REMREMI IN THE FIRST THREE MINUTES
(The LARGE HADRON COLLIDER – Recreating the Cosmo’s birth)
Kum 2008 August thla, ni 4-na zan dar 6:56 a ni a, ani chu a tap a, khawvel erawh a nui si…
Kan hlawkpui loh rau rau chuan kan ning ngawt ang!!
(Miz. Sc. Journal 2008, Oct-ah a chhuak tawh e)
Chu khawl lianpui mai, min dawlh zo vek mai anga tih mai tur khawpa hrawl, a khawi lai lai emaw rum vung vung mai te, a then laia hrui lo inzam hnawk rup mai te leh eng thil nge a nih pawh hriat ngai reng reng loh karah chuan Remremi chu Putar, khabehmul tuak var vek tawh, tarmit dum hrawl tak mai vuah chunga kut lehlama pencil hum run nen chuan an kal dun hnak hnak a. Chu Putar chu a ni Master tia a lo koh thin chu. Chu khawl hrawl pui mai chu eng dang ni lovin khawvelin an buaipui, Large Hadron Collider (LHC) an tih mai chu a ni a. Chutia an kal pah chuan Master chuan a sawi fiah zel a…
“He khawl hi Large Hadron Collider a ni a, a siamna man atan hian in ram pawisaa cheng tluklehdingawn 360 tehmeuh hman ral a ni a, khawvela particle accelerator lian ber a ni nghe nghe. Hemi hmang hian universe lo pian dan chiang zawkin kan hre thei dawn a ni…”. Chutia a sawi lai mek chuan Remremi chu a lo inrawlh a, “Master i sawi zawm hmain thil pahnih min han hrilhfiah phawt ta che – Hadron tih leh Particle accelerator tih te kha..”.
Master chuan a tarmit tihsan pah chuan, “Engkim mai hi thil te tak te te, atom ai pawha te lehzualin an siam a; chutiang chu particle kan ti mai thin. Heng particle te hi chak taka kan chettir chuan thahrui tam tak an lo nei ta a, chu thahrui a lo neih chu thil zirbingna atan te leh thil dang dangah te kan hmang tangkai thei a ni. Chutianga particle te thahrui tam tak an lo neih theihna tura chak taka chettirna khawl chu Accelerator an tih mai chu a ni.
LHC pawh hian particle kan tihte zinga Hadron kan tih bikte chu chak takin eng tluk deuh thawa chakin a chettir anga, thahrui tam tak a lo nei tawh ang, chutih hunah chuan ama lam hawia amah ang bawk hadron lo kal lai mek nen khan an insu anga, rapthlak tham khawpa tam thahrui a pe chhuak dawn a ni.”
|
“Physicist-ten elementary particle kan thliar hran dana Meson leh Baryon kan tih mai te hi Hadron chu a ni. Entir nan nucleus chhunga neutron leh proton te hi Baryon an ni a, chuvangin Hadron kan tihte zing ami an ni.” Master chuan a sawi zawh rual chuan a sira signboard chu a kawk a –
Chutih rual chuan Remremi chuan ‘Elementary particle’ a lo ti sap a. Master chuan a hrethiam lo tih hriain a hrilhfiah a, “Particle kan tih zawng zawng hian siam leh chhawngtu an nei vek mai a. Molecules te hi atom ten an siam a, atom tin mai hi electron leh nucleus ten an siam leh chhawng a, nucleus pawh chu neutron leh proton-ah te kan la then darh thei cheu a ni. Chu mai a la ni lo, neutron leh proton tin mai hi particle te leh zual Quark an tih mai te chuan an la siam leh chhawng zel a ni. Chutiang particle te tak te te, particle dang siam leh chhawngtute chu a ni elementary particle an tih te chu.
Tuna kan hriat chhuah chinah chuan Electron leh Quark te hi chuan siam leh chhawngtu an nei ve tawh rih lova, Fundamental particle kan ti a ni.” Chutia a sawi zawh rual chuan chart a rawn phawrh a, Remremi chu a entir a, chutih pah chuan chu chart chu Elementary particle te an thliar hran dan a nih thu a hrilh nghal a. Remremi chuan an thliar hran dan chu chiang deuh zawka hrilh turin a lo ngen bawk a.
