Unau inhmachhawn hmasa ber
Sawilawk ang ngeiin Boateng unau Kevin Prince Boateng leh Jerome Boateng-te chu Nilai zan khan an inhmachhawn a, a naupang zawk Jerome-a te ram Germany 1-0 in an chak. Kevin Prince leh Jerome-te hi pa hmun nu hrang an ni a, Kevin Prince hi a naupan deuh lai chuan Germany junior team-ah pawh a khel thin a, mahse a chawr chhuahna ram Ghana tana khelh a thlang ta zawk a, a nau Jerome nen hian an inhmachhawna World Cup-a unau inhmachhawn hmasaber an ni.
France president a inrawlh
France president Nicolas Sarkozy chuan, World Cup-a mualpho taka awm an football team chhunga buaina chhuak chu an ennawn tur thu sawi in, an ram timualphotu an player-te chuan an bonus dawn tur zawng zawng pawh an dawn loh tur thu a puang.
An player pui Nicolas Anelka thawn haw a nih avangin France team lungawi lo chuan practice pawh an practice duh lo a, a thlengtu South Africa hneh loin World Cup atangin an tla ta a ni.
He thil thleng chungchangah hian Sarkozy chuan Prime Minister Francois Fillo, Sports Minister Roselyne Bachelot leh junior Sports Ministers Rama Yade-te Nilaini khan a kawm a; Thierry Henry nen an la inkawm dawn bawk a ni.
Chawlh dil hlawhchham New Zealand
New Zealand-a Labour Party minister Trevor Mallard chuan, World Cup-a an ram game hnuhnung ber khelh nia mi tam zawkin inkhel an en theihna’n national holiday puang turin Parliament-ah a thlen a, he rawtna hi second 15 pawh ngaihven a nih hmain an hnawl.
New Zealand hian an group match tawp berah nizan khan Paraguay an hmachhawn a, 0-0 in an tin a, an tla.
Ticket hralh tur la awm
World Cup atanga France leh a thlengtu South Africa an tlak hnu ah, FIFA chuan second round ticket 5,000 chu an hralh chhuak leh ta.
FIFA thupuangtu Pekka Odriozola sawi danin, heng ticket an zawr chhuah leh takte hi team tla ta tantute lo hauh lawk a ni a, mahse an hauh lawkna chhan an team-te ber an tlak tawh avangin an zuar leh ta a ni.
Ticket an zawrhchhuah leh zinga ticket 4,000-te chu South Korea leh Uruguay inkhel tur atan a ni a, ticket 1,000 chu Argentina leh Mexico inkhel tur atana an hralhchhuah leh tawh thu a sawi.
