City Bus Conductor Thawkrim : A hmêl lan dànah ngawt pawh mi thawk rim a ni tih a hriat—a hmai pangkhingah pawh a veilam kher kher chu a chàt khir bìk niin a lang. Thlasik ni sâin a em ùt deuh ni fahmiang! A sam khuih bari pawhin awmzia a nei thei lo. Amâ hnaah a tùl hle ringawt. Ni tin a feh chhuak a, chhûngkua a chàwm ve e.
A passenger-te tihlàwm kim sèn an ni lo mai thei; engpawh ni se, theihpatàwpin zîng ni-chhuah atanga tlai ni tlàk thlengin Ngaizèl leh Zèmabàwk a kàrtawn thìn. Bus neitu, a inhlawhfàknate nèn eng ang meuhvin nge an inlaichìn erawh chu—hriat phàk bàk ni thung ta se.
Ni tina a sum làkluh leh pèk chhuah : He Bus Conductor hian a dul zàwnah iptè a awrh fual a, ip âng hawkin pawisa note leh coins a hnawh lùt burh thìn. Pawisa a dàwn zînga NOTE tlang hrawl zual kìrlèt nân hèng note pahnih leh an rualpui dangte chu hi rim takin a hmang tangkai thìn. Note tharlâm a pe chhuak phal vak lo.
A hlut tawh loh hmèl : Han thlèk chian chet chet pawhin, dàwn duh loh hial àwm amawi! Mahse, dawn loh theih si loh an ni tlat! En chian lehzual pawhin, Myanmar KYAT an ni lo; Bangladesh TAKA emaw, US DOLLAR Note emaw pawh an ni bawk hek lo. India ramah nà na na chuan AWMZE NEIA HLUTNA nei an la ni ta fàn! Chhûngkaw tam takin an inkawl chhàwk tawh a, an dimdawi a, an pem leh hliam tharah oliv-hriak èm hnawih kher lo mah se, Cellotape/Transparent Tape erawh chu he Chêng 5 Note hian Chêng Nga man aia tam hùin a inbel khawng tawh a ni tih zawng kan hai lo a nih hi! Ni thlàr zâwnga thlìr ngial a ngai lo letling tawh zàwk!
A teihawi phàkna area a zîm telh telh : Chêng Nga leh Chêng Khat Notes-te hian hausa leh awmtheite in chhûngkhur a lùt ngai tawh lo a ni ber e. An teihawina bial chu rethei tè tè te kutah a ni tawh thung a. Ràngkachak zungbun leh Diamond thi awrhten hèng Notes hmêlhmang hi an la hmu ngai lo hial pawhin a rinawm a, khawih pawh an khawih ten hial ang! Eirùkna kutfai hian hetiang note bàltawp tak hi zungtang hmâwra chil hnawm meuhvin an chhiar ve tawh ngai lo! An thàr-tìrhte kha chuan Restaurant changkàng leh Hotel-ah pawh mi hausate wallet atanga phih chhuah chu an lo hlawh ve thìn fo chuan a rinawm. An hmèlhmang a lo chuai ve tial tial a, tihnawmnah an nih bìk vàng pawh a ni hran chuang lo. Mamawhtute laka an inpèk nasat vàng chauh a ni zàwk. Tùn dinhmunah erawh chuan—an nihna ngai ang kha engemaw chenah an phàk meuh tawh lo va, an hlutna erawh a la chuai chuang lo. An lo tangkai tawhna zawng zawng tuma’n a chipchiara sawichhuahsak emaw pawh an tum tawh bawk si lo.
Fiamthu Thawh nân : “Pawisa Note zawr bàl deuh, cellotape-a an bel khah lûk hi sàptawngin engtin nge an tih?” tia zawhna paw-tawk an inzàwt châwk—a chhâng fing thiam zual deuhte’n, “Bus Fare” an tiel mai mai thiam bawk. A sipel duhtui pha lo leh hre lote’n, “Bus FAIR” an tizak chuang bawk hek lo! An diriam hrim hrim tho. Mahse, he Chêng 5 leh Chêng 1 NOTE-te hian an hlutna an la vawng nung ve fan fan zàwng a nih si hi! An rinawm pângngai rengin tu tân pawh an la rinawm! Puih ngaite puih an nih theih nân an la inhmang zui hnial lo.
Eng ang pawhin retheiin—mite ngaihsàn loh pawh ni rawh ì—kan hlutna erawh hi chu vawng tha ve khiau ila. Mi tâna kan tangkaina hloh lovin, kan hlutna a chhiat dâwna ai chuan, theihpatàwpa kan inchèrkhawng ve chu a ngai tih hèng NOTES atangte hian inzir harh ila!
