Zokhawthar pela Foreign ram ka han chuang kai ve hi India ram kan pelh vawikhatna a ni ve a; Tiau ral ka thlen meuh chuan thlarau mite tihdan thikin pawlna tlem ka dawng ve a … hetiangin …
Zokhawthar ral tiau kama Myanmar Sipai lu bawk-te chuan ‘thlakhat-ah India pawisa Rs. 300/- hlawh ang an ni’ an ti a. An ram dinhmun enin sual nen an tan tlan mai loh chuan nupui fanau din nan leh mahnia din khawchhuah nan hrim hrim pawh a tlem lua a ni (dailuah to zia atangin ka chhut a)! Myanmar Sipai Sawrkara an fa duat lai Sipai-te dinhmun pawh chutiang a nih chuan a ram mipuite dinhmun tur chu kan suangtuah thiam mai awm e.
Sual ni si, anmahni pawhin sual a ni tih an hriatreng, mahse, sual tia an sawi phal tawh loh te nena an inchiahpiah mai loh chuan an hringnun kalh a kim tawh lo ni te pawhin a lang. Chu rama kan thlah khat puite chu an ram thenawm, an Home-Land ni ve deuh reuh si kan zoram-ah hian harsatna em em su tlang lovin an rawn ar khual kal mai thei bawk si a. An nun khawchhuahna tur ngaihtuah chung siin pur an rawn chaw thin a. Chutak chu a ni kan lo buaipui thin chu ni a, he ram thianghlim (?) hian mutmawh hnar mawha a lo neih thin chu !
Chanchintha hril inti te pawhin an hlawkna tur ngaihtuah tel chunga sponsorship/deal an zawn chamchi-na hmun kan thennawm atanga khualtang mai mai kan mikhualte zia tur hi sawi tam ngai lovah ngai teh ang. Sual ni a an hriat ve tho, nimahse an nun khawchhuahna tur nena inphuar zawm tlat an rawn ti leh thin hi hnawk kan lo ti a, kan lo buaipui a, thawn let kan lo duh thin a ni. A bulpui ber chu an RETHEIH vang a ni. Lalna dik lo, rorelna dik lo, hlemhletna leh duhamnain a hrin chhuah retheihna hi sual hringtu chhul lian tak a ni a.
Mihring thatchhiatna leh zawmthawtnain a hrin chhuah sual hi a hlauhawm a. A aia hlauhawm chu taihmakna leh thahnemngaihnain awmzia a neih tawh loh avanga retheihna lo piangin sual a hrin chhuah theih hi a ni. Sum leh pai lalna (capitalism)-in a hrin chhuah duham luat avanga eng kawng pawh zawh hreh lohna ang chiin sual a hrin chhuah te; chu sum leh pai lalna avanga danin a thawh tur ang a thawh theihlohna te, thuneihna chu duhamna nen a kal kawp tlat avanga thup mawi chawp sual lo piang thin leh chu sual thup mawina avanga mi beidawng lo piangin sual a hrin theih zia te hi mi te tawn atang ringawta sawifiah thiam chiah ka ruat ta lo.
Kan zorama chi thalo tak tak rawn pu lut thintu nia kan puh leh kan man thin kan khawchhak unaute hi min hmangaih avanga hetia rawn che thin hi an nih ka rin theih loh thinna lai tak hi pawlna kan dawn intanna chu a ni a, mahse he pawlna hian hla min pe tel ve tlat lo! Thlahtu chhul khat chhuak, a,aw, b inang, ‘R’ an lam khat avang leh tiau rala an khawsakna chauhvin min daidang ni si, min hmangaih ve lo tute leh harsatna min siamsak tute hmangaih hi harsa kan ti a, kan rama an chi thalo tuh avangin hnawhchhoh zel kan duh a, a tul bawk si ! Kan hmangaih ve reng theih loh, A duh loh kan ti pawh ni satliah mai lo, A ram tana chi thalo tuh hial thintu zawk mihringte (misual) Pathianin heti em em maia tawp chin nei lova min hmangaih hi a mak ka ti, mihring mihrinna a chhutphak chi a lo ni lo tawp mai !!!
Tiau kamah chuan eizawnna pakhat a awm a, a hming ‘PIHLEH’ an ti. Ramri kan tu sumdawngte (diklo tak?) hruai kai hna a ni a, engtin tin emaw thuneitute hnenah sawifel sakin Black Money-te nen pawh a inkaihhnawih thei hial awm e. Sual ti a han puh mai ngaihna ka hre lova, eizawnna thianghlim tak a ni pawn ka hre hek lo. Pathian ringtute tih atana thianghlim ni miah lo, mitena an lo hamthat pui tawh leh an lo hlawkpui tawhte avanga suala kan ngaih phal tak loh hi engzat tak ni ang maw? Hausaknate, ropuinate, lalna leh thuneihna te, hlimna leh nawmna te, mawinate hi Pathian avanga malsawmna kan chan a nih ngat chuan a ropui ngawt ang; Pathian malsawmna hlu ber ni a ka hriat thung chu ‘Lungawina Thinlung’ neih hi a ni.
Eng dinhmunah pawh ding se Pathiana lawm mi, khawvel harsatna leh manganna chhumpui karah pawh Pathian fak thei mi, Pathian avanga a chan a pianga lungawia dik taka nung thei mi tluka mi awhawm leh mi hausa hi he khawvel hringnunah hian an awm theiin ka hre lo. Mi thenkhatte chuan Pathian ngaihsak hi hlawkna emaw an tih thu I-Timothea 6:6-ah kan hmu a. Pathian ngaihsak hi Pathiana lungawina tel chauhvin hlawkna a lo awm a ni tih kan hmu zui nghal a ni. Heti hian ka ngaihtuahna a kal chhunzawm nghal zat a, Burma Sipaite khan min lo hreng khawtlai ve ta se, kum li/nga hnu velah chuan eng eng emaw hi ka rawn zuar ve par par mai ang em? tih te mai hi …