Master chuan, “Elementary particle te hi an spin athuin hlawm hnih lian deuh deuhah kan then phawk mai a. Hlawm khatna chu spin, number chanvea sem theihho integral half spin kan tih mai te an ni a, chutiangho chu Scientist Enrico Fermi-a hming chawiin Fermion kan ti a ni. A dang leh te chu spin, integer number pangngai neite an ni a, in ram mi ngei S.N.Bose-a hming chawiin Boson kan ti ve thung. Chart-a a lan ang hian Fermion te hi Baryon leh Lepton-ah te kan thliar hrang chhawng leh a.
Lepton-te hi chu zang te te an ni a, nang pawhin i hriat sa electron pawh kha lepton zinga pakhat a ni ve nghe nghe. Baryon-te erawh hi chu an rit hle a, quark 3 theuhvin baryon tinte hi an siam a ni. Lepton-te erawh chuan baryon angin siam leh chhawngtu an nei tawh chuang lo. A then dang lehah chuan Boson kan tihte lam kha hlawm hnih dangah kan then nawn ve leh a. Hlawm khatnaah chuan Meson te kha an awm a, Meson tinte hi quark 2 theuhvin an siam a ni. Hlawm hnihnaah chuan Force kengtu – Force carrier an tih maite an awm ve thung a ni.” A thu sawi lai chu Remremi chuan a rawn pawtchat a, “Force carrier tih tak mai kha i sawi fiah deuh thei em?”
“Physicist-te chuan Force hi chi hrang hrang chi 4-ah kan then a – Gravitational force, Electromagnetic force, Weak force leh Strong force-ah te. Heng force tin maite hi engmah lovin an lo awm mawl ve tawp a ni lova, awmtirtu particle an nei theuh a ni. Entir nan ni leh lei inhiptawnna pawh hi particle chi khat graviton an tih maiin a thlen nia ngaih a ni a. Chu graviton chu ni atangin emaw lei atangin emaw chhuakin a kal ta vang vang a, lei/ni a va thleng a, inhip tawnna a lo awm ta thin a ni. Chutiang thovin charge pahnih inhiptawnna pawh hi photon-in a thlen a ni. Charge pakhat atangin photon a chhuak a, eng tluka chaka kalin charge dang kha a va thleng a, an lo inhiptawn ta thin a ni. Hetiang zel hian Weak force-a hipna thlentu chu W+, W–, Zo boson-te an ni. Strong force erawh hi chu gluon an tih maite chuan an thlen ve thung. Gluon hi chi hrang hrang 8 lai a awm nghe nghe. Weak force hi beta decay awm chhan a ni a, chutih laiin Strong force hi chuan nucleus chhunga proton-te inpaihna thahrui nasa lutukin nucleus a tikeh mai tur kha a lo veng him tang tang thung a ni. An pahnih hian an daih thui lova, nucleus chhungah chauh hna an thawk nghe nghe. ”
Remremi chuan a tuipui hle a ni tih a mitmeng atangin a hre thei mai a, a sawi zawm ta zel a : “Elementary particle te hi Standard Model (S.M) an tih mai hmanga chiang lehzuala sawifiah theih a ni a. S.M ah hi chuan elementary particle 60 a awm a – quark 36, lepton 12 leh force carrier (boson an ti mai thin) 12 te an ni.” Chutia a sawi lai mek chuan Remremi chuan, “A nih leh quark hi chi ruk chauh – up, down, top, bottom, charm, strange a awm si a, engtin nge 36 a lo nih mai theih a, tin, lepton pawh kha chart-ah khan 6 chauh a lang kha a ni si a?” a lo ti a.
Master chuan, “Quark hian khang nih phung chi ruk a neihte bakah khan quantum number dang colour an tih maite chu a nei tel bawk a. Colour hi chi thum a awm a, Red, Blue, Green. An hming ang hian a sen, pawl, hring tihna a ni lova, quantum number chi khat ve mai a ni. Ni tin nuna rawng kan hmuh nen hian inlaichinna a awm lo hrim hrim. Tichuan quark chi ruk khan colour chi thum theuh an nei thei a, 18 a lo ni ta a, an anti-particle theuh nen 36 a lo ni ta a ni. Lepton pawh kha 6 kan nei sa a, an anti-particle theuh nen chuan 12 a ni.”
