mi(sual).com

by Rev. Lura

Kum 2008 January thla khan, Chiang Mai (Thailand) a, Buddhist ho zinga hma-la te Conferenceah kan nupa-in kan han tel ve a. Chuta Singaporean, Philippines-a rawngbawl a awm Mission hotu lian tak pakhat chuan – Mizo kan ni tih a hriat veleh, kan hma a lo kun-in, chibai min buk a – “Mizo in nih chuan ka zah (respect) a che u, khawvel a missionary tir chhuak tamber hnam in nih avangin” a rawn ti tawng mai, a lawmawm hle. Nuam ve chem chem tak a ni.

Conference tawpni-ah, he Singaporeanpa te nen kanlo in chibai lai mek-in, Naga nupa, he Conference-a lo tel ve te – anlo lang ve a, an pa chuan, chu Singaporean pa hnenah chuan “En ta che… kan vun rawng leh hmel te hi – Indian kan nih loh zia hi – Tihluihna in India-ah kan awm a ni…” tiin lamtanga min sawm hmel tak a, min melh zauh zauh chungin a rawn ti bawrh bawrh a.

Chu Singaporean pa chuan, “Mizoram hi Independence lo sual ve tawh an ni a, an ni chuan ralthuam dah fai vek-in, missionary an tir chhuak ta zawk a, khawvel a missionary tir chhuak tam ber hnam an ni – entirna tha lutuk an ni (very very good example)” a lo ti fel hmiah mai a, a lawmawm hle. Mahse a lawmawm rual rualin, chapo-na thalo lamah min hruai ang tih a hlauhawm hle. Hun reilo te chhungin, ka ngaihtuahna a kual thui hman hle.

Missionary tir chhuak tamber hnam, za a za kristian inti ngam hnam kan nih bakah, India ramah second highest literacy nihna kan la hauh pha ve ngat ngat bawk a. Kan ram kilkhawr leh kan hnam la naupan leh tanrualna chang kan hriatloh ngaihtuah-in, hma kan sawn chakin, hnam chhuanawm tak kan lo ni a tih ve theih awm e.

Amaherawh chu, hepa hian Mizo te hi min han bel chiang se? Ti a ka ngaihtuah meuh chuan, Zoram chanchin chhe lam ka rilru ah a lo lut nghal zut zut mai a ……ka zak leh hnuh hnawh hle. A chhan chu, 2001 khan, Pathian khawngaihna a zar-ah, hetia min faktu te ram, Singapore-ah ka han kal ve tawh a. Ka cham chhungin, Police ka hmu miahlo, police chu an awm ve na a, mihring an rinawm-in an polite em a, Police-in hna an nei ve meuh lo.

Mipuiin an thinlung chhungrilah, sorkar dan an zah a, an zawm vek mai a ni. Zan dar 12 ah, motor tlan awm miah lo mahse – traffic light (red light) a en chuan, mi pahnih/khat leh pawh nise, an ding a, tumah an awm chuanglo ti-a, kaltlang a awm ve lo. Green light lo lan an nghak mai a ni. Chutiang khawp a, hnam rinawm chuan kun-in chibai min han buk a nih chu.

Hnam belh chiandawl tak ni ve phei ila chu, khawhawi pawh a nuam leh zual mahna le! Hnam belhchian dawl chu kan ni thei ngei mai, mahse hnam belhchian dawl ni tur chuan, kan chak lohna lam pirlan fo a ngai ve a Chuvangin, kan that lohna lam/chaklohna lam han pir lang ta ila…kan thatlohna kan pirlan rual rual hian – kan thalo fai vek hauhlo tih kan inhriat tel pawh a tha tho awm e, chapo lo ila.

Hna chungchang ah te: Mizote hi highest literacy or Second highest literacy in India kan ni tih chu kan sawi tui ve hle thin. Khawvel hmun hrang hrang tlem a zawng, Pathian zarah kan lo tlawh pawp ve ta a.