An hnàwl miau si : Taxi Fare atân chuan hnàwl a ni chiang tawh a; Bank lama deposit atân pawh an iai lam hret chu a ni ta! Counterfeit Notes lakah erawh chuan la hlu làwtlak an ni thung! Hèng notes-te hian fake notes luahlan tumin fin-kherek an thawh chuang ngai lo. Anmahni an infak hliak ngai chuang hek lo. An dik èm èmna hian a la tihlù rih mai a ni! Tripura leh Bagha Bazaar leh Aizâwl khawi’maw Vêng kilkhàwr atanga siamchawp an nih lohna hi an chhuantlàk thung.
An experience ropui : An luhna leh chhuahna wallet zawng zawng hi sawi chiang ve thei ni se, ngaihnawm tham a awm chiang ang. An hlutna an iai dàn deuhte pawh lungchhiatthlàk tak tak sawi tùr an ngah ang. Biak In thawhlàwm atâna an iai thìn zia pawh mittui sênga sawi tùr a nei ve mai thei asin! Chutiang atân ngat phei chuan Re 1 Note zàwk khian duhsak a la hlawh zàwk mai thei! Zu man leh thihpui tham contraband man atâna hmantlàk an nih tawh loh dànte pawh lungchhe hahîpa sawi tùr an neih a rinawm ve tho. Iai lova anmahni pawm duhtute chanchin, dimdawi lehzuala an enkawl dàn pawh chanchin ngaihnawm an ngah viau mai ta lo’ng!
Amah aia tharlâm Pawisa Lem : Pawisa lem (fake notes) pawhin hriatchhuah a nih hmâ chuan thil tam tak a lei ve pap pap thei tho; man-chhuah an nih chiahin, an lo tangkai tawhna chhuichhuahsèn ni tawh chuang lo mah se, hman zui leh tùr erawh chuan FAKE NOTES chuan an tuar ve tawh mai dâwn a. An hlutna chawpin, thàwklehkhatah, an boral dùn tawh ang.
Dikna nge ngein a hneh lèt thìn : A dik erawh chu hmêl lan nalh loh chângte’n delh bet reng thìn mah se—a dikna leh a hlutna a pângngai reng tho va. Hèk thlàk emaw, sìt hlen theih ngawt a ni chuang lo. Pawisa-Lemin a inchhuankhum ngam bawk hek lo’ng e! Kan pawisa note zawr tak te atang hian mahni chanchin theuh kan inzir chiang thei vekin a rinawm!
Engnge i ngaih ve dàn chiah le?
Owner : Lushai Chhokra treasures these notes since 2002 — (Mizo hmeichhia Manui Kâwlnî leh Jenny Sailo hriat reng pah ve nân hrim hrim).
Similar Posts:
- Aizawl ah One Million US Dollar Bill/Note
- Pawisa chhia thleng duh tan!
- LEIKAPUI Style/Music
- Hlutna engemaw tal i nei
- Pawisa note lem engtin nge i hriat theih ang?
March 30th, 2010 at 9:04 am
I cheng nga sermon chu avan ngaihnawm teh hrep vele
good post hairehai
Report this comment
March 30th, 2010 at 9:11 am
Aizawl/Mizoram hi pawisa nawi rs 1-5 thir hi a vang thei. Bank ah duh tawk in a thleng theih loh emaw ni?
Report this comment
March 30th, 2010 at 9:21 am
Keichu cheng khat leh cheng hnih thir an ti inang lutuk hi a ninawm ka ti. Bih deuh kher a ngai hi a buaithlak, kutzungtang pahnih nge pakhat tih en kher ngaih loh lai kha a tha zawk mahin ka hria…
E, taka, pawisa sawi takah chuan British bo pawisa thir thar khu a nalh khawp mai. A remkhawm theih.
Han en ve chhin teh u.
https://upload.wikimedia.org/wi.....e_2008.jpg
Report this comment
March 30th, 2010 at 9:40 am
Puan phei khawk thui pawh nise,sweeper pawh nise, mahni hnathawhna ah rinawm leh taima taka kan thawh hian a Pathian thu ani. (Work is worship.
Khawvel ah lungawina awm lo, kan neih a tlem emaw, a tam emaw, mahni chan tawka lungawi thiam thei hi mi vannei kan ni mai. (Man wants never cease).
