Mihring nunna hi a hlu a, a aia hlu a awm thei awm love. Miin nunna a chan tawh chuan a tawp a thleng tawh tihna a ni a, a kalsan a chhungte pawhin chutiang ngaihdan chu an put a rinawm a ni.
Mizoram-ah hian damdawi In kan ngah ta viau a, chumi zingah chuan sorkar enkawl Civil Hospital hi a lian ber a, khum 300 lai a awm a ni. Kan mithiamte hi zing dar 9 atangin tlai dar 2 thleng an thawk deuh ber nia sawi a ni a, chumi aia rei deuh thawk department te pawh an awm a rinawm tho a ni. Chumi a nih chuan ni khatah darkar 5 aia tam awrh damdawi in-ah hian hun an pe niin a lang a ni. Thenkhat chuan a bak hun an neih hi chu an clinic lamah rilru an pe mah zawkin a hriat a, daktawr thenkhat phei chu tlai dar 1 atanga an clinic-a thu an awm tawh nia sawi hial an ni.
Hemi atanga chiang taka lang chu ni khata darkar tam zawk chu kan mithiamte hian ward hi an vil lova, a remchan hun apianga koh theih tura beisei an nih laiin an awm remchang lo tihna a ni thei ang. Casualty a Medical officer duty leh intern ti lai te’n khum 300 hi hun tam zawk chu an vil tihna a ni. Private hospital pawhin resident daktawr an neih theih laiin Civil Hospital- a kan nei thei lo hian hmabak chu a tilang chiang mai awm e.
Tunlaiin thu inchuhna lian tak a awm a. Civil Hospital leh a chhehvelah recreational park siam nawrna a awma, daktawr mamawh huna koh theih chenna tur quarter sak thar turte te chu he hmun hian a tibuai lo nia ngaih a ni. Chutih lai chuan damdawi In a thawkte chuan he hmun hi daktawr te koh zung zung theihna tur quarter sakna atan an mamawh nia sawi a ni. He park siam leh quarter siam hi a pawimawh dan a inang tlang viau a, uluk taka ennawm leh theih hram nise a duhawm hle. Damlo nunna channa hi hote a ni a, daktawr te a huna an thlen hman loh vang a ni thei a ni. A enga pawh chu nise hun lo kal zel tur thlirin damdawi In kan neih len ber inrelbawl dan leh a kal zel dan tur hi a ennawn leh a ngai ni chuan a lang a, mirethei leh hnuaihnung zawkte’n chhenfak awm leh zual zawka kan hman theih tura a chhuah beisei tlat ila !