A bik takin, mi ram airportah, thalai tamtak, smart tak a inchei, check-in counter ah te, security check ah te, immigration ah te, ram tan a, tih tak zet a hnathawk tih hriat tak ten, polite tak, mahse strict tak tho si a, khualzin an dawr/tanpui, endik te kan hmuh ve thin bak-ah, counter a – thalai, nula – tlangval smart tak tak, polite tak tak, kan dawr in kan lo pal tlang ve ta fo mai. Heng zingah hian, ngaihsam tak leh ho lam tak a, thil ti mai mai, lo nui thler ta duai duai, hmuh tur an vang hle.

Heng thalaite han hmuh chang hian rilruin, kan Mizo thalai hmeltha leh lehkha thiam sang tak takte rilru-in a dap thleng thin. Los Angeles Airport counterah phei chuan, kan hmel anpui khawchhak lam Philippino hmel te pawh hmuh tur an tam nia. International chu sawi loh, India ram Airport chhung ngei ah, Air India, Indian Airlines, Jet Airways, Sahara Airlines (kan hriat lar chhun) hotu lam chu sawi loh, countera thu te zinga mi, “Mizo i ni maw” tih tur Mizo nula tlang val hmuh tur anla vang hle hian ngaihtuahna a ti thui hle.

Kan tan- ‘hna hmuh’ a har em a ni – ti dawn ta ila, eng nge a chhan ni ta ang? Kan tling lo (qualify lo) tihna em ni ang? Lo ni ta se, eng chu nge kan tlin lohna chhan ni ta ang le? Kan B.A. MA Certificate te hi a lem a tam nge – pass tur ngawr ngawr kan zir? Nge entawn-in kan pass chho ve thin? Tihte pawh in zawt tel ta ila.

Lehkha thiam, Certificate pawh nei tha, Kristian thalai, Kohhran member diktak, piangthar ni bawk si chu – eng nge kan tlinlohna ni ta ang? Mizo te hi lehkha thiam an ni a, an sap tawng a tha a, Kristian an ni a, an rin awm bawk a – kan company a thawk tur kan duh/ kan airlines a thawk tur kan duh etc. ti hi an awm tawh em? Anla awmlo a nih chuan ‘an tih hun’ a nghah hlelh awm hle.

Mizo kristian te hi, India ram a cheng, Indian kan ni ta sa sa, dikna, rinawmna, taimak-na leh thiamna te thlengin, India mipuite tan a, ‘good example’ nih a hun ta viau mai. Ringlo mite aiin, ringtute min rin ngam a hun tawh. Hetiang kan nih ngat chuan, India ram ti engtu, Krista hmel, hnam zah-awm, Kristian hmingpu tlak kan ni ngei ang. Kan te a, kan hmel te a thalo a nih pawhin- rinawmna lam leh thiamna lam ah mite kan khum thei.

Ram pum huap chuan lehkha thiam ram – Second highest literacy in India ni bawk, Kristian state, za a za Kristian (Lal Isua zuitu) in ti ram ka ni. Mizo thalai, hetianga hnathawk tur ‘mi thiam’ an awm lo – ti dawn ila – Employment exchange Office a, educated unemployee (lehkha thiam hna hmu-lo) hming ziahna register a hming ziak lut zo zai te hi? Nge tanpui tu (hnaruak kawh hmuh tu) an awm lo?  Kan chanchin bu mite pawh hian, pawngsual, in that, rukru an man, chu chuan chu ti zat a eiru tih lam chhuah tur buaipui ai chuan – heng lehkha thiam te tana hnaruak dil theih (India ram pumhuap) te dap khawm ta ila, kan ram tih hmasawn na atan a tangkai zawk- in ka ring thin.

Hna ruak/thawh tur awm ang ang, thawk turin kawng in kawh hmuh ila, rukru pawh an tlem ang, pawngsual hman pawh an awm lovang a – Kan zoram te reuh te hi ram thianghlimah kan la siam thei. Kristian ram, missionary tir chhuak tamber hnam ni si, kan ram chhunga thil thleng chanchinbu-in an chhuah thin hi, a chhiar a zah thlak –in, kan inhmeh chiah love.

