‘Mihring nun chu chhum rei lo te a lo langa, ral leh ang hi a ni’
Nausen lo piang chuan enge a tih theih hmasak ber? A chhanna tawi ber chu ‘TAH’ a ni. Nia, kan lo piang a, khawvel eng kan rawn hmuh hmasak berah ‘Tah’ in hma a hruai a. Khawvel chhuah sana mual kan liam ni pawhin tapin a ni kan inthen thin ni, Khawvel anchhe dawnga kan lo pian hian tahna in hma a hruai a, tahna bawk in khawvel kan hmang tawp leh ta a nih chu. Khawvel hrehawmna leh buaina, tah leh lungngaihnaa khatah hian lo piang lo law law ila tha tur, kan lo piang laklawh tawh si a. Chhiartu ngei pawh hian I chhut chiang ngai em aw? Hlimna rei lote umin kan dam chhung rei lote chu kan hmang ral dawn a nih hi!! Hah thlak thin!!
Nausen chu a lo thang lian a, nikhua a lo hre chho zel a, mahni hmasialin a khat a. Duhamna leh neih belh zel duhna, tuma zirtir hauh lohvin a hre nghal mai a. Ni, kan nitin nunah hian duhamna leh neih belh zel duhnain kan khawt hlawm zawng a nih hi. Mihring hi duhamnain khat tlat lo ila chuan, khawvelah hian remna leh inhmangaih tawnna in ro a rel anga, initsiknate leh inhuatnate hi a awm lovang. Duhamna leh itsiknaakhat tlat, neih belh zel duhna rilru kan put avangin a lawm, U.S.A. leh Russia sorkarte pawh hi an inngeih theih hlek loh; an thil thiam tharte chu inlawmpui tak aruangin initsikna leh elrelna, inhuatna chauh thlentu a ni zel a. Ram neih belh zel duhna leh Ram hausa nih duh na rilruin an khat tlat a. Chu an kawng zawh chuan indal tawnna lian tak a siam a. Tan rual ahnekin an inhaw tlat a. Chu chuan khawvel muanna pawh hi an tiderthawng zo ta a nih hi!!
Kan ram ( ZORAM ) chhungah ngei pawh hian duhamnain ro a rel a. Tute emaw lo vannei deuhte chu kan itsik a. lawmpui tak aruangin kan sawi chhe nghal a. Lal tura duh taka kan thlante pawh hi hun rei lo te ah kan haw leh a, kan sawi chhia a. Sorkarin ram hmasawna tura pawisa a rawn thawhte chu mahnia neih zawh vek duhna leh chakna a lo lian a. Chu chuan eiruk leh mualphona min thlen ta thin a ni. Thenawmte compound nek ranin In kan sa a. Chu mai chu duh tawk lovin compound hungna pal ban tak ngial pawh thenawmte ram chhung lama phun kan tum talh ta zawng a nih hlawm hi. ‘Kei chuan nei im em ila, duh leh thenawmte chu lo rethei deuh mai rawh se’ tih duhna rilru hlirin kan khawt ta hlawm zawng a nih hi!!
Kan sakhaw rawngbawltute zingah pawh hian chutiang duhamna chuan ro a rel mek a, langtheilo lam atangin eiruk dan kan thiam a. Pathianni ah sual khuhna atan Bible leh Hlabu kan zakzeh a. Mahni bakah kan mihring puite kan bum a. mahni hma kan sial lutuk na lamah Beram-ten kawng kan bova, kawng dik lo kan zawh a; hei vang hian a lawm, tun laia ( Ka tawng tun lo ngai haw lo hram se ) ‘Pawlchhuak’ kan tam tak em em ni.
Kan ram hruaitute (Politician) lah hi Lalna chauh duhin ram rawng kan bawl a. In bumna leh intihdernain, mahni tana tha tur hre ranin ram kan hmangaiha. Policy tha pui pui kan zam a. A taka thawh leh hmuh tur awm hlawm mang si lo. Ram hmasawn chu harsa duh awm mange. Ni, HRING NUN kawng hi a lo CHHUK CHHO em a ni.
Chungleng savate chuan buh an tuh lova, an at hek lo, mahse a siamtu chuan an ni tin nunna atana pawimawh eitur chu a pe tho mai. Mihring fate zawng Eden huan bawhchhiatna avang khan vawiin ni thleng hian kan la tuar a nih hi.
Hlimna zawngin kan tlan a; a umin kan um a, a chuhin kan chuh a; hlimna tak tak min pe thei khawvelah hian a awm si lo. Khawvela I awm chhung hian eng ni ber hi nge I hlim ni ber? tiin inzawt ta hlawm ila, kan chhan duh dan a hrang nuaih hlawmin ka ring. Tamtak chuan NUPUI / PASAL kan neih ni hi kan hlim ni berah kan chhal hlawm awm e. Chu chu a dik thawkhat mai thei.
Ni e, kan nulat tlangval mawina zawng zawng a tawp hun leh nghakhlel taka kan lo thlir thin, duh thusam leh chakna zawng zawng a kianna ni, mihring nun bul kan tanna hun leh dam lai ni chhiarna bul intanna leh hriat reng tlak, kan ropui ber ni leh hmangaih leh duh berte nena tisa pumkhat kan lo nihna hi a ropui a ni.
Mahse han dawn chiang teh; Pindan atanga nghakhlel taka inneih dar ri kan nghahte chu, dam chhung a chhuak leh tawh lo tura kan tanna, nulat tlangval mawina zawng zawng vui liama a awm tanna tur lungngaih dar ri a nih chu!! Pastor, inneih thu tiam min chham tirtu pawh chuan kum khuaa chhuak leh ngai tawh lo tur Jail-a min hnuh luhna tur thutiam min chham tir ta a nih chu. Kohhran upa, fuihna thu sawitu pawh chu kan saltanna tura kan thu tiam nemngheh nana rawn tuihnihtu a nih chu!!
Rei lote-ah mizia kan inhre chiang a. Tuk zan tha a awm tawh lo. Kan inchhung chu inhauhna In, Lungngaihna Jail mai a lo chang ta. Fanau kan han neih a an hrisel lo nen, pa berin karkhat tla dawn lai tur, ration lakna te lek lek, zankhat thil thuah Office hawn pahin a khulh fai vek bawk si. Hma lam hun dawn changin thim hlir thim hlir!! Thingtlangah lah buh khawp tur kan thlo chhuak thei tawh si lo. Khawpuiah lah chuan mi in luah hawh lawr tur leh nitin eitur zawnga inhlawhfa chawp ngawt tur tan chuan khawsak a lo harsa tawh si a. Lungngaihna hlir Lungngaihna hlirin khawvel hi a khat emaw tih a awl thin.
Hausa ten neih belh zel duhnain khawvelah an hun zawng zawng an hmang zova, rethei lahin chuti bawk; chan tawka lungawi thei reng kan awm lova. Hausa te hi an rilru hahna a te lova, rethei rilru hahna pawh hi a nep chuang lo. Hlimna kan zawnga, kan hmu si lo. Lawman kan zawnga kan hmu chuang bawk si lo. MIHRING NUN KAWNG CHHUK CHHO TAK mai hi chhiartu duh tak, I zawh chhuak dawn reng reng a. MITIN MAI HI CHAN TAWKAH LUNGAWI THEI theuh ila chuan, Leihring nun hi a hlim thei dawn chauh a lo ni.
