Ka rilru a a awm dan ang chiahin a heading hi ka phuah fuh hlei thei lova, mahse chhiartu chuan in hrethiam thovin ka ring e. Social Networking Sites hrang hrang-FB, Orkut, mi(sual) ang te hi ka en fova, contribute chang ka ngah a, silent observer ang te pawh ka nih chang a tam mai.
Post hrang hrang te ka chhiar a, comments te pawh thawhtu kan tamin mi chitin tan platform tha tak chu ani ngei mai. Mahse ka rilru ah he ngaihtuahna hi a lo lut leh tlat thin- virtual world a tuma hriat hleih theih lohva kan ngaihdan kan tarlan tam ber hi a tak ramah, min hre chiang tute bul ngeiah hian zep then nei hauh lovin kan sawi ngam ang em? tih hi a ni!
ZU chungchang mai mai te hi example ah lo hmang ta ila. Kei ngei pawhin ka hriat fo tawh chu kohhran hruaitu thenkhat hi zu chungchanga an ngaihdan ka zawh a an sawi leh a sawihona hmun dang – inkhawpui/conference/talk show ah te a an sawi dan hi a dang leh fo si thin. Chuti anih chuan hnam dawihzep tak kan ni tihna ani thei em? Mahni nihna dik tak anga lang chhuak ngam lo hi kan pun phah ani thei ang em?
Hetiang zawnga ka ngaihtuah chang hian he mi(sual) platform ngei te pawh hi a ropui a, thil tam tak ka zir phah rualin ka ngaihdan ang hi reality ah ka puang ngam ang em? Nge mi tam zawk thlekna lam apiangah ka thle anga, ka tuar theih loh tawpah ka virtual nick hmangin ka ang leh nghek nghek reng dawn? Benjamin (admin te zinga mi) hian a hming tak a hmang reng a, ngaihsan awm ang reng fu mai – nick hmangin a lo comment ve fo thin em tih erawh ka hre hauh law 🙂
He virtual world hi a tangkai theihna lai tam tak a awm a, kei pawhin ka chhawr hle. Chutih rualin keini hnam la naupang tak, mize nghet pawh la nei fumfe hlei thei lo, a changa Gothic (NOI), a changa Emo, a changa Bamboo Dance tih ang vela thle kual mai mai tan hian Malsawmna nge anih anga Anchhia tiin dawihzep takin ka ngaihdan ka han au chhuah pui ve leh phawng mai a ni!
