Kan lo nghahhlelh em em Mizoramin India ram hmun hrang hranga technical seat kan neihtea zir tur thlanna exam result chu Higher & Technical Dept. chuan April ni 23 zan dar 12 bawr velah a tichhuak ta a. Kum dang zawng aia hmain result tihchhuah a ni a, thil tithei deuh tute emaw tan pawh inrawlhna hman awm lek lovin rang taka tih chhuah a ni hi a lawmawm hle. Zan lai dar12 vela Dept. office banga result tarchhuak thei awm chhun pawh kan ni hial ta ve ang! He article ah hian kawng hrang hrangin kha exam hrim hrim leh a kaihhnawih eng thil thil emaw kan hrut nawn leh dawn a ni.
Mizoram H & T entrance test kum thum (3) chhung bih chianna : Kum 2008 entrance exam-ah khan tun ang deuh chiah hian thil a thleng. Result chhuah vek tawh hnuah mark siam that leh a awm a, chu chuan rank thenkhat a tidanglam.
Nikum 2009-ah kha chuan a thlen dan a danglam deuh. Kan hriat vek angin room pakhata thute kha chu an zavaiin pawm loh (disqualified) vek an nih kha. Kha thu kha a chhuah rualin kha room-a thu naupang pakhat, pawl 12 pass a, BSc zawm lova kumtluana lo inbuatsaih char char, tlin inring em em si chu a thidang a, awmhmunah a sawp nghal hnawk mai a ni. Kumin 2010-ah pawh hetiang teh nuai hi kan lo ni leh ta a, kum 3 chhung chu a zawnin exam pawimawh lutukah tihsual a ni ta zat zat mai a nih hi. Thawktute inpekna a nasat a, a chhuanawm teh lul nen, a pawi tak zet a ni.
Kumin 2010 exam kha : Kum dang zawng aiin kumin chu exam an tam a, exam tum form fill up ringawt pawh mi 1536 lai an ni. Exam tak tak erawh chu mi 1490 vel an ni thung. Zawhna quality-ah nikum 2009 a tluk lo hle a; tin, zawhna thenkhat chu tihsual (a chhanna tur – option an pek zingah answer awm lo) a awm niin a lang bawk. Chemistry zawhna pakhatah chuan ‘Which one is not coloured?’ tiin a chhanna tura an pek zing atangin answer a awm lo. Chung zinga pakhat chu Se3+ tih a ni a, mahse hei hi ni lovin Sc3+ (hei hi rawng nei lo tur chu a nia) tihna a nih zawk a rinawm. Chemistry-ah chuan heng symbol te hian awmze hrang an nei vek a, hawrawp pakhat tihsual zeuhin a pawi thei hle.
Negative marking te, pawl 11 zirlaite, leh zawhna style dang – answer 1 aia tam awm chite, comprehension te, matrix matching te tel thei sela duhthusam a ni. Tuna kan exam dan kalphungah hi chuan thiam tak leh thiam lo tak pawhin result thumhmun deuh reng an nei thei tlat a ni. Negative marking awm sela, chu chuan risk a tingamawm loh anga, a thiam tak tak leh thiam lote a hriat hran theih viau ang. Answer 1 aia tam awm chiah hian a thiam tak tak leh thiam lem lote chu an hriat hran theih khawp mai bawk. Tunah hi chuan thiam tak tak lem lote tan chance a tha lutuk a, a thiam tak tak zawkte an khawngaihthlak lutukin ka hria.
Zirlaiten zawhna an hawn thei lo hi chu a tha lo hle. India ram hmun dang exam-ah zawhna hawn theih loh hi chu a tlem tawh hle. Tlangkam atanga kan lo hriat danin answer dik lo Dept. lamin a lo siam si ang a, chumi mil lo chuan dik zawkin mi dangin an lo siam bawk si ang a, sawibuaina a tam lutuk palh ang, sawi buai tur an awm tawh loh hun, a zir turte kal rem vek hnu September thlaah a la bang an pe chhuak thin an ti a ni awm e. Hei hi a nih tak tak chuan a zahthlak ngawt ang. Hetiang exam mai mai pawha mahni inring zo lo (tunlai thalai tawng takin Confi lo lutuk) an nih ngat chuan pawn lam atangin expert chah lut sela, zawhna siam leh answer thlengin tihtir vek sela a tha maiin a rinawm.
