mi(sual).com

Hmuifang MI hunah kan kal ve thei awm si lova, in han in chibai luai luai hunah he Post hmang hian min rawn hre reng dawn nia. MI hlawhtling taka a awm theih nan in zavaiin CHIBAI ka buk a che u.

Bung 1-na

Pu Thangchhunga, Hunthar Veng chuan heti hian a sawi a, “CHIBAI hi Mizo ho hian kan nei lo reng reng alo ni awm a, Kristiante lo awm hnua kan neih chauh a lo ni. Hmelhriat, laina, thian tha inhmuh ni khuaah pawh in dam tlang em? In thlawh hma a tha em? Ar talh/zu in zuk ni maiin a lang a, inthlahna atan dam takin a nil eh mai a, tawngkama in lawmna “Wel-come” (tulai tawngin) tihna hi kan nei lo a ni.

Kan Missionary-te’n Kristian Sakhua an rawn phun a, inhmelhriat ngaih awma kan neih te, intawh ni khuaa lo inlawmna tawngkam mawi kan nei lo tih an rawn hmuhin pawi an ti hle a. Pu Zosaphluia (Rev. D.E Jones) lo awm khan kut thinga chibai buk hi min rawn siam sak a, a hmingah CHIBAI a vuah a. CHIBAI tih hi hmanlai Mizo Puithiamte’n inthawina hla an chham dawnin CHIBAI an ti thin a, chumi an tih, chibai an han tih chu an hla sak tur/chham tur ‘Key” zawnna thil chi khat hming awm lo niin a ngai a (a dik reng a).  Mizote malsawmna indilpuina hmingah a vuah ta a, Chibai tih a ni ta a ni.” [MUP Tlangau December 1999 Page 21]

Bung 2-na

Pu P.C. Kapzinga, Keitum chuan CHIBAI awmzia chu hetiang hian a han hrilhfiah ve thung a. “Chi hlut zia leh van zia, harsat si zia kan sawi tawh a, chutiang vang leh harsa kara chi, baia thlak khawp, chi tel ngeia bai duhtawk ei chu induhsakna ropui tak ani. Chutichuan CHIBAI kan chibaia te kha duhsakna sang tak kan hlan, pe tihna a lo nih chu. Chi van em em laia baia thlak khawp, chi tel ngei a bai in eitir chu induhsakna vawrtawp a niin chumi zul zui chuan CHIBAI tih hi a lo awm niin Upa ka kawmte chuan an sawi” [MUP Tlangau March 200 Page 14]

Bung 3-na

Upa Lalsanga, Hmunthar, Kulikawn Veng chuan Chibai lo chhuah dan chu heti hian a sawi ve leh bawk a. “…..a hming rawn siamchhuaktu Pu Zosapthara leh a hun lai a Kristian hmasa Pu Khuma te, Duma te, Chawnga te, Thanga te, Chhinga te,  Dokhama teho nen a an siamchhuah a nih thu leh amah Zosapthara awphawi ang tak leh a tawngkam ang taka LM Chhinga’n from KRISTIAN TLANGAU 1963 JULY Phek 36ah a ziaka, a ziak ang angin hei ka han ti chhuak a, a ngaihnawmin a lunglen thlak a ni. Vawna dah that reng tlak a ni e. Hei kei pawh 1963 a mi ka lo la vawng tha hi a tha hle in ka hria.”  [MUP Tlangau May 2000 page 12]

Pu Zosapthara sawi a tawngkau chheh dan leh a ziahdan duh zawngin ka ziak ani-L.M.Chhinga

He tawngkam pawimawh tak kha, Duhlian tawng khan a awm love, chutin keinin kan lo ngaihtuah, a siam zia tur kan sawiho, “SALAM” tih duh an lo awm, chu chu vaiho tih dan anih avang khan, keinin Duhlian tawngtak kan lo duh, din, midang leh chuan ‘DAWVANKAI’,  an lo rawt, kan nui bawk hle,  din, keinin Bawrhsapte in biak dawn khan in tawnghmasa insawi kan lo zawt, ‘ka pu’, kan ti an tih in a dang kan lo zawt, putar a nih leh ka pu kan ti a, pa vanglai a nih chuan ka pa kan ti a an lo tih khan enge hman tur kan hre lo, din ka ka lo tawngtai kha chutin a dang ka lo hria, nangmah ni sakhua in biak lai khan nangmah ni tawng hmasa kha a awm em?

Ka lo ti a, an ni khan Puithiam khan mi a thawi khan a hmasa a sawi  kha “Hai chibai” a lo ti thin, an lo sawi khan chu chu a tha in ka lo ring ta, Hai chu Key lakna ani awm e. Chutin “Chibai” tih kha kan lo hmang ta, a awm zia tak kha sipaiho attention ang a ni awm e, kan duh na ber erawh chu Hebrai ho tih dan “Shaloam” an lo sawi chu malsawmna an lo sawi, siamtu I chungah tha rawh se an lo tih na kha kei nin chibai kan lo tih nen khan thuhmun kan duh”  tiin

Bung 4-na

Pu Lalzidinga Sailo, B-9/Khatla chuan “He tawngkam pawimawh tak ‘Chibai’ tih hi a phhuah chhuaktu leh siam chhuaktu chu Lungleng Lal Pu Khamliana Sailo, Kaisar-I-Hind, fapa upa ber *Pu Dohleia Sailo, W.Lungdar Lal a ni a. Kum 1905-1908ah Shillong Govt. High School-a a kal lai a, kum 1906 kuma Pawih ho thiam hla (inthawina hla) atangin ‘Chibai’ tih hi a chherchhuakin a siam a ni” a ti ve leh bawk a [MUP Tlangau September 2000 Page 7]

*(WWI hun laia France ram kal 1917 khan Headman a ni )

Bung 5-na

Pu K.L.Liana chuan “’Chibai’ han tih hi Missionary Sapte tihchhuah ni lovin, ‘Chi-al’ a van vanga ‘Chibai’ lo tih tak pawh ni lovin, kan Mizo tawng pakhat ve mai a ni zawk a. Tunlai chuan hmelhriat inhmu khat deuh emaw, hmun danga awmte kan inhmuhin emaw, aia chung zawkte emaw kan biak dawnin kan hmang ber a. Kut thing meuhin kan in chibai thin bawk. Hmanlai chuan Pathian emaw, Ramhuai emaw, an aia chung leh thiltithei an biak dawn a an hman thin a ni a. Kan Missionary-te lo kal hma, thingbul lungbul biak lai atang daih tawha an lo hman thin a ni.” tiin a sawifiah ve thung.  [MUP Tlangau July 2000 Page 13]

Enge misual te kan ngaihdan le?

Similar Posts:

• Alex Ferguson ka Chibai ve a
• Mizorama Kohhran(Biak In) hmasa ber ??
• Thlak
• Chaw duh vanga Kristiante leh Krismas
• 2014 Chibai inbuk tawn nan

Recent Posts:

• mi(sual).com hi!
• KA MITTUI A TLA!
• ȚAHNA NUNHLUI
• March 2017, Mizo(ram) Diary
• NUN THÂMRAL

This entry was posted on Monday, August 2nd, 2010 at 3:00 pm and is filed under Opinion. You can follow any responses to this entry through the RSS 2.0 feed. You can leave a response, or trackback from your own site.