“Tichuan S.M sawi danin he universe-a thil awm zawng zawngte hi khing particle 60 te khian an siam a ni. Quark leh Lepton 48 te hian taksa nei thil an siam a, chutih laiin boson 12 te hian a hmaa kan sawi tawh ang khan chutiang taksa nei thilte inkara interaction – force kha an rawn thlen ve leh thung a ni.” Remremi chuan chutia a sawi lai mek chuan Higgs boson chungchang chiang deuh zawka sawi turin a lo ngen bawk a.
Chumi zawh chuan pindan pakhatah an lut a, Master chuan tunah chuan Big bang zawh hlim hlawl Baryogenesis atanga Nucleosynthesis hun lai, The First Three minutes an lo tih mai hun chhung chungchang an sawi kai tawh avanga chu pindanah chuan lut an nih thu a sawi luam a.
“Higgs boson hi kum 1964-a Scottish Physicist Peter Higgs-a tih chhuah (?) a ni a. Particle thenkhat-ten mass an neih laiin a then erawh chuan an nei leh si lova. Tin, mass hrim hrim hi engnge a nih a, eng vanga lo awm nge a nih a, engtin nge a lo awm mai theih tih hi tun hma hun rei tawh tak atanga Physicist-ten hriat an lo chak em em thin a ni bawk. An ngaihdan chuan Big bang zawh hlim hlawlah kha chuan particle lo piang chhuakte reng reng khan mass an nei lo vek a.
Chutih rual chuan Higgs Field an tih chu a insiam bawk a, chu field-a particle awm chu Higgs boson an ti. Chu Higgs Field leh particle interact (intawk??) reng rengte chuan an interact nasat dan a thuin Higgs boson kaltlangin mass an lo nei ta a, chu field nena interact ve lote chuan mass an nei lo hlen ta a ni.
“Tichuan Higgs boson chu mass lo awm tanna, a origin tak tak niin an ngai a, an hmuhchhuah hlauh chuan mass tobul hi hre thei dawnin an inhria a ni. Hei tak hi LHC experiment-in hmuh chhuah a tumte zinga a pawimawh ber an tih hial chu a ni. Higgs boson hi S.M-in particle a lo sawi lawkte zinga pakhat a ni ve naa, S.M-a particle-te zingah chuan an telh ve chiah lo. Indirect tak chuan a mass tur hi 114.5 – 153 GeV vel niin sawi lawk a ni a, L.H.C hian 7,000 GeV (proton tan, Lead ion tan 1150 TeV) zet pawh a thlen theih avangin Higgs boson hi a lo awm tak zet a nih chuan hmu chhuak ngei turah an inngai a, an hmuchhuak lo a nih erawh chuan Big bang zawh atanga mass lo awm tan dan chungchanga an ngaihdan kha a dik lo niin an ngai thung dawn a ni.”
Remremi chuan, “A nih leh engati nge LHC hmang khera hmuh chhuah an tum? Khawvel hmun dangah pawh Laboratory dang a tam hle si a?” a lo ti a. Master chuan, “Zawhna awm reng a ni. A tir lama kan sawi tawh ang khan LHC hi khawvela accelerator lian ber a ni a. Tin, Big bang zawh hlim hlawl (10-37 – 300 second)-ah kha chuan van boruak chu a sa hle a, particle-te chuan thahrui an ngah hle mai bawk a. Chutiang zat zat thahrui chu duh duha laboratory-a siamchawp mai chi ziazang a ni lova, accelerator dang lam bik, hemi pual liau liauva buatsaih a ngai ta a ni.
Big bang zawh hlima universe chanchin zir tur chuan thil sa em em, particle-ten thahrui tam em em mai an neih lai zirna a nih avangin chutianga thahrui tam tak siam chhuak theitu khawl chu kan mamawh ta a, ram tam tak tangrualin CERN kaihhruainain L.H.C hi an siam ta a ni.” Remremi chuan bo hmel tak hian ‘Big bang a lo ti sap a’.
