Mizoram State Central Library hmalakna leh thahnemngaihna avangin Mizoram chhungah Library awmze nei tak tak kan nei chho zel a, a lawmawm khawp mai. Raja Rammohan Roy Library Foundation (RRRLF) Kolkata te nen an thawh ho hnu phei hi chuan hma kan sawn nasa hle, a bik takin vengchhunga YMA Library ten kan hlawkpui tak zet. RRRLF hian Mizoram State Central Library kaltlang hian heng vengchhung library tan hian furniture, lehkhabu te bakah a sakna tur tanpuina an rawn pe thin a.
Zoram mipui-te kan vannei tak zet ani. Kum hlui khan RRRLF hian Mizoram State Central Library kaltlang bawkin heng Children’s Section, Women’s Section dinna atan hian tanpuina an sem leh theihthu an rawn sawi a. Dilna format mumal tak siamin heng section siam nan hian ruahhmanna mumal tak an duh tih an format atang hian a chiang reng; entirnan ‘Proposed Area for Children’s Section/ Women’s Section tih te, tin , dawhkan (reading table) dah tur zat te an rawn bithliah vek a.
Heng, an duh ang thlap hmunawl (space ) library awmsa ah neih a ngaih mai bakah naupang leh hmeichhe library tlawh thinte zat atanga chhut a dil theih anih thu an tarlang chiang viau a.
Tichuan, Mizoram State Central Library chuan awm hmun atangin Library a duhsak leh phu a tih deuh deuhte (abikin YMA Branch ) engemaw zah a thlanga. Dilna form-te pe chhuakin ‘Nangni Br. chuan hei hi dil rawh u. Nangni chu heihi..’ tiin duh an lo thlansak hmiah hmiah a. An fel khawp mai. Mahse form-a inziak leh min phut ang chu Branch engemawzat chuan kan tlin lo nghal pang maia. Dawt te kan ziak dawn anih ngawt lo chuan.
Kei pawh chu kan Br. Library i/c te ka nih angin form chu kan la ve mai bawka,. Mahse, a scheme duh ang chu kan tlin dawn lo nasa tih hriain, form min pechhuaktu hnenah chuan ka sawia. Kan dil ve lo mai ang, a pawisa chu it awm viau mahse dawt report ziah a ngai hnem e mai ka ti a. Mahse hei hi ka thawhpuite leh midangte rilru alo ni ve hauh lova, mi a leh thahnem ngailo nih ka hlawh ta ringawta Commtt. hmaah phei chuan in ti fel nih chiah ka hlawh a, min nuihzat tep zawk a ni. Mahse he dilna hi chu kei chuan ka ngaituah zui ta lova, tin kumin chuan Library i/c atan min ruat tawh bawk lo.
YMA-a phusa ber te pawhin sum avanga dawt sawi mai kan hre dawnlo anih chuan??? Electric Br. YMA chuan an sum hmuh hi diktakin an hmanga Library (Children’s Section )tha tak hmanni khan an hawn thu ka lo hria. Fak an phu. Midang dilve te kha enge an an zel ka hre rih lo. Tin, kan Br. chuan an hmuh tak pawh ka la hre lo.
Sum hmuhna tur anih chuan dawt sawi kan lo hreh reng reng lo. Aizawl khawpui laili ber pawh slum area nih tir kan hreh loh kha maw, khawsa thei tak pawhin BPL-a inziah luh kan hreh loh thin kha maw. A huho chuan Eiru kan hua mahse eiru thei dinhmunah kan din chuan kan sawi mam thei zel. Eiruk hi kan haw tak tak lo, midang eiru hi kan thik mai niin ka hre thin. Hawh u keini MiSual ho hi chuan kan Mizo zemawi leh rinawmna hi sum a pawh sawn theiin i siam ve lovang u . Ka ti duah thina min lo hethiam r’u. A ngaihnawm loh mahse a pawimawh.