Kan mithiam leh Sorkar hna thawk ho hi le :- Hmanlai lehkha thiam hmasa te kha, an ngaihsan awm em em a, zirna tha leh, eitur tui leh tha, hmanrua tha pawh an nei lova, mi in a awm–in, IAS, IPS, IRS, IA & AS te Doctor, Engineer ah te anlo in hlang kai a, a ropui hle. Mithiam leh hotu lian a in hlan kai kha thil na ran a nih hauh loh laiin – (i han ti khanglang teh ang) “enge kan goal” ti ta ila – kan ram mamawh siamchhuak tur, ram thil neih chhe tur siam that, ram tan a hna thawk tak tak turin em le? Tamtakte tan a chhanna chu, hnai love, kan rilru piansualna/rinawm lohna alo lang chhuak a. Kan zirlai atangte, hna-kan han zawm ni atangte-in, khawpuia ram lei, in chhawngsang sak, lirthei lei, mi hausa pa/nu nih hun kan thlir ber thin a ni awm e.

Thlatin hlawh vawi tam revised tawh hnu-ah, kan thlatin mamawh tawk kan ngiat ang, sorkar-in hlawh min pe chung pawhin – ram cheina/siamna (develop) na tur sum it a, a hmanna tur dik taka hmang lova – mahni in leh lo lei nan leh sak nan a hmang mai pawh ni lova, In hmun pahnih pathum leh lirthei lei nana hmang eng zat nge awm ta le? J.E./Overseer te thleng pawhin, kan han zir chhuak a, officea hna kan zawm ni atang a, thla thum/thlaruk chhung in-hmun kan han lei a, kan han sa tak tak mai thin hi chuh….tu chan ai emaw a hek loh pawh-in, sum a kalna tur diktakah a kal lo tih a chiang hle. Vai supplier hoten, bungrua (materials) third quality, first quality ang a an supply a, first quality ang a bill an lak theih chhung chu, Mizo min nuih zat ang.

Vai supplier hote hian, officer lian ho chu sawi loh, office a thu, Bill Asst/Cashier/Head Asst/ Overseer/JE te (vai supplier te bungrua, (materials) lo thleng thar, lo verify tu te etc) – nu then khat/pa thenkhat te testimony han sawi sak ta mai se – kan mi lian nu Biak In chhunga hawi pir tak tak te hi chu an hawi pir hlek lovang le. Chu ai a hlauh-awm, van-ah record a ni – Lal Isua rorelna hma-ah kan la ding dawn.

Nu leh pa tamtak mai pawh ni lovin Kohhran Upa leh Pastor te ngei pawhin hetiang fapa/fanu neih chak in, tlawm leh zah pawh kan dawn lova – ‘Pathian malsawmna’ kan han ti zui leh ta nghal a. Lal Isuan hetiang tur hian min zirtir em ni le? Pathian malsawmna a ni meuh a ngem?? Ngaihtuah chian a tha, boralna kawng kan zawh a ni lek lo maw??

Kristian kan nihna kum za aiin a lo tam ta. Pathianthu kan hriat thuk leh sawithiam dan atang ngawt hi chuan – dikna, taimakna, rinawmna, entawn tlak leh entirna tha ber India ramah kan nih a hun ta viau awm e. Mahse, kan testimony mawlh mai hi – India ram central sorkar Prime Minister, Hom Minister, Finance Minister etc. te hian Mizoram Kristian state hi, ringlo mi te state ai a kan danglamna bikna sawi tur an hria a ngem? Mizoram chu Central atanga an sum hmuh te an hmang dik hle, an hmang tangkai hle, an thil siam reng reng a tha ber – entawn tlak an ni – an ti em le? Mizoram chu, chu mi…. state dawtah – Corruption a nasa ber an ni……drug addict tam ber na an ni…tar thi hman lova – overdose-a thi an tam berna a ni….an ti mai zawk em ni?