Master chuan, “Kum tluklehdingawn 13.7 vel kaltaah khan vanah hian eng thil mah a la awm lova. Ni, thla leh arsi, planet, galaxy…mai ni lovin hmun awl (space) bakah hun (time) takngial pawh a la awm lova ni. Mahse eng thil emaw ni Cosmic Egg an tih mai chu a puak ta dur a. Chu thil puak atang chuan hmun, hun leh arsi, ni, thla planet, galaxy…te hi an lo insiam ta a ni. A puah kehna hmun atang khan eng thil mai pawh chu a hla zawngin an thlawk sawn dawr dawr vek a, chuvangin universe hi a zau tual tual mai a ni. Hei hi Big bang theory kan tih chu a ni. A tichhuaktu hi Belgium mi, Puithiam George Lamaitre-a ni nghe nghe”, tiin a chhang a.
Remremi chuan, “A nih leh tuna universe-a an hmuh chinah chuan antimatter aiin matter hi a tam zawk hle mai a, hei hi ang vang nge ni thei ang?” tiin a zawh chhunzawm nghal a. “Khatia big bang a thlen chiah atanga 10-43 second-ah khan a sat zawng chu 1032 K vel a ni a. 10-43 – 10-35 second-ah hi chuan force chi thum strong, weak, electromagnetic force te kha thuhmun vek, chak bik awm lo an la ni rih a, chutia force chi thumte inang vek an ni ang tih ngaihdan chu Grand Unified Theory kan ti nghe nghe. Hemi rual hian matter leh antimatter te chu inzat chiahin an lo chhuak rual a, mahse eng process emaw avangin matter te chu an lo tam ta zawk a.
Matter leh antimatter-te chu an inthaichhe tawn a (annihilation an ti), radiation nasa zawkin a lo chhuah belh zel a. Hetia matter-antimatter intamhleih tak maina dan (matter-antimatter asymmetry) hi Baryogenesis an ti. A process hi chiang taka sawi thei kan la awm lova, ngaihdan mai a la ni e. Hetia matter-antimatter asymmetry hi engvanga lo awm nge a nih tih chu LHC hian hriat chhuah a tumte zinga pakhat a ni.
“Hetiang a nih avang hian zawhna lo awm ta chu ‘khawiah nge antimatter-te kha an awm tak? Atira inzat reng si, a hnu deuh lawkah khan engvangin nge an lo tlem zawk tak mai?’ tih hi a ni. Kan sawi tawh ang khan a process chiang taka sawi thei kan awm lova ni. Thenkhat chuan antimatter-te kha an bo mai lova, khawi lai hmunah emaw an la awm reng a, tuna kan universe ang ni lo, antimatter universe, thil awm reng reng mai antimatter vekin a siamna hmun awmin an ring bawk. Ngaihdan awm tak pawh a ni ve awm e.
“Hetih hun lai hian a sat em avangin hadron te siamtu quark leh chung quark-te thlunzawmtu gluon-te chu inzawm lovin a free-in an awm a, chutiang chu Quark-Gluon Plasma kan ti. Hei pawh hi LHC in chiang zawka zir a tumte zinga pakhat leh chu a ni. He kan khawlah hian Proton chauh ni lovin Lead (Suan) ion pawh kan insuttir anga, chu chuan thahrui sang em em mai 1150 TeV a pe chhuak ang. Hei hian big bang zawh hlima temperature ang maia sang temperature kha a pe chhuak ang a, chutih hunah chuan kan sawi tak quark-gluon plasma kha a siam thei dawn a ni.
“Hei mai hi a la ni lo, gravity hi force dang 3 te ai khan a let tluklehdingawn tam takin a chak lo zawk a, hei hi eng vang nge ni ang tih hi kum 40 aia rei mah chu Scientist-ten an lo chhui ngar ngar tawh a ni. Hei pawh hi LHC-in hriatchhuah a tumte zinga pakhat a ni ve leh a ni. Tin, GUT-ah khan gravity hi kan la telh ve lova, force dang 3-te zawm khawmna a ni rih a. Gravity hi lo telh ta ila chuan Quantum mechanics leh General Relativity kan zawm dawn tihna a ni.
