Admin note: Hel nilo thlalak kan lo tár palh. Hepa hi hel a ni lo.
Thawhtanni tlaia Manipur hel, Kangleipak Communist Party hruaitu pahnih man chungchang Vanglaini-in a report, Thawhlehnia chhuaka an thlalakah khan pakhat zawk chu hel a ni lo tih finfiah a ni a; hel ni anga an thlalak tarlan hi police-te’n Vanglaini palai an kawhhmuh dik loh vang a ni.
KCP Chairman, Laisram Ranjit Singh nen an ding dun lai thla lak a nih dawn hian police-te’n Maorem Anand Singh zawk chu lock-up atanga la chhuak loin, rinhlelh thila hel ruala an man mi pakhat an hruai chhuak a, Ranjit Singh nen hian dintirin, Vanglaini palai chuan an thla a la a ni. Thlalak tar sual palhah Vanglaini-in ngaihdam a dil e.
Mizoram Police, Manipur Police leh India sipai 47th. Mountain Division-te tangkawp chuan Thawhtanni tlai khan Bawngkawnah Manipur hel pawl, Kangleipak Communist Party (MC) hruaitu pahnih an man.
Police leh sipaite hian Thawhtanni tlai khan Bawngkawna Red Rose-ah mi pariat an man a, chung zinga pahnih – Laisram Ranjit Singh (36), s/o. Laisream Achowbi, Yurembem Awang Leikai, Imphal West leh, Maorem Anand Singh (28), s/o H Dilsun Singh, Patsei, Imphal West-te chu KCP(MC) hel pawl mi leh sa an ni tih finfiah a ni. Bawngkawn Police Station atanga thu dawn danin, Laisram Ranjit Singh hi KCP (MC)-ah hian chairman niin, tunah hian Bawngkawnah a khawsa niin a insawi a, Manipur-ah thubuai pali vel a nei mek a ni.
Maorem Anand Singh hi an pawla Project Officer a ni a, Aizawlah kum 2007 atang khan mi in luahin a awm tawh a, Manipur-ah thubuai pakhat a nei mek. Manipur hel pawl mite hi Manipur Police leh Mountain Division sipaite’n Manipur atangin an rawn chhui thla tawh a, Mizoram Police-te nen tang tlangin an man ta a ni. An pahnih hian nimin khan Mizoram Police-te chuan thu zawhfiah atan kawl zui Court-ah an dil a, an la kawl deuh rih rin a ni.
vanglaini.org