Kan kohhran pawl ho hi le:- Hetiang deuh a sum siam thiam kan nihloh phei chuan, Kohhranah a lansarh theihloh an ti leh ta nghal a. Hetiang sum ngah ho, kohhrana an tuiloh va, thawhlawm an thawh thatloh hlauh avangin, Kohhran hruaitute pawh-in, Pathianthu a nihna ang-in, an sawi dawt dawt ngam tawh lova, a pawm nuam zawng – a hahdam zawng-in kan kalpui ta thin a ni ber tawh awm e. Chuvang-in, “…thlarau lam hnu-te, engma pawlhloh…” 1Pe 2: 2) Kohhran programah alo tlem ta. Mithi khaw kulh kawngkhar pawh ngam tura din Kohhran (Matt. 16:18) thlaurau ngui a, a chau a, thlarau sual ho lak ah pawh, a powerful ta lo (thiltihtheihna a nei ta lo) a ni hi.

Pathian malsawmna dawng tlak nun a pawi mawh ta :- Hetiang han sawi hian, hausak hi sual ani tihna a nilova. Solomona pawh Pathian hnenah diltur diktak a dil avangin – hausakna tamtakin Pathianin a vur, Solomon anga hausa hi khawvelah an awm leh a ngem le? A dil leh um avang ni lovin. Pathian thinlung a hneh avang a ni. A ram leh felna zawng hmasa tu te tan chuan…Pathian thutiam ding nghet tlat a awm.

Josepha pawhin, hun harsa ber lai pawhin (Potiphara nupui – a pi ngeiin a thlem lai pawh-in) mi hring lawmna a zawng lova, Pathian mit hmuha thiltha a tih tlat avang-in, hre-awmna leh harsatna han tawk rap rap thin mahse – Pathian-in, Agupta ram Prime Minister-ah leh, Aigupta ro-sum enkawltu – ah a hlang kai mai a ni. Josepha Prime Minister a hlangkai tu Pathian nung be ve tu, Mizo kristian te hi, kan biak Pathian-hian India ram ro-sum enkawltu-ah, roreltu-ah eng tikah tak min hlang kai ve ang maw????

Contractor leh Supplier te pawh hian, mahni hlawkna lam aiin, kan Zoram tana thiltha hi i ngaihtuah ta zawk ila – a ei theih theih kan ei thin avangin- kan Zoram hi a sawngnawiin, a nih theih ang tur a ni pha lo hle. Ram kan hmangaih tak tak a nih chuan – mi hausa ho hi tang rual se, group thum/li ah in siam se, – politics khel lovin, in chhawngsang sak belh hek lovin, lir thei lei tawh bawk hek lovin – sum vawm khawm se, eiru thei ten anlo ei ruk zawh avanga, a nih tur ang ni zo ta lo, kawng chhe lutuk siam that hna, hydel-project lian tham, industry lian tham te emaw, din tur-in in puahchah ta zawk se, kan pianthar zia a lang a ang a, Zakai a piangthar kha kan tluk ve thuak ang a. India ram record kan break thei ngei ang a, khawvel mithmuh-ah kan Kristiana rimtui alo nam chhuak bawk ang.

Hmalam i pan ang u – kan la tlai lo ve!! Changkang kan in ti ve tawh a ni mai thei – hma chu kan sawn ve a, sawn pawh a hun, Central-in ‘sum’ heti zo zai min pe ta chu, sawn tur pawh kan ni ve. Mahse, mi ram pawh an thang ve zel a, eiruk ching ve-lo ram phei chu umphak an har tawh hle. Mi ram – Japan, Americaah te, thiamna paw chhuak turín, kan intir theilo a nih pawh-in, Thai- Engineer, Chinese Engineer te hnen atang-a inzir turin, kan thlan lal, sorkar-te hian hma-la-se, Zoram Engineer, inzir mi tak tak sawm vel te hi,.. Bazaar (shopping) tur ni lovin, Zoram mamawh diktak zir chhuak tur leh thiamna tak tak paw-chhuak tur, chhung leh khat in duhsak lam awm hauh lovin tir chhuak ve thin ila.