Hetia force 4-te inzawm khawmna dan hi String theory kan ti a ni. String theory-ah chuan space-time hi dimension 4 ni lovin 10 zet a ni tawh a, 6 dang kan neih belh leh tihna a nih chu. Zawhna awm ta chu ‘khawiah nge chung dimension 6 te chu’ tih hi a ni. Chutia dimension dang kan va hriat chhuah mai theih lohte chu Hidden (Thuhruk) Dimension kan ti a, hei hi Thahrui sang takah chuan va hriat chhuah theih niin kan ngai a ni. Hei pawh hi LHC in hmuh chhuah a tumte zinga pakhat dang leh chu a ni.”
Chutia a sawi chhung zawng chuan Remremi chuan ngaihnawm ti takin Master chu a lo en kar a. A sawi zawh chuan ti hian a zawh chhunzawm leh a, “Dark matter chungchang hi…?”. “Universe mass leh density hi a theory-in kan chhut a; tin, kan hmuh dan atangin a tak ngeiin (observational data) kan chhut veleh bawk a. Rin loh tak maiin a theory-a kan lo chhutsa aia tam daih kan hmu chhuak ta mai a. Mak kan ti hle a, kan universe-ah hian kan hmuh theih – ni, thla, satellite, planet, arsi, comet, galaxy,…bakah hian hmuh theih loh, mass ngah tak bawk si, thil dang nena gravitational force hmanga interact ve thin tam tak a lo awm ve reng a ni tih kan hriat chhuah phah ta a. Chutiang thil chu Dark matter kan ti. Engnge a nih chiah erawh kan la chiang chuang lo” tiin Master chuan a chhang a.
A sawi zawm zel a, “Atir lama kan sawi tawh ang khan Universe hi a zau tual tual a. Thawkkhat lai atang khan nasa lehzualin a zau chak tual tual (accelerate) a ni tih hriat chhuah a ni a. Matter-te hi gravitational force hmanga inhip tawn thin an nih avangin an inhip tawnna avang chuan universe zauh tual tualna chu muang changin a tlem hret hret ang. Universe chuan inhip khawm leh thei tawk tur atana mass ngai zat Critical mass an tih mai a neih phei chuan a tawpah chuan a lo inhip khawm leh ang a, a te leh tual tual tur a ni.
Mahse kan sawi tawh ang khan universe zauh zelna speed chu a pung tual tual tih hriat chhuah a ni si a; hei hian thahrui chi khat, matter-te atanga chhuak ni lo, mak dang lam tak mai a awm tih a entir a ni. Chu thahrui chuan matter awmte chu a hip ve lova a paih zawk tlat mai a ni. He thahrui hi Dark energy an ti. Dark matter hian universe-a thil awm 23% vel a luah a, Dark energy hian 73% vel, a dang 4% vel chauh chu matter pangngai – ni, thla arsi, galaxy…te hi an ni. Dark matter leh Dark energy-te hi LHC-in hmuhchhuah emaw an chanchin chiang zawka zir a tumte zinga pakhat a ni.”
Master chuan, “Tun atan chuan a theory chu tawk rih phawt se, a khawl hi i han belchiang teh ang hming”, tiin Remremi chu a khawl in puiah chuan a kai lut a. Tihian a hrilhfiah a, “A tawi zawngin sawi zung zung mai ila, LHC hi khawvela accelerator lian ber a ni a, US Dolar tluklehdingawn 9 zet senga siam a ni a. Kum 13 tehmeuh chhung a siam nan hian hun hman a ni a, tun hma chuan LEP (Large Electron Positron collider) atan hman thin a ni. France leh Switzerland rama awm a ni a, a tam zawk mah hi France ramah a awm nghe nghe. Lei hnuai meter 50 – 175 inkarah sak a ni a, Mihring ten experiment an buaipui tawh zawng zawnga la hautak ber a niin khawl lian ber a ni bawk. He khawl hi European Centre for Nuclear Research (CERN) kaihhruaina hnuaia siam a ni a, khawvel ram hrang hrang 80 vel atangin Scientist 7,000 zetten an vil mup mup reng a ni.
