Kan hriat angin tun hnaihah Aizawlah pawngsual avangin Hnamdang Curfew an/kan han puang a nih kha. A tha ka tih rual rualin, kan ngaihtuah chiang a, a thatlohna a tam zawk em ni aw? Kan hmalak dan leh sual kan do dan, sual duhlohna kan lantir dan hi tih danglam a hun tawh lo maw aw? tih ka ngaihtuah neuh neuh a. Kha thilsual tih avanga tuartute an lainatawm a, a titu lah a ngeiawm a, a huatthlalaawm em em a ni. Chutih laiin ‘Hnamdang Curfew’ han tih kher khan eng angin nge sawtna a neih ang tih ka ngaituah a…!
Hei hi ka ngaihtuahna min siamtu chu a ni, kuhva/kuva ka lei dawn a, ‘Panhnah a awm lova’ tiin dawr neitute chuan min lo hrilh a. Kei chuan ngaihtuah mang lovin, ‘Ngatinge panhnah awm lo an lo tih zel mai’ kan ti ngawt a. Dawr neitu chuan, ‘I hre nange Vai Curfew puan vang mawle’ a ti a. Ka rilru chuan ni 2/1 pawh a la liam si lo, kan lo va intodelh lo ve le, hetiang ni rei loteah pawh kan buai chu a ni mai si a, chu pawh Aizawl khawpuiah chauh leh nghal. Ka ngaihtuah lem loh thil dangah pawh buaina tam tak a lo awm dawn a nih chu…. ka ti rilru ta a.
Ka sawi ang khan, an curfew puanna chhan pawh a âwm hliah hliah chu ka ti a, pawi pawh ka ti. Mahsela sual kan duh lohna, kan hailan dân erawh thlâk danglam deuh a ngai niin a lang, a chhan chu siamchhuah, laihchhuah, intodelh nei lo kan ni si a, a tuar lehtu chu keimahni bawk kan ni si. Mahni inhrem/ mahni mawng hlim mai kan ni leh si. Hetiang lo thlen hian rilru fim takin NGOs te hian ngaihtuah ngun thin se, phur hluta BAND/ STRIKE/ CURFEW han puan te hi a finthlak ber em aw…!
Hetiang a lo thlen hian engtianga hma han lak chi nge niang tih pawh hriatthiam a har hle mai, hnamdang an nih avanga hnamdang huatna hrim hrim mizote rilrua intuhsak tum niâwm taka ‘Chi leh chi inthliar zawnga hma lak‘ hi chu Kristiante tih atan pawh a mawi lem lovem aw…. tihte thlengin ka ngaihtuah a. Tupawhin hetiang sual hi chu kan hua alawm, hnamdang pawhin an duh lo hle ang tih chu hriatthiampui ila, an mahni nunna derthawnna tur leh Mizo zinga an tlaktlum lohna tur thil thleng tur hi hre lâwk se chuan, kha misual pa pawh kha an tuai ve hlek duh chuan ka ring tho mai.
Engpawh nise, he thil atang ringawt pawh hian zir tur kan nei a, tih tur kan la neih tamzia te, hnamdangte laka hmai uang turin kan tling tawk lova, chumi ti turin mawhphurhna kan neih nasatzia te hrehchhuak ila. Kan hmalak dan kalphungte thlirin, kan nun zahawmlohna tizahawm tur leh hnamdangin min zuam lohna tur leh min zah/hlauhna tura kan hmabak inrhilh hriat kawngah te hian tih tur kan la nei tam hlê a ni tih hria ila, a va tha dawn em….. tih ka ngaihtuah zui mai mai a.
Hetiang thil lo thleng thin hi engvang nge niang? Engtia hma lo lak chi nge? Engtin nge mawng hlim lova sual kan dona leh kan duh lohzia kan lantir tak ang, hetiang thleng tawh lo tur hian eng mawhphurhna nge kan neih tihte hi i han sawiho teh ang u.
NB:Misualte advise/ngaihdan fing tak tak han chhiar zui rawh le….