Politician ho te pawh hian, lal thuthleng theih nghilh tawh in- ram tana tanrual a hun ta. Ram changkang zawk te han hmuh hian, an changkanna chhan, ram tana an rinawm na leh tanrualna in, rual min awhtir thin. Bangkokte chu a rem a, fly-over nalh tak taka siam pawh a awm a lawm, kan ti a nih pawh-in, Hongkong chei-tu engineerte finna han pawh chhuak thei ila. Kan khawpui chep tawh tak siksawi tur leh chei tha turin emaw, khawpui thar tha tak din turin emaw, mi ram Engineer te hnenah training/Seminarte han nei ve thei thin se, kan zia-awm mahna le. Engineer ho pawh an hausa tawk tawh awm e..tunah chuam ram hmasawnna tur ngaihtuah tlang tawh zawk ila.

Tin, khawpui harsatna, sorkarin sutkian a tum lain, mipuite pawh hian ram tan enge ka tih theih tiin, lo inhawng ve bawk thin ila, kawng chhiat/zim thu, electric awmloh thu etc. kan inhrilh tlem deuh ngei ang. A nih loh chuan, tun atanga kum 10/15 hnu-ah sorkar-in zu khap aiin, lirthei lei a khap a ngai tawh hial ang.

School lam te hi…Zoram chhungah hian School tha tak tak kan nei tam ta hle,  zirtirtu tha tak tak te hian – zirlai te Student educational tour emaw – excursion a an hruai chang-hian, tu tu thlan-hlui emaw, museum emaw, leh khawpui-hlui tak tak enpui a, sum tamtak leh hun tamtak khawh ral ai chuan, tunlai a, ram tan a thiltha leh tangkai zirchhuah pui tum ta ila, India ram pawn-ah kan in tir chhuak thei a nih chuan a tha, kan thei-lo a nih pawh-in India ram khawpui atang te pawh-in, kan khawpuiin a mamawh em em thil siam dan hre turin, a design tu architect/ Engineer te nen fangho ta se, kan excursion te pawh hi, kan ram-in kan hlawkpui deuh mahna le. 

Ringtu tha, kohhran hruaitu Nu leh Pa te pawh hian kan fa lehkha thiamthei tak te hi Zoram chhung siamna/chawikan na tur sum eiru mai mai tur a fuih/zirtir lovin, mithiam, mi dik leh taima, ram ti hmingtha tu, Pathian leh mihring tan a mi rinawm ni turin i zirtir thin zawk ang u. Zoram chhungah hian School tha tak tak a zirtirtu te hian – Kan naupang (zirlai te) hi, lehkha thiam leh zirsang ni tur chauh ni lovin, India ram pumhuapa midik, mi taima, mi rinawm ni tur – hrual chhuah  thei thin ila a tha ngawt ang.

India hian min enhrang nge India hi kan en hrang? India hian min enhrang tih hi a dikna chen a awm ang. Mahse enge a chhan, keimahni hian kan enhrang zawk te pawh a nilo maw? Nepali pakhat Pachhunga University College a zirchhuak, Pokhara Standard Chartered Bank Ltd. thawk ta in a sawi a, ” Mizo chu in fel, in society te, sakhuana te, in tlawmngaihna te, engkim a tha ka ti vek, mahse thil pakhat thalo tih ka nei a… chu chu VAI VAI ..in ti khi a ni” a ti a, a ti dik viau-in ka hria.  A tir atang-in kan inzirtir dan alo dik tawklo nge? Kan inhmu fuh tawh lo deuh a ang viau.