“A hming awmzia hi i han hrechiang phawt teh ang. Large (lian) tih hi chu a khawl hi a len em vang mai a ni a, Hadron tih hi chu particle kan hmante kha proton, elementary particle then dana Hadron kan tih maite an nih vang a ni a, Collider (insuttirtu) tih hi chu chung proton te chu a chhungah hian he khawl hian a insuttir vang a ni. A kual sei zawng hi 26.659 km zeta thui a ni a. Solar system-a hmun ruak ber a ni a, a chhunga pressure chu 10-13atm a ni. Hetia kan tih ruah vek nachhan chu proton-te kha an tlan kualnaah gas molecule te nen an insu ang tih kan hlau a ni. Magnet 9500 zet a awm a, thil vawt em em mai – Liquid Nitrogen ton 10,080 zeta tam chuan heng magnet-te hi -193.2oC-ah a tivawt te te anga, chumi hnuah Liquid Helium ton 60 zet kan chhun belh leh anga, hei hian -271.3oC (1.9K)-ah a tihvawh belh dawn a ni. Chu chuan van thengreng (2.7K) aia vawt zawkin a siam ang a, Solar system leh khawvela hmun vawt ber a niin mihringten kan hriat china universe-a hmun vawt ber pawl a tling phak hial a ni. Hetia kan tihvawh nachhan chu heng magnet 8.3Tesla zeta na magnetic field pechhuak theite tinung tur hian current 2000 ampere zeta tam a ngai a. Chutiang zeta tam current chu coil-a a rawn kal khan nasa taka hloh then theih a ni a, chutianga current hloh tur ven nan chuan coil / magnet pum pui mai kha kan tivawt vak a, Superconductor a lo ni ta a, current a hloh dawn lova ni.
“He hmunah hian proton-te chu chak mangkhen (99.9999991% of light speed)-in a opposite-in an vung thuak thuak mai a, second khat chhungin vawi 11,245 zet an tlan chhuak hman dawn a ni. Hmun 4-ah an tlan kawng hi a intan tlang a, chung hmunah te chuan an insu ang a, particles tam tak pe chhuakin Big bang zawh hlima temperature ang deuh thaw, ni lairil aia a let 100,000 zeta sa temperature a insiam ang. Hetih hunah tak hian a zir chiangtu tur khawl chi hrang hrang 6 kan bunte chuan data lain an lo zir chiang dawn a ni. Second tinin vawi maktaduai 600 zet an insu ang.
“A hmasa ber atan Hydrogen atom atanga kan lak chhuah Proton te chu LINAC 2-ah kan dah phawt anga, hei hian 50MeV-ah a lo tichak ang. Chumi hnuah chuan Proton Synchrotron Booster-ah kan hruai lut anga, hei hian 1.4 GeV-a tam thahrui nei thei khawpin a lo tichak anga, chumi hnu chuan Proton Synchrotron(PS)-ah a lut leh chhawng ang. Hetah hian thahrui 25 GeV a nei tawh ang. Heta tang hian la chhuak lehin Super Proton Synchrotron (SPS)-ah kan luhtir leh anga, hetah hian energy sang em em mai, 450 GeV (99.9998 % of light speed) zeta tam neiin proton chu kan kal kualtir tawh dawn a ni.
Hemi hnu hian accelerator kualpui tak takah khan magnetic field hmangin kan kap lut ang a, hetah hian minute 20 vel kan tlan kualtir meuh chuan thahrui tam em em, mihringten kan la siam chhuah ngai reng reng lohva tam, 7 TeV (7,000,000,000,000 eV i.e. 99.9999991 % of light speed) zet mai proton chuan a lo nei tawh dawn a ni. Chutih lai tak chuan amah lam hawia amah ang bawka chaka proton lokal ve mek nen khan an insu ang a, an thahrui inbelhkhawmin 14 TeV zeta tam thahrui neiin an insu dawn ta a ni. Kan sawi ang khian a khawlpui ber chhungah chuan eng tluk deuh thawa chakin a vung hlerh hlerh tawh mai dawn a ni (a kawm en la, LHCf leh TOTEM te hi tarlan an ni ve lo).
“A zir chianna tur khawl (detector) 6 te chu –
ATLAS – Mass lo awm tan dan leh Hidden dimension zir chiangtu tur.
