi chuan a piah a thu ho te chu a va au va, “Hna dang min rawn pek belh tawh suh u, hei a hma ami pawh a la tam lutuk. Ka khawih tur ang chi reng reng kha chu lo ti hrih lo mai rawh u. Min nghah pah deuh in tikhan a sir ah khan Dawl lo va in chuh mai rawh u, kan pu te pawh an awm chuan loh hi”

Pi Rami: “Remi, i hna ho kha i tih zawh phawt loh chuan kei chu ka awl der mai a nia. Ka khawih ve theih ho tur chu i tih zawh phawt loh chuan engmah ka siam danglam thei bawk silova”

Remi: “Ka thawh ve tawh chuan ka ti char char mai dawn alawm. Tikhan lo awm mai mai teh u, in tur vak vak chi pawh anih loh hi, tihsual a hlauhawm bawk si. Ti hian kan thawk vak vak anga, a chung lam hovin eng engemaw an lo thur kual ve leh anga, file kan khawih sak ho hi, ti zo vat vat mah ila, a tang leh tho ang”

Chutih lai tak chuan an hotupa Pu Zuala hi a kid officers dang ho nen an rawn lut a, Pu Zuala chuan office a luh pah chuan a sira mi a kalpui officer pakhat hnen ah chuan “kan nula Diki hi chu a taima asin aw, kan department a ani a rawn thawk ve hi chu kan chhawr tangkai a nia, ani hi chu awm lo seng chuan a hna khawih hi mi chi hrang hrang in an buaipui a ngai ang”

A chunga kan han tarlan ang khi sumdawnna (business ) chi hrang hrang ah emaw, kan industry leh kan hnathawhna hrang hrang environment ah a ngaihbel theih vek in a rinawm a, tin, khing te khi Shop Floor Activities, Assembly Line Process leh Process Chain Activities kal phung nen a in ang ah a ngaih theih bawk.

Kan entirna kan han tarlan ah khian Operational Management lam atanga thlir chuan Remi khi kan BOTTLENECK a lo ni der a ni. A dawhkan ah file a in chhawp hnur thin khian a thiante hnathawh tur a ti bahlah in a ti sukuk zo vek thei bawk ani. A hnathawh leh tur a thawh theih loh vangin a thawhpui ten an chanpual ti zo tawh mahse, an rawn pe thei silova, a thawh lai a tih zawh loh avangin a hna khawih ho pek chhawn leh na tur te khan an dawn mai theih loh avangin an lo chawl mai mai bawk nen. A mimal tam zawk in tha deuh in hnathawk thin mahse, hemi BOTTLENECK vang hian FINISHED PRODUCT a chhuak tlem hle thin ani. Heng file tang khawm in chhek ur hi Operational term a INVENTORY kan tih nen hian a in ang reng ani. (Inventory: Raw materials atanga kan thil siam tur kan tih danglam mek, FINAL PRODUCT a kan la chan tir hma a, a kar laklawh a hman mai theih tur a lo tling khawm ho). Hetiang ang bawk hian kan hnathawhna dang ah tepawh eg. Thingzai na khawl, chhang siamna khawl, Printing Press, food processing etc), assembly-line a enge maw a in chhek khawl hnur tawh hi chuan enge ka bottleneck ni ang aw, tia in ngaihtuah that a tha hle ang.

BOTTLENECK in a a thawh theih zat hi kan business (office, factory, manufacturing & processing plant) in a a thawh chhuah theih zat ani. BOTTLENECK ber in darkar khat a a siam chhuah theih hi, kan plant pum puiin a darkar khat a a thawh chhuah theih tur a lo ni der ani. Darkar khat BOTTLENECK avanga kan hlauh chuan darkar khat kan hna zawng zawng ah kan tlai phah tih na ani.

Chain inzawmkhawm hi Sawrkar hnathawhna a Department hrang hrang ang ah ngai ta ila, chain pakhat a chhiat chuan a dang zawng zawng pawh an tangkai dan tur angin an tangkai thei dawn miah lo a ni. Hetiang ang bawk hian kan hnathawhnaah Department pakhat in lo ti tha viau ta sela, a dang khan an tih that ve lem chuang loh chuan FINISHED PRODUCT chu a awm thei dawn miah lo tih na ani bawk ani.

Tunah Mizoram angah tepawh Agriculture lam leh Horticulture lam ah te pawn lam a thawn chhuah ve theih ngei turin sawrkar in tan a la nasa em em a, amaherawh chu hetiang ti ve thei tur dinhmun a ding tur a department thenkhat in nasa tak a an thawh laiin Department hrang hrang kan in complement thiam thin loh avangin BOTTLENECK tam tak a chhuak a, heng BOTTLENECK ho hi han chhui chiang thei se, eng te nge ni: Marketing, Sales, Operations. Tute ber hi nge ni kan BOTTLENECK tih zawng hian chhut ve chhin seng chuan kan changkang phah deuh chu a rinawm hle.

Department thenkhat in an chanpual an tih zawh a hna thawk tha in tih viau ringawtna rilru hi chu kan bansan a hun tawh hle mai.

Similar Posts:

• Civil Hospital in Phacoemulsification Unit thar a nei
• MGNREGS (Engvangin nge kan hotu te hian…..)
• Mizoram kawngte leh power (current)
• Mizoram Pawn – Ka thil huat te
• Kan Khaw Kawng hi!!

Recent Posts:

• ZU HI SUAL A NI LO, A IN A TE PAWH AN SUAL HEK LO
• Like!
• LUNGHNUR
• SADHU SUNDER SINGH-A CHANCHIN ROPUI CHU:
• KA ṬAHPUI LEH SI ṬHIN

This entry was posted on Thursday, February 4th, 2010 at 3:49 am and is filed under Economics, Mizoram, More than words. You can follow any responses to this entry through the RSS 2.0 feed. You can leave a response, or trackback from your own site.