Mihring-in kan zir a, mawi tak leh zahawm taka kan awm a nih chuan, kan Indianpui te hian min ti unauvin min chhuang ve hle-in ka hre thin. India ram pawnah phei chuan min ti unau leh zual. Vawi khat chu, Conference kan neihna pakhat-a, Nepal ram ai ka awhna ah, Indian lehkha thiam leh mission hotu ni pha thiau pali te nen lift (elevator) ah kan chuang hova.

Nepalah kum engzatnge ka awm tawh tih min zawt a, kum 14 a ni dawn ta ka tih chuan, ngui deuh raih hian, “chu kan ta i ni tawhlo tihna em ni?” (So you are not belong to us anymore? – ama tawngkam ang ang-in) min ti ta a……….a tawngkam chuan ka rilru a khawih thui hle, an ngaihsan zawng leh an zah zawng a kan awm chuan – min enhranna ka hmu miah lo !!! Hnam upa leh mithiam tamtak awmna ram a ni – an rilru a zimlo. Keimahni kan lo fair-loh hmasak thin avang te pawh a ni thei awm e. Min enhrang/min hmusit kan ti a nih chuan a chhan a awm ngei ang, keimahni lam pawh- kan in enfiah pawh a tha.

A dik tak chuan, mi tamtak chu, Zoram kan pel thla dek dek a, kan kristiana kan dah tha tan a, ruih theih thil kan han zawng nghal a, kan han rui chiah mai hi chuh.., fing ber, thil hre ber, huai ber, kan han ni tan a. Hnam dang te chu dawrkai an ni emaw, restaurant a ni emaw, taxi pu, Rickshaw pu, traila pu, vai mistiri, kuh va zuar lam-in kan hmusit, hnuaichhiah – vai hma vek tawh mai a. Pathian thu han hrilh lam chu a hla ta thin kher mai. Ringlo mi, Pathianthu la hrelo an tam tial tial a, Pathian thu hrilh duh na rilru a hla tulh tulh mai ta thin a ni.

Sumdawn kan uar hle – Kristmas dawn hnaih phei hi chuan mission field tlawh a lar hle thin. Chutih hunah chuan, sumdawng kan ni deuh fur awm e. Christmas dawn hnaih a, Tripura lam a work-Camp kal emaw, hotu mission field tlawh a kal tamtak te thleng in, (min an chah vang te pawh a niang, kalna senso tal hmuh let leh duh vang pawh a ni ang e) – mi in min chah tlat mai si a…. tiin, an bawr haw thei hle – an ti. Kan kalna lam apiangah – kan awm duhdan te, kan ti ti duh zawng te, kan ke pen duh dan te hi – Chanchin Tha nen a in mawi em? Ram rethei leh Kristian ram ang pawh a hriat ni lo, Brazil ho, World Cup Football a an han champion chiah mai kha chu – an mahni nihna (identity) diktak – Kristian –Lal Isua zuitu an nih kha khawvel-in anlo hmu ta a nih kha.

Vawikhat chu American missionary Pamela Seawards in “Kalkota a hotel pakhatah ka thlenga, ka room piah lawkah Mizo nu ‘sumdawng pakhat’ a thleng ve a, mei a zu khu hluah hluah – beer te a in bawk a. Pathian thu hrilh ka han tum a – ‘kristian ka nia lawm’ te chu a la ti leh nghal a – Mizo kristian te hi hetiang hi em ni an kristian dan” tiin min zawt a, a zah thlak duh hle. “Nu leh pa lo kristiana avang a kristian hmingpu, nominal Kristian engemaw zat an awm a, piangthar ‘born again’ kristian eng emaw zat an awm bawk” ka ti ta ngawt a. Mahse ka rilru te te-in, Mizo zingah, la piang tharlo an awm meuh tawh dawn emaw ni? ‘Piangthar da leh tamtak an awm’ ti ila kan sawi fuh zawk awm e….te ka ti rilru ta mai mai a.