Result kha : Higher & Technical Dept. lam chuan exam tuk ni 23 tlai dar 4:30-ah result a chhuak ang chu an ti chiah lo naa, zirlaite leh mipui mimir tana ngaihbel theih tur tawk lekin result chu chhuak ngei turin a lang si a. Chuvangin tlai dar 4:30 vel atangin H & T Dept. Office Chaltlangah zirlaite result hriat tumin an pungkhawm tan a, an nghak ta tlauh tlauh mai a ni. Inchhung lamah thawktuten a hma thei ang bera tihchhuah tumin theih tawpin tan an la a, pawn lamah mi tam takin an nghak thup a ni tih hre chungin kamtu awm rengin hna an thawk a; tihsual palh pawh a awl viau ta ve ang.
Eng nge dik lo ta chu? Zan lai dar 12 vel a ni a, result chu tarchhuah a ni ta a. Thenkhat an lawm em em laiin a then tana tahna a ni thung a. Beisei sng tak, mahni chhanna atanga han inchhuta phu tawk aia hniam lutuk result neite tan erawh a lungchhiat thlakin a thinnatthlak khawp ang.
Kei ngei pawhin ngun takin result chu ka bih chiang ve nghal a, thil dik lo a awm a, kan la buai dawn chauh a ni tih ka hre nghal mai. Mathematics exam hauh si lote Engineering group-ah an lang ve nawlh a, chutiang thovin Biology exam lote pawh Doctor lamah an lang teh vung a! Hetianga lang naupang thenkhatte lah chuan an tihtlin loh palh an lo hlau ve em em lehnghal. Hetia thil inpawlhsawp a awm takah chuan thil awm thei leh ni ngei ngei tura lang chu result thenkhat kha chu a dik lo tawp ang tih hi a ni. Tlinga puan thenkhat kha chu an lo tling lo hial mai thei, chutiang thovin tling lo thenkhat kha chu an lo tling chiang hle thei tlat.
Virus chu: Khatia answer sheet-te an check zawh vek hnua an result siam tak tak a lo hun takah chuan Lecturer 200 rual an rawihte kha chuan an buaipui zui thiang ta lova. Confidential thil a nih tawh dawn avangin Dept. lama official tlemte 4/5 velte chauhvin an buaipui zui ta a. Subject hrang hranga an mark hmuhte chu computer-ah chhu lutin (Excel hman a ni) belh nghal zel a ni a. Chutia tluang taka an kal lai chuan thawk lehkhatah virus a rawn inlar ta tlat mai! Chu chuan result thenkhat a rawn khawih ta a, mark belh pawh a dik hlei thei ta lo a ni awm e.
Vawi hnih (2) lai chu tar chhuah tumin result chu an print chhin phawt a, virus hnathawh avang chuan thawktute ngaih a tha thei ngang lova tar lovin an pawt thla leh a, a vawi thumna-(3)ah an tar chhuak ngam ta chauh ni awm a ni. Hetia virus a rawn inlar tak hnu hian Engineer lam leh Doctor lam thenkhatte chu a inpawlh ta bawk a, an mark belh chhuah pawh a danglam ta nuk mai a ni. Virus hi a lo awm tak tak a nih si chuan tu tute nge a khawih danglamsak hriat dik chat chat a har tawh viauin a rinawm. Tling ngei ngei tura ngaih, mahni pawh inring tawk, thiante leh zirtirtute pawhin an rintawk tling ta si lo te, a then phei chu hming lang lo hrim hrimte pawh an awm ta a.
Chutih laiin thenkhat erawh engah mah a tling lovanga tih tur te pawh rawn tling ta tlat site an awm ta reng a ni. Hei vang hian H & T lam pawhin complain an dawnte tlawma la mai lovin ngun takin endik nawn leh se, danah chuan mark hmuh zata lungawi lo tih ringawt hi chu pawm theih a ni lo thin a nih pawhin tun tumah hi chuan a case a danglam bik avangin complain lut reng reng chu lo pawmin endik vek mai se la. Computer-a an chhut luh tawhsa atangin ni lovin naupangin an chhanna answer sheet an pek atang ngei khan ennawn leh sela a thain a lawmawm ngawt ang.
