Ka fa duhtak,
I manganna leh lungngaihna te min rawn thlen thin zawng zawng hi ka lo hre vek a ni tih ka hrilh duh che a. “Pathianin ka tawngtaina a chhang lo” tia i phun chang te hian kei chuan i tawngtaina chhan loh ka nei ngai lo tih ka hriattir duh che a ni; ka chhanna che erawh i beisei leh duh ang ni vek kher lovin nangma thatna tur zawkin a ni thin.
Mahni inkhawngaih leh midangte aia chanchhe bik ni a i inhriat chang te hian ka laka i pawimawhna leh hlutzia hi lo hrechiang thin tawh la ka duh a ni. Tihpalh thil thuin he khawvelah hian i rawn piang a ni lova, he khawvela i lo pianna tur hi i thlahtute hun lai daih tawh atanga ka duan a ni.
He khawvel mi maktaduai tam tak zingah hian nangmah ang reng reng hi an la piang lova, an piang leh tawh bawk hek lovang; duh tak leh uluk taka ka din i ni si a. Kei chuan i sam zai zat nen lam ka hria che a, i ruh chuktuah leh i taksa a cell awm zawng zawng te hi hmaih hauh lovin ka hre vek a, hetiang taka famkim leh maka siam i nih hi i pachhiat ber lai pawhin theihngilh lo la ka duh a ni.
Ka hmangaih leh duh em che avang hian engtik lai mahin ka kalsan ngai lo che tih hi hre reng la, min koh apianga chhang tur chein i bulah ka awm reng a, ka awm reng bawk ang. Zing i thawh hun atanga i mut leh thleng leh, i muthilh bawrh bawrh laite hian ka awmpui rengin ka veng reng thin che a, ka hriatpui loh thil i chungah hian engmah a thleng ngai lo tih hi lo hria la.
Hun tam taka i buai avanga nilenga vawi khat pawh min be lova hun i hman chang te, min haider luih a min biak duh loh chang pawh hian kei chuan i bula awm ka thulh ngai chuang lo. Dawhthei takin ka enkawl che a, ka lak atanga i tlan tauh chang pawhin i lo kir hun tur nghakhlel takin ka thlir reng thin.
Dawngdahna leh thatchiatna hian nang leh keia kan inkungkaihna a tichhe fo thin a, chuvangin kawng engkimah taimak chhuah thin la ka duh khawp mai.
Nangmaha ka lawmna ni fo thin chu midangte tanpui thin hi a ni. Hetianga mite i tanpuina zawng zawngte hi hmaih hauh lovin ka chhinchhiah vek a, a let tam takin ka rul dawn che a ni.
A tawp berah chuan hetiang taka hmangaihtu che Pa i nei a ni tih hi engtiklai mahin theihnghilh suh la, he ka dawhtheihna neih ang pawh hi nei ve la ka duh khawp mai. Ka chhuang em em che a, midang tana malsawmna thlentu nih i lo tum zel dawn nia.
I tan chauh,
Isua Krista