Mizoram hi – han thlir vang vang ila…zawlnei te tan chuan tahna leh lung ti chhe thei a tam viau mahna le. Van ram kai – Lal Isua rorelna hma a din kan inpeih tak tak em? IAS/IPS/MCS etc. pension ho te hian, Pathian rawngbawlna lam ai a, Politics khelh kan tum vek ta mai te hian rilru a ti na a, lung an ti chhia. Mihring thil tih theihna (Power) te hi Pathian pek a ni a, a pe tu Pathian hre-lovin, a pek, thil tih theihna (power) kan in chuh ta thin a. Pathian ropui zia leh Pathian thil tihtheihna hre chiang apiang-in, Pathian an bel thin.

Josepha, Aigupta Prime Minister a hlang kai tu Pathian thil tih theihna khum zo, hring fa te zing ah an awm mawlh dawn si lo. Kan that lai hun a mal min sawm-tu, finna min pe tu, min enkawltu Pathian rawng hi – kan that hunlai te-in bawl thei lo mah ila, upat lamah tal bawl tur kan ni si a. Missionary a tan chhuak thei tawh lo mah ila, mission board te din-in, missionary chawmtu kan ni ve thei – kawng chu a awm a lawm. Pathian kan belh thin loh avang-in, kan fa duhlai te drug addict lo ni-in – satan-an, inti thu nei takin, khawvel atang-in min hnuh chhuah sak mek a nih hi.….a la hnuk chhuak zel dawn si….Pathian belh na chang lah kan hre si lo.

Zoram chhan turin i tangrual tawh ila :- Indo na leh in khelhna-ah reng reng hian, va beih (attack) a pawimawh rual rual-in, min rawn beih letna laka lo in-ven (defence) pawh a pawimawh thin. Mi ram a thlarau sual-ho va bei a, Setana ram va thiat-a, Pathian ram va zauh tuma tan kan lak laiin, Setana min beih letna, Zoram chhunga, sualna-sawi zah thlak ta tak leh, Kristian te tih awm loh thil – ah reng reng hian, i fihlim ngam ila. Sum tamtak aiin, hmingthatna ngai pawimawh ila – Lal Isua min chhandamtu lawman zawng-in, a tan i rinawm zawk ang u.

Kristianna – ah te, lehkha thiamna lam te – Missionary tirh chhuah hnem lam ah te, tamlam (quantity) ah chuan India leh khawvel kan deng chhuak a ni mai thei. Mahse tamlam aiin, tak-lam (quality than quantity) a pawi mawh zawk a vang-in, kan puanven i sawi chhing leh ila. Zoram chhung kristian te – Lal Isua zirtir ni thar leh ila, kan ram chhung atangin Kristianna rimtui kan chheh vel (ram then-awm) ah lo luang chhuak se. Kan ENG, ram thenawm te hmuh-in alo eng chhuak tawh ang.

Tun-ah pawh kan eng chhuak ve viau tawh a, ZONUN MAWI tih hla kha, milian ho thiltih ni khua leh puipunna a, mipui-te awihnan mai chauh a hmang tawh lovin, kan mimal tin, milian leh mite, rethei leh hausa, a pui a pang te nun-ah lo par chhuak tawh zawk se …………………………………….Ka va han ti thin tak em !!!!!

Similar Posts:

• Zofa te leh kan kristianna
• Mizote hian kan sakhua dik kan vawn hun chuan
• Sual
• Kristianna leh a Hnamzia..
• Mizo-na hi eng ber nge?

Recent Posts:

• ZU HI SUAL A NI LO, A IN A TE PAWH AN SUAL HEK LO
• Like!
• LUNGHNUR
• SADHU SUNDER SINGH-A CHANCHIN ROPUI CHU:
• KA ṬAHPUI LEH SI ṬHIN

This entry was posted on Monday, May 3rd, 2010 at 3:11 am and is filed under Opinion. You can follow any responses to this entry through the RSS 2.0 feed. You can leave a response, or trackback from your own site.