Tihsual thenkhat kan sawi takte bakah khian coaching lama kumtluana kan lo hrual tawh, result dik lo an nei ngei ang tih kan rin bik (thenkhat chauh) te an hming nen, an nihna kimchang takin ka rawn tarlang dawn a ni.
(1) F.Remthangpuii, Roll No. 0306, Rank 67, Mark = 176, Group-Medical : Ani hi nikum 2009 pawl 12 Board exam-a 9-na kha a ni a, Biology-ah phei chuan topper a ni nghe nghe. Pawl 12 a zir chhung zawng kan hnenah coaching a kal a, a zawh hnuin nikum atanga tun exam thleng khan full time-in coaching a kal chhunzawm leh. Vawi tam tak class test neihah a titha ber pawl (top 5) subject tinah a ni thin. Tun exam-ah pawh khan chiang taka thiam loh a neih chu Physics-ah 3 leh Chemistry-ah 5 chauh a ni. Tihsual neuh neuh dang a neihte nen chuan a pahnih mark belhkhawm 180 vel a beisei. Biology-ah chuan a tihthat vak loh avangin mark 70 vel chauh a beisei bawk.
Keini pawhin 1/2-na ni ngei ngei tura kan beisei a ni. Medical lama 1-19naah khan 8 & 17-na tih loh kha chu coaching lama kan naute vek an ni a, annihote nen khan kumtluanin room pakhatah thu hovin zirtirna thuhmun an dawng a, test tam berah chuan an tluk ngai lo. H & T exam a nih tak avanga tih chhiat thut thu awm suh. Heta mark 176 a hmuh hi Physics leh Chemistry chauha a mark hmuh, Biology tel lo niin a lang tlat. Physics leh Chemistry mark te hi eng group tan pawh compulsory a ni a, chuvangin 176 lai a lo hmu tawh tho si a, a mark pumpui (Biology telin) emaw tia lo ngaihthah palh mai a awl khawp ang.
(2) Zoremmawia, Roll No. 1446, Rank 45, Mark = 157, Group-Engineering : Ani pawh hi nikuma pawl 12 zo tawh, kum khat aia rei mah kan hnena coaching kal tawh a ni. Nikum entrance exam-ah pawh khan kan hnenah tho coaching a kal a, Engg. Grp-ah 11 na ni a, AIEEE hmanga NIT-a luh a duh si avangin a seat hmuh pawh chu kal duh lova, kumtluana coaching kal a ni. A chunga kan sawi tawh ang khian ani pawh hi Mathematics mark belh tel loh niin a lang. Physics leh Chemistry belhkhawmah 160 vel hmuh a inbeisei a, 157 a hmu ta chiah bawk. Mathematics-ah 65-75 vel a inbeisei a, chu nen chuan 1-na nihna tham a ni daih. Ani pawh hi Remthangpuii te leh Engg leh Medical lama pakhatnate nen khan kumtluana class khata thuho, zirtirna thuhmun dawng tho a ni. Engg. Group lam tana class test kan neih zawng zawng deuhthaw-ah 1-na a ni tluan zak. Tuna taka 45 a nih tak daih nachhan tur kan hre lo a ni.
(3) C.Vanlalchhanhimi, Roll No. 0126, Rank =15(Medical), Engg (hming lang lo), Group – Medical & Engg:
Ani hi pawl 12 pass hlim a ni a, nikum atanga kan hnena coaching kal bawk a ni. Medical lamah a lan tawh avangin Engg. Group-ah chuan tel tawh lo tura ngaia lo ngaihthah palh mai awl tak tur a ni bawk. Mathematics-ah mark 80 vel hmuh a inbeisei a, chutihlaiin Engineering group-ah a hming a lang lo ta hrim hrim. Pawl 10 exam-a 5-na, kumin pawl 12 exam-ah pawh 8 na, Biology-ah pawh topper a ni. Ani pawh hi Mathematics mark belh tel loh avanga hming lang ta lo niin a lang.
