Sakhuana avanga kan hming sak/phuah dan phung lo danglam nasa ta lutuk hi eng nge inngaih ve dan? Pathian lam hawi hming tha leh nalh tak tak kan pu ta fur mai. Hei hi a that viau rualin, hmanlai kan Pi&Pute hming sak dan phung kan thlauthla ta lutuk erawh kei chu ka ui angreng thin.
Hmanah chuan Hming atang ringawtin chhungkaw History engemaw chen kan inhriat sak theih a, eng ang chhungkua/ mize pu nge an nih tih nenlam kan inchhui thei bawk. Ka thianpa Pu hming chu Tlangthangvela a ni a, a Pi hming chu Khualtinluti a ni. Khi an hming atang khian eng ang chhungkua nge an nih a, an thlahtute eng ang mi nge an nih tih engemaw chen chu a hriat theih a ni. Tha kan ti nge, a tul tawh kher lo kan ti?
Chutiang zelin Pahlira, Nuzawni, Khawsata, Ralkapa, Riangkimi, Khualkungi, Kaphranga, ect… Tunlaiah zawng eirupa pawhin a tupa hmingah ‘Rinawma’ a saa, Zu ngawlveipa-in a fapa hming a tan ‘Lalrawngbawla’ a’n sa ve leh chawt bawk a. Uirenu-in ‘Lalthianghlimi’ tiin, a fanu hming a phuah hreh hek lo.
A mawi zawng ringawt zawngin hming kan saa, naupang sak tir ta mai mai lah bo lo. A satu-in a sak chhan pu zo hek suh, a hming putu lahin pu zo bawk hek suh. Nunhlima a inawkhlum a, Rinawma’n mi a bum a, Lalnunfela’n tual a that. Lalrawngbawla’n sual rawng a bawl a, Nundika a eiru tan tan reng a, Chhuanwma’n chhungkua a chawkbuai. Vanlalfela’n Zu leh Ruihhlo ngawl a vei. Pi Chhuanmawii lah thenawmte rel reng rengin a hmanhlel a, Nl. Muanpuii chu nu&pate ti mangangtu, Lalnunmawii lah chhungte ti zaktu mai. Kan hming leh kan nun a va inpersam ta em!
Hetiang tehnuaih hi kan nih tak avangin, kei zawng fapa ka neih ve hun chuan ‘Misuallawma’ emaw, ‘Arlawma’ tiin emaw ka sa ang a, fanu ka neih hunah ‘Arhlimpuii’ emaw, ‘Arnunpuii’ emaw ka sa ang. 🙂