ALICE – Quark-Gluon plasma a zir chiang ang.
CMS – Higgs boson hmuhchhuah leh dark matter/energy bulthut hriat chhuah a tum thung ang.
LHCb – Matter-Antimatter asymmetry kha a chhan hriatchhuah a tum ang.
LHCf – An insut hnua particle insiamte atang khan Cosmic ray chungchang a zir chiang ang.
TOTEM – Proton len zawng leh particle-te luminosity a zir chiang ang.
Heng bakah hian particles te hian supersymmetric partner an nei em tih te, Quark decay dan hi S.M sawi dan nen a inmil em tihte pawh zir chian kan tumte zing ami a ni. Tunah hian proton beam hmasa ber chu clockwise direction-in kan kaltir tawh a, October ni 21-ah hian opposite zawnga kal Proton tho nen insuttir kan tum a ni. Chutih hunah chuan kan data lak khawm te chu he lai hmuna kan zir chian bakah khawvel hmun hrang hrangah kan thawn darh ang a, nang leh kei leh he universe lo awm tan dan tak tak kan hre chhuak thei tawh mai thei a ni.”
Remremi chuan, “A nih leh Blackhole chung chang kha?” a lo ti a. Master chuan, “A theory chuan khatia big bang zawh hlimah khan Blackhole te reuh te te micro blackhole / primordial blackhole insiam theia ngaih a ni a. Physics-a Nobel prize meuh lo dawng tawhtu Frank Wilczek pawh kha he Project-ah hian kum 6 chhung chu a lo tel tawh thin a, Blackhole insiam an hlauh avang hian tuten emaw thahah an vau hial nghe nghe. Mahse tuna kan experiment-ah erawh hi chuan chutianga a insiam nachhan tur kan hre lova, a him tawkin kan ngai.
A lo insiam a nih pawhin Hawking radiation dan angin a insiam rualin engmah hlauhawm awm lovin radiation-ah a kalral leh nghal mai dawn a ni. Tin, he khawl hi Dan Brown-a lehkhabu ziah ‘Angels and Demons’ tihah khan a lang nghe nghe ni. A ziah dan chuan he hmunah hian antimatter ralthuam hlauhawm tak mai siam chhuah a ni a, chu ralthuam hmang chuan Vatican an va do vel a ni”, a ti a.
“He experiment hi Big bang experiment tih ten an sawi a…?”. “Ni e, Big bang tak tak kha kan siam thar leh dawn ta tihna chu a ni em lova. Kan sawi tawh ang khan khatia big bang zawh hlim maiah kha chuan temperature a sangin thahrui (energy) chu a sang em em mai a. Physics-a kan ngaihdan tam takte a dik leh dik loh hre turin kum tluklehdingawn 13.7 velah khan kan let thei tawh si lova; chuvangin a teuh ber tur chu he experiment hi a ni. Energy sang em em kan siam chhuah hian big bang zawh hlima temperature ang maia sang kha a siam chhuak leh ang a, tichuan indirect-in big bang zawh hlima physics-a thil thleng nia kan ngaihte kha he lai hmunah kan lo test ve dawn a ni. ”
“Ka tibuai rei ta hle mai che, a tawp ber atan he zawhna hi ka zawt duh che a ni : Heng experiment hi eng atana ti nge in nih ber? In tum ang takin lo hlawhtling pawh ni ula khawvel tan eng nge changkanna a puak chhuah chuan ang?”. Master chuan a tarmit chu a phelh a, a mit chu a nuai chat chat a, muang changin a chhang a, “Mihring rilru hi hriat ngai loh hriat chakin a tuihal reng a, a bikin kan lo chhuahna tobul leh universe lo intan danah te hian.
Hengte hi kan hriat chhuah hma chuan kan tuihalna hi a reh ngai lovanga kan zawng kumkhua ang. Chuvangin khawvel tan tangkaina leh hmasawnna a thlen lo a nih pawhin kan rilru tuihalna a lo phuhru ve a nih chuan a tha a ni mai lawm ni? Physics peng thar pawh kan hmu chhuak mai thei asin!” tiin.
Remremi chuan lawmthu sawi mawlh mawlh chung chuan an awmna pindan chu a chhuahsan ta a.