A chunga mark belh tel loh palh a awm a ni ange kan tih khi a rinthu lutuk ti kan lo awm takin a tichiang turin thil pakhat i han sawi belh leh teh ang : Engg. lama 1-na Biaka kha Biology exam hauh si lovin Medical/Biology group-ah khan a lang teh nawlh a. Engg. Group lamah khan mark 223 a hmu a, Biology lamah chuan mark 156 hmu angin tarlan a ni. Ama chhan dan atangin Physics leh Chemistry-ah mark 160 vel a inbeisei a, 156 a hmu thung.
Hei hi Biology group lama a mark hmuh zat niawma an tarlan kha a ni. Engg. Group lama a mark hmuh nen khaikhin ila (223-156=67) Mathematics-ah mark 67 a hmu tihna a ni ang (65-75 hmuh a inring). Medical group lamah kha chuan, Physics leh Chemistry chauh a lo inbelh tawh si a, (virus hnathawh vang te pawh a ni anga, Medical group leh Engg group te kha virus vangin an inpawlh ni awmin sawi a ni), Engg group lamah erawh chuan a lo inbelh kim hlauh niawm tak a ni. Hetiang tho hian a chunga kan tarlan takah te khian a thleng thei a ni.
Tin, ‘mark hmuh inrindan mai mai te chu an lo inchhutsual ve a ni mai alawm’ ti te kan lo la awm talh takin kan chhuzui leh talh ange : Hei hi i hria ang u – Khawvel khawi hmunah pawh zirlai thiamthei chinin exam-naah mark an inchhutsual nasa ngai lo. Tun examah pawh khan Medical lama 1-na Johny-a khan mark 240 vel hmuh a inring a, 239 a hmu a ni. Engineering lama 1-na Biaka khan 220-225 hmuh a inring a, 223 a hmu. Chuvangin zirlai thiamthei bikten chuti zat chu ka hmu thei ang an tih chuan an tisual nasa lovang tih hi rin tur a ni. Mark 10/15 vela a lo dik loh pawhin a ngaihthiam theih, mark 60/70 lai maia an inchhutsual hi chu thil rinawm loh hulhual a ni.
Zirlaiten H & T Dept. hi engtin nge an ngaih? Result chhuah zanah te, a tuk inrinni leh Pathianni thleng khan zirlaite, H & T Dept. chunga beidawng tak tak thawm ka hre hnem hle mai. Hetiang a nih chuan Dept. ah hian rinna kan nghat ngam tawh lo, nakkumah ti leh mah ila ngaih a ngam tawh lo…ti zawnga thu chhuak a tam khawp mai.
Engati nge tihsual a nih? A thawktute hi mihring ve tho an ni a, fimkhur loh palh te, khawl thil kalsual te chu awm thei a ni ngei mai. Amaherawhchu tunhnai kum 3 chhung a zawn zat maia tihsual a ni kumtluan mai hi chu hriatthiam a har. Exam pawimawh lutuk a ni a, board exam te ang mai mai nilovin zirlaiten an damchhung hna tur an thlanna exam a ni a, exam dang zawng aia sensitive a ni. Tin, hetiang thil pawimawhah excel mai mai an lo hmang ang tih ngaihna ka hre lo reng reng. Programming fel tak duang sain chumi software hmang chuan an ti turah ka lo ngai a. Tin, virus a lo awm a nih pawhin office-ah computer tam tak a awm awm tho sia, a dangah tih leh mai awm (nge thil awmzia kan hre lo lutuk zawk?).
Kan hmanraw neihte leh mihring kan indaih loh dan enin zan khat thil thua hetiang result pawimawh tihchhuah tum chuk chuk hi chu a finthlak ber ang maw? IIT-JEE hi mi nuai 3-4 velin an exam thin a, an chhanna endikna tur khawl te mai mai chu duhthusama tha an nei. Duh sela chuan kar 1 chhung pawhin an tichhuak thei ang chu. Mahse complain pawh sawt lo tur khawpa uluka thil tih an duh avangin thla 1 vel an rial thin. Tumahin IIT-JEE result an la complain lo. Keini chuan hmanraw tha hman tur engmah nei lovin zirlai 1490 te chhanna, subject hrang hrang zawnga chhiar phei chuan answer sheet 4800 vel zet-te result darkar 30 chhungin kan peih thei hi chu H & T staff-te an fakawm ngawt zawkin ka hria, duhthu a sam ta lo mai pawh a. Kan tlin tawk hre chunga thil kalpui hi a finthlak ber a nia.