Sipai general kawr hma a medal tar teuh ai chuan, indona a hliam tuar sipai naran biang leh kuta SER kha a zah awm zawk. Eiru car nalh tak, in ropui tak ai chuan, rim taka thawk thingtlang pa kut pawr leh thap tak hi a zah awm zawk e.
Lal fapa biang puar thau sen no tuk ai chuan Trown Bus kawndaktawr biang vei lam chat so luai khi Lpi tan chuan a mawi zawk ngei ang.
Report this comment
March 30th, 2010 at 9:56 am
Hotupa chu va hlap ngaihnawm dap2 ve! Cheng 5 water proof te pawh kan neih thin kha mawle… Lunglenthlak e!
Report this comment
March 30th, 2010 at 10:17 am
Aryan….piggy bankah kan khol zel alom coins ho chu
Ziak ngaihnawm thiam khop mai
Report this comment
March 30th, 2010 at 10:27 am
A sei fu nain chhiar a kal zuih mai, a ngaihnawmin zirtir a nei tha bawk.
Hetiang pawisa zawr tawhho hi bus conductor ho hian an dawng zingin an pe chhuak zing ber awm tak asin maw le! Tun hma deuh khan fiamthu-in stonewash note kan ti mai thin.
Report this comment
March 30th, 2010 at 10:29 am
Plastic bank note issue kha an sawi thuakin ka hria a, kan va hmu har ve. Paper note hi chu a jor hma riau.
Report this comment
March 30th, 2010 at 10:30 am
“Fak hlawh lo val rual” tih Article te pawh min ngaihtuah chhuah tir rum rum mai a. Hetiang a post tha hi chu a vang ang, a thu kal phung a tha a, thu kau chheh leh tawng chhepchher hman hun a hria, a lawm awm e… min ti phuisui. dahthat tlak a ni. Thanks chawnghilh.
Report this comment
March 30th, 2010 at 10:56 am
Ka chhiarchhuak parh. Chhiar a nuam.
Report this comment
March 30th, 2010 at 11:32 am
ava ngaihnawm ve le. chawnghilh nge nge eng field-ah pawh hian a striker chu i lo ni ber e. A chang chang a kawm zeuh zeuhah i duhawm viau mai. A chhun zan zawm a i thu leh hla ngaihthlak erawh chuan, ka hmang tangkai seng dawn loh bakah, a chhinchhiah seng dawn lo a, a uihawm mai maiin ka ring :lol:
Tunhma deuh Shillong a lehkha ka zir ve lai hun khan pawisa note hi an han duh uluk thei em em khawp a, a sir a hang zeuh te pawh kha ‘kong’ nu ho khan an dawng duhlo thin a, a va han buaithlak thei tak. Tuna i Rs 5/- note phei khi chu mau (Bamboo !) sei tawk pawh in an hawlh duh ka ring lo. Pawisa note zawr deuh hi chu dawng kual zel ila, thul mawng a dahthat tur a ni chuang lo a, kan hlim tlang ber in ka ring.
Report this comment
March 30th, 2010 at 12:37 pm
Thil ho deuh poh hi thiam taka an han soi hi chuan a ngaihnawm ve thei phian zêl tho mai a nih hi. Thil hlu deuh poh hi ho deuh te hian an ti hlu mai a lo ni a.
Report this comment
March 30th, 2010 at 1:06 pm
Pu chawnghilh-a chu sapramah rei tak i awm tawh a, amaherawhchu i thu ziak thin/comment thin reng reng ka chhiar hian i thinlung lairilah hian he Zoram hi a cham reng thin niin ka hria. I mumangah pawh Aizawl Town Bus ( City Bus nilo) te leh Aizawl leh Zoram hmun hrang hrang kha i hmuh ngun ber tur a la ni foin ka hria.
Thu i ziak thiam khawp mai.
Ka pizawn hi thil khawl thei tak mai a ni a, cheng khat note clip tharvar hi a kawltha reng nia, a hmangphal der lo!!!
Report this comment
March 30th, 2010 at 1:14 pm
Bank-ah thleng mai theih, hetiang hi chu….. Pawisa lem hi chu Bank-ah kalpui chi a ni hauh lo… Nun lem leh tak pawh kan zinuk hlawm a nih hi, hriat hran har tak, Buh lem pawh a tawp thlengin an to-za a nih kha maw le…. Khawvel zia ni ve pahkhat alomz…
Report this comment
March 30th, 2010 at 1:24 pm
Keinin ngaihtuah zui nachang pawh hre lo va kan en liam mai mai thin hetiang pawisa note zawr lutuk atanga sermon ropui tak mai han chhawp chhuak thiam chu Pu chawnghilh bak tumah an awm lo vang! Sum lamah chang lo pawh, ngaihtuahna thinlung lamah pawh hian hausa saa piang hi zawng an awm a nih hi! A ropuiin chhiar a nuam dup dup hle mai!
