Duhtak Mizo Kristiante
Tunlaiin Sakawlh Number 666 in lo inrindik siak leh ta tih ka lo hriatin a pawi ka ti thin hle mai. Engah nge kei No. 666 hi kum 100 Kristiante’n min la hai fo le aw? Tirhkoh Johana hnena in Lal Isua Krista Thupuan chhuah hi, Mizoram Kristiante hian ram dang zawng zawng aia zalennaah hian in hrethiam phak tak tak lo a ni lo maw? Thupuan hunlai anga tihduhdahna tak tak in tawrh zet loh chuan emaw nikum lama Orissa rama Kristiante chunga thil thleng angte kha tuar zet lo chuan Lungthu tlawhchhanin muangleiah ka chungchang No. 666 thuah hian rindan lo neiin lo siam ngawt ngawt suh u khai. Ringtu dawihzep, Khumpui leh Tapchhak inkara ringtu huaisen nia inchhalte u! A ram leh a felna hi zawng hmasa zet ula, tichuan in nung ang. Biakin leh inkhawmna hmunah Vantirhkoh ang dawnin in awmin in che a, Biakin pawnah lem engmah tih/sawi serh in nei leh si lo. Nangmahnia ka awm lai reng pawhin “chumi khami chu Sakawlh, Number 666 nei a ni” in tih thin hi. Kei min hai ang bawk hian in Pathian nangmahni dintu ngei pawh in hai hi le !
Ringtu thatchhia, a thawh a thawh fel tum lova, a sawi a sawi fel tumte u, in rama corruption/hlemhletna chi hrang hrangahte, thatchhiatnate, hurnate, ruihnaahte ka awm lai reng hian mahni inphen tum ang ziazangin tu tute emaw, eng eng emawte hi kei, Sakawlh emaw in lo ti thin a ni maw? Min hai der nge, min hai tak tak? Min hai tawh lohna turin ka han inpuang law law mai ang e – Kei chu in Bible-a in hmuh angin in Lal Isua Krista Dodaltu ka ni. Thatnate, mawinate, duhawmnate, rinawmnate, diknate, zalennate, thuhnuairawlhnate, inngaihtlawmnate, Pathian tihnate, Kohhrante, Thlarau Thianghlima khahnate, inkhawmte, Pathian fakte- heng zawng zawng hi ka dodal vek. Chiang leh zualin ka nihna ka han hrilh ang che – kei chu, sualnate, rinawmlohnate, duhawmlohnate, diklohnate, zalen lohnate, chaponate, Pathian tih lohnate, Kohhran ho donate, Thlarau Thianghlim duh lohnate, inkhawm duh lohnate, Pathian fak duh lohnate – nangmahni a awm fo thin chu ka ni a sin. Hurna ka ngaina a, eiruk ka lawm a, hlemhle tak a thil tih hi ka ngaina a, zu ruih leh damdawi ruihte hi ka lawm thin. Politics-ah thianghlim lohna tuh turin ka thawk thin a. A chang phei chuan Kohhran hote pawh hi ka indo tir thin a. Bul ka tan tawh chuan an mahni leh anmahni an indo tawh mai thin. Chung Kohhran insual lai ka hmuhte hian ka lawm thin. Lakluh aia hloh tam zawk zelin ka siam thin. Chumi chu, amah chu ka ni. Nangmahnia thawk thin sual inthukphum tlata chu a ka ni a sin. Miretheite in rahbeh laite ka lo hmu thin a, thingtlangmi, Lo nei mite in ngaihthah zia ka hriatte hian ka lawm teh thin a sin. Kei hi min hlau tak tak in nih chuan heng ka thil lawm zawng zawng zawng hi tlan san vek ta che u!
Ka nihna leh keimah ngei min hai thintute hi hman atang tawhin in la pangngai reng a, Kohhranho awm tha hle hle lai in tiphawklek a, ka lawm khawp thin mai. Titiautu tenawm in ni hawt e. Kei, Sakawlh duh zawng takin Kohhran hote zirtirna tluangtlam tak chu in chawk buai thin a ka lawm thin a ni. Ka thu ruk inthupte puang chhuak lo tura ka duhte nen lam Media (Local TV)-ahte in puangchhuak a, a puangchhuak duhtu Media neitu ngei pawh hian sum hmuh nan bak min duh si lo. Amaherawh chu, khawihah tehlul nge kum 2010/11 chhiarpui hi kei ka nih ang le? He chhiarpui hi a zawh hunah eng nen nge min hmehbel leh dawn pawh ka ring thei nghal, mahsela, ka sawi rih lovang.
