Inentirna pawna zi nuai nuai karah chuan nupa la valai tak awm ve ve hi ngawi rengin an thu duna, an nu zawk chu a lo inhnit fap fap a. Kawngkhar vengtu hnenah chuan “Khawngaihin min luh hmasaktir thei hram ang em? hei, rei kan daih tawh dawn lo a ni” tiin an nu zawk chuan khawngaih a rawn dil a. Kawngkhar vengtu leh a lo kal hmasa te pawhin hrethiamin an luh hmasaktir a. “Ka pi, in va rawn kal tlai ve, a tirah rawn kal tur che u a lawm, hetiang te chu zai pawh ni ila, beisei a sang tawh lo khawp ang, tiin Senior Doctor pakhat chuan a hrilh tlang nghal a.
A ni chuan, “Ni e, kan hrethiam, zai lo pawh ni ila rei a daih dawn chuang lo, mahse, beisei chhete kan la neih hi min tihhlawhtlin sak mai rawh u” tiin beidawng leh rilru mangang tak siin aw tham chial chungin a ngen a.A pasal lam chu a hawi phei a, a ni chuan “Ni e..” tih bak engmah a sawi lo. Mawhphurhna an lak ngam thu an ziah hnu chuan zai tur chuan buatsaih a ni ta a.
Malpui ruh tliak a ni a, atirah a nih tur anga enkawl a nih loh a vangin hnai a rawn la a. A malti pawh rawn puam ulh tawhin, khawih zawng pawhin a dup dul thei a. Rim pawh a nei tan viau tawh a ni. A taksa chu a la lum ther ther a, a mit meng erawh hmuh tur a awm tawh meuh lo. A zawi tawh em em mai a, a hminga auh pawhin awmzia a nei tawh lo. A marphu leh a thaw te ka han enfiah hnu chuan marphu reng hmuh tur a awm tawh lova, tih dam zawh rual lohvin THI a lo ni ta reng mai.
“ Ka pi, theihtawp chhuah kan tum nain kan chhan hman ta lo a ni. A pawi hle mai” tiin ka hrilh a. In sum tur a awm tawh lo, a tap ta hawm hawm mai a; a pasal, a bula ngawi renga lo thu pawh chuan inti-pachang tak mahse, lungchhia tih hriat tak si hian “ E , a ni maw!” tih bak sawi tur a hre lo. Lungchhe tak chung chuan heti hian an hmangaih em em an UI vulh thi ta chanchin chu a sawi ta a
“Kan nupa hian kum nga lai chu kan innei ve tawh a vanduaithlak takin fa kan nei thei lova. Ran hi kan ngaina em em a, tuna kan ui pawh hi fa ang maiin kan en a, inchhungah pawh fa cheibawl takin kan cheibawl thin. Khawilo kan chhuahnaah kan hruai zel a, a tel lo chuan kan khawsa thei lo a ni ber mai. A ni pawhin min ngaina em em a, kan tan hian a rinawmin, fa nei thei lo mah ila min tihlim em em thin a. Mite hnenah pawh ‘kan fanu’ kan ti mai thin.
Tumkhat chu kan hriat lohvin kawngpuiah a lo chhuaka, motor lian chiin a chila, a malpui ruh a khawih niin kan hria a. Khawpui daifema awm kan nih avangin damdawiin han panpui mai kan tan a awl ai lo hle a, kan thiam ang angin kan enkawla, heti em thleng turah kan ngai lo. Mahse, kan rin aiin a lo na a, hliampui a lo tuara, hrehawmtakin a lo tuar tlawk tlawk a ni si a aw. Aw! mihringte angin tawng thei se la chuan kan rinthuin kan lo enkawl ve tawp lo tur. Tunah chuan engmahin awmzia a nei ta lo. Kan hmangaih, fa tluka kan ngaih, kan nupa min tihlimtu ber chu khawvel awm chhung zawngin kan hmu tawh dawn lova, khawvel tawp hnu pawhin kan hmu tawh dawn chuang lo a ni “ tin mittui tla zawih zawih chungin min hrilh a.
Ka ngaihtuahna a kal thui hle mai. Mihring te chuan thihna hi kan tawp hlenna tur a la ni lo tiin ‘Thih hnu nunna’ kan la beisei a, Kristiante phei chuan vanramah lungduhte kan la intawkkhawm leh ngei ang tiin beiseina eng tak kan nei. Mahse, ran duat taka kan enkawlte erawh zawng thih hnuah hmuh leh beisei tur reng an awm tawh lova, a tawp tawp mai a ni. Kan sawi tak nupa te pawh khian fa tluk hialin an ngaina a, fa enkawlin an enkawl a; amaherawhchu, chu an fa chuan boral sanin thih hnuah tawn leh ni reng beisei tur an nei tawh lova, khawhartak leh thih hnu beiseina bo tak chungin an hun leh nite an chhiar tawh dawn a ni.