Report this comment
March 30th, 2010 at 1:29 pm
Vawi thum ngawt ka chhiar chhuak :!: A ziaktu ril zia ka hmu thiam ve ruai ruai ni ber in ka hria.
Report this comment
March 30th, 2010 at 1:44 pm
Hetiang thuziak hi ani maw sap hoin ‘Read between the lines’ an lo tih thin ni . A ril raih raih hle mai, Pu Chawnghilh.
Report this comment
March 30th, 2010 at 1:48 pm
Kan thiampuipa Chawnghilha a rawn che ve ta. A va han ngaihnawm dup dup mai em. A thu kal lam leh haw lam a inpha man tha hle.
@Chawnghilh: A aia tha leh ngaihnawm lo post zel teh. Rs 5 note hlui, hman hleih theih tawh loh tur khawpa zawr tawh pawh i rawn tuaihnum leh thei anih ngai chuan a aia thu ngaihnawm zawk i pai teuh ang tih ka hria. A aia ngaihnawm dang beiseiin ka thlir reng e.
Report this comment
March 30th, 2010 at 3:51 pm
Phoren a awm ho khan Cheng Sawm coin thar pawh hi in la hmu lavang a.
https://img142.imageshack.us/im.....10thar.jpg
Report this comment
March 30th, 2010 at 3:58 pm
Cheng 10 coins ka en tui a luatah ni lo loah kan comment chu a…
Report this comment
March 30th, 2010 at 4:40 pm
A van ngaihnom tak ani a sei hle nain ka chhiar chhuak dap mai……Isua nun nen poh tehkhin theih hialin i ron ziak thiam a a tha e…a hringnun ruih mai a…..i soi nasa lutuk a rs 5 khi ka khongaih zo vek alom le….
Report this comment
March 30th, 2010 at 5:26 pm
In comment a bengvarthlak daih zawk. Thil thar tam tak ka hmuh phak loh in rawn chhek belh nasa hle, ka va lawm em!
Last Saturday khan Mizo-thianpa inah ka leng a. Roh deuhvin khing NOTES khi a lo nei a.
“Sap nial nual, vai nial nualna” hian Zofa tam takte hi min run nasa ta a. Kei ngei pawh hi min run nasa a. Mahse, “Mizo nun mawi kimchang” hai lo paukhauh tam zawk ka la hmuh avanga ziah chakna thinlung min petu pawisa NOTE zawr lutuk hi ka va chhar chhuak a ni.
Hetiang NOTE ZAWR-CHHIA-in a thlen phak miah loh chhungkaw rethei hi kan la ngah em em tho hian a lang tlat! Engtin nge maw ni zel dawn le?
Mizo chawhmeh bai, tlak, sawhbawl duh ngawt hi Mizo-na a ni lo va, Zo nun mawi nei tel tura infuih hi a hun hlea ka hriat vanga rawn puan-ngo zawh ve zuai ka ni e.
Report this comment
March 30th, 2010 at 6:28 pm
Pawisa note zawr tak a RBI governor in “I Promise to pay the bearer…” tih a sign hnan a, hlui tawh mahse a la hlu reng tho ang hian keini pawh kan hring nun taksa hi cellotape mai ni lo,plaster of paris a in bel khawm pawh nise,chunglam chuan “I promise” alo tih miau a vangin kan hlutna kan la hlouh lo ve :!:
chawnghilh,thangthar ten hmantlakloh,belkhawm mai,Bus fare tawk vel lek pawh min lo ti mahse,misual hlutna hi chu a la bo lo a ni tih min hrilh var kuar mai…Thanks.
Report this comment
March 30th, 2010 at 10:57 pm
In cheng sawm coin chu helam nen an tih vel dan a in ang deuh a nih kha .Keiniah chuan cheng 10 te cheng 5te cheng 2 leh cheng 1 leh a hnuai lam hi chu coin veks.Note chu cheng 20 hei hi plastic type deuh chhe theilo kang thei lo ani ber mai dawt leh chu 50 100 200 an ni mai .
Report this comment
March 31st, 2010 at 4:42 am
chawnghilh, keipawh hlui ve deuh hlek chu ka nei asin
https://i40.tinypic.com/73e1xt.jpg
Ka coin hman bang te…
https://i41.tinypic.com/ev6jo8.jpg
Report this comment