mi(sual).com

Tuna thalai tam takte an la piang lo a, thalai zingah 1983 kum hmalama piang tuna la nula/tlangvalte leh ‘83 kuma chinchang lo hre fe tawh an awm a nih pawhin kan thupui sawi tur hi chu history lam a ni tho tho. YMA history-a mahni pual chhuaka ‘YMA kum puan hmasa ber’ chu kum 1983 kum khan neih a ni a, kumpuan thupui chu ‘Sanitation Year’ (Faina kum) tih a ni. March ni 19, 1983-ah kumpuan hawnna hi neih a ni a. Ram pum huapin he kumpuan hian ngaih pawimawh a hlawhin Mizo hnam thang mekte tan faina kawngah rahbi thar pawimawh tak thlentu a ni a.

Kumpuan denchhen hian Central YMA chuan faina kumpuan thuvawn ‘10’ an siam a, YMA Branch tinah an sem chhuak vek a, YMA Branch tinten mipuite hriat turin an puang chhuak leh vek bawk a ni. 1983 kuma Faina kumpuan thuvawn CYMA-in a siamte hi han thlir let dawn ta ila, kum 27 lai a liam tawh a, he thuvawn hi kan kalsan thei tawh nge kan la mamawh hle tih kan ngaihtuah theuh dawn nia. Tichuan, ‘hmasawnna kawnga hnam thang chak tak kan ni’ kan intih lai hian eng nge kan dinhmun kan hre thei âwm e –

1) Fai leh thianghlim hi nunphungah ka nei ang – Thuvawn pakhatna hian mi mal chanvo a kawk nasa bik hle a. Kan inchhungkhur enkawl danah te, kan khawlai chet tlatnaah te, puipunnaah te leh mahni in leh a vel enkawlna kawngah te kum 27 kaltaa kan thuvawn hi kan bei tan dawn chauh niin a lang.
2) Vantlang Zun Inah ka daileng mai mai lo ang – He thuvawn hi chu a mi nawlpui hi chuan kan kalsan tawh; mahse mi nawlpui aia hnuai zawk nia inngaite’n hnuhma min la hnutchhiahsak fo mai, he thupui hi kan la thlauhthla ngawt thei tlat lo.
3) Mahni Inah bawlhhlawh bawm bik ka nei ang a, mi dang tana hnawk lo tur hmunah ka paih thin ang – Bawlhhlawh bawm neih loh chuan chhungkua a din theih loh ! Mahse, mi dangte tana hnawk lo tur hmuna paih zat zat thei tur erawh chuan he thupui hian min kalsan hrih lul suh se.

4) Ek In ka nei ang a, chhinna tha tak siamin fel fai takin ka vawng ang – A thing kan tih viau a rinawm. Tunlai huna thuvawn siam chu nise septic tank sah ngawt lo tur te, mi dangte tana septic tank rimchhia ti chhuak lo tura fimkhur turtein Mizo kristian-te hi kan inchah ngei ang le.
5) Ka ranvulhte hi mi dang tana hnawksak lovin ka khuahkhirh ang – Kum 27 kaltaa YMA faina thuvawn ang chiah mai hi sawrkar dan dinglai kenkawh mek a ni a, kan zawm hleithei lo. Presbyterian Kohhran phei chuan Nilai zan thupuiah te nikum khan an zir hial zawk zuk nia!
6) Ka In leh a vel fai takin ka vawng ang – Mahni in leh a vel vawngfai thin vek chhungkua ni ila vawiina ka article hian kawng a bo daih ang. Kum 2010-ah hian faina lam kan sawi apianga kan infuihna chu he thuvawn hi a la ni reng !

7) Khawlaiah leh a hmun lovah bawlhhlawh ka paih lo ang – He thuvawn kum 27 kaltaa mi hian kan Mizo hnamte hi min tiharh se chuan kum 2010-ah hian ‘Singapore-ah chuan’ kan ti kan ti lovang mawle! Hei lo liama chhuan beng tla lo…!
Vantlang hmun hma ka ti bawlhhlawh lo ang – Mahni Pathian biakna hmun pawh vawngfai hleithei lo hnam hian he thuvawn hi engtin tak ngai ang maw? Kum 27 chhunga Mizoten kan pass chhuah hleihtheih loh thuvawn a ni ber mai.

9) Bus chhung leh puipunna hmunah bawlhhlawh ka paih lo ang – Kum 2007 khan City Bus leh Taxi chhungah bawlhhlawh bawm hun an rawt chhuak a, a thlawnin an sem a, kan hman tangkai lutuk loh avangin ching zui an awm ta mang lo. A letling zawngin kan kal hial zawk em ni le!
10) Kawng laiah chil ka chhak lo ang a, ka mei bung leh Sikret bawm ruak emawte thlah dah takin ka paih mai mai lo ang a, paihna hmun dik takah ka paih ang – Kan Pathian Biak In kawtah ngei mai bawlhhlawh bawm kan hun pawhin bawlhhlawh bawm sira chilchhak leh zuk leh hmuam tihna hnu la paih zel mai hi kum 2010-ah hian an la awm teuh mai. ‘A hmun dik taka bawlhhlawh paih ching hi kum 1983-ah khan nge tam ang kum 2010-ah’ tih research beih theih nise la, eng result nge kan hmuh ang aw?

Information technology, Cyber society, Globalization, Wi-fi system, Stadium puitling, Shakira ra ra etc. ti chung zela EPL leh Hollywood kan chawhpawlh mek lai hian kum 27 kaltaa Mizote mamawh, faina thuvawn 10 (sawm)-te hian mual min la liamsan thei tlat lo, chumai ni lovin, heng thuvawnte hi kan mamawh zual ta zawk em ni le? Ram hmasawnna leh changkanna kan tih ber hi eng hi nge ni ta ang le? Tute hi nge changkanga, tute hi nge hmasawn lo tih tehna tha ber nia lang chu- an thiamna leh an hausakna etc. aiin an faina atangin en thin ta ila kan ziaawm dah law maw?

Similar Posts:

• Bawlhhlawh paih motor
• Ek, leivung leh bawlhhlawh paih suh !!
• Funny te veng mawi piah lamah
• Vanglaini-in i thlalak a duh e
• Hmuifang tlang a fai ta vuk mai!

Recent Posts:

• NUN THÂMRAL
• President Trump ka hmuhdan (amah thlawptu lam atangin)
• YMA LIBRARY ENKAWLTU TEN SEMINAR & TRANING KAN NEI
• February 2017, Mizo(ram) Diary
• misual.com tih tawp a ni dawn?

This entry was posted on Wednesday, July 28th, 2010 at 2:01 am and is filed under Opinion. You can follow any responses to this entry through the RSS 2.0 feed. You can leave a response, or trackback from your own site.