Rawtna : Hetia thil a thlen tak fovah chuan hei hi ka’n rawt ve ngawt teh ang – Mizoram hian a hranpaa entrance test buatsaih tawh lovin Engineering lam atan AIEEE hi ring ve mai sela, kum tin April thla Pathianni hnuhnung berah exam thin a ni. May thla tawpah result a chhuak thin a, a tling leh tling lote pawh negative mark hmu te thlengin an rank leh mark hmuh zat kimchang takin tarlan a ni vek thin. Result chhuah veleh website atangin H&T lamin Mizoram atanga exam-te roll no. hmangin an result la chhawng leh sela (a nih loh pawhin zirlaiten an result theuh print chhuahsain H&T office-ah huntiam chhungin thehlut se), an mark hmuh dan zulzuiin result lo siam ve mai se an hna a awlsam sawt anga, tumahin fair lo tia sawisel kan nei tawh lovang, mahni result-a lungawi lo talh an awm tawh kher lovang.
Chutiang tho chuan Medical lam exam tumte pawhin AIPMT hi ring ve leh mai se, kum tin April thla Pathianni hmasa berah prelim exam thin a ni. April thla laihawlah result chhuakin May thla ni 10 velah Main exam neih leh thin a ni. Keini chuan main exam hi ti tel ve tawh lovin prelim chauh hi ring mai ila.
Heng rawtnate hi kan pawm a nih chuan lungte 1-a sava 2 vawmthlak ang deuh a ni thei ang – Dept. lamin an hahdam phahin thil dik lo palh a awm tawh lo bawk ang, chubakah a hlawkna tel nasa ber turte chu zirlaite an ni tawh ang. All India level exam a nih tawh avangin kan zirna quality a siamtha lo thei lovanga, Mizoram seat thlanna tur an beih rualin India ram pum huap exam an bei nghal tihna a ni dawn si a. State thenkhat chuan mahnia exam conduct lovin heng exam te hi an state seat hnawhkhah nan an hmang reng a ni.
Heng exam te zawm tur hian official taka dawr kher an ngai lo. Technical seat chuh duh chuan AIEEE/AIPMT form fill up tur ti mai sela. Aizawlah AIPMT exam centre sawrkar hian dil chhuak se (AIEEE chu kan nei tawh saa), a dang zawng chu result chhuah hun nghaka lo awm der der kha a ni tawh mai.
—-Freaky ©
Similar Posts:
- Technical Entrance Examination 2011 result a chhuak
- Technical Entrance Result buaina ril tual tual…
- Technical Entrance Exam Result hi
- Danglam nasa TEE result
- MPSC Prelim exam dik tawk lovah puh
May 10th, 2010 at 8:04 pm
Hrechiang ve inti tak pakhat in min hrilh danin,a changtu Minister in a tuka chhuah nghal tura a tur a vangin hmanhmawh takin an buai pui luih2 an tih chu!!Ka thuhriatna hi a dik em aw?Exam ve pakhat sawi dan in,EXAM hall ah khan Correcting Fluid hman an phal a tih mauh mai chuuuu!mak thei ngei mai.A dik leh dik lo min hrilh thei in awm em????Lo theih ta se…duhsak….nei tan chuan chu ti hlauh!!ka ngaihtuah ngam lo.Thil fel zanlo chu a awm a ni,phat buai pawh a ngai lo.Lo ngai haw lo se!!!!tuna kan Minister pakhat phei hi chu an Opposition lai ni ngat se party worker nen Dept building tualah an chhuah khawm tawh hmel,an bei nasa leh tawh viau mai thei.Kalphung siamthat ngai lai hi chu a awm a ni!!!!
Report this comment