Bible-a Pathian thu-in Pathian thilsiam chungchang a sawite (creation theory) nghet taka pawmtu ka ni a. Pathian ringtu, a thute pawm tlattu ka ni chung hian Bible-a thu inziak zawng zawng erawh a kip a kawia pawm harsa ka ti ve deuh thin a (… ChanchinTha bu-in Isua thlahtu bul a chhui dan inang lo lutukte, Isua thlan entura nuho kalte chungchangte leh an kal hunte etc.. hi pawm zawk tur ka hriat loh hlawm avangin …). Pathian ka rinna leh a thu ka pawmna erawh chhete mahin a khawih buai lova. Mahse, A thu zawm famkim erawh hi chu kei mi(sual) tan hian a har teh zawng a nih hi.
Thuhma sepsel te te ka neih tehduah nachhan hi ka dawihzep luat vangah ka puh ber a! A chhan chu … Evolution Theory pawmtu … Kohhran sawiseltu … etc.-a min puh ka hlauh em avang a nih ka ring, kei ringtu inti hian. A bu chhunga thu tha tak tak leh zirtirna tha tak tak 99% inziak sawi silova lehkha phek hlai taka chhun han dum te tak takte ka han hmuh tlat avang hian mahni in rinhlelhna lian tak ka neih phah nghe nghe a, ka inthlahrung hle bawk.
He post-a picture lo lang hmasa ang khian Mizoram Presbyterian Kohhran (Synod) hnuaia Mizo Sunday School Union-te chuan Sunday School Department hrang hranga zirlaite hi kumtin a indawta zir turin bu khatna – bu thumna thleng an siam tlangpui thin a. Ka hriat sual loh chuan he zirlai bu ka sawi tur hi kumthum dana vawi thum an zirna a niin ka hria.
Kum 5 kalta vel kha niin ka hria, science zirna lama mithiam pakhat ( Phd. Degree nei, HOD – Botany Deptt. PUC ) chuan he zirlaibu-a thu diklo nia lang hi a tihdikna ni a a hriat nen a lo sawi chhuak tawh a. Mahse, kan sakhaw puithiam ten an tim nek a, ringlotu, Bible pawm lo a evolution theory pawmtu zawk angah an puh dawn lek lek ta mai a, ka tim phah hle mai. He zirlaibu-a zirlai pakuana (phek 33-na)-ah chuan Charles Darwin a thih kum sawiin, “a thih dawn hnaihah chuan inchhir em em leh hreawm takin a thi niin an sawi”, tiin a sawi a. “Amah leh a zirtirna dotuten tihhmingchhiat an tumna mai pawh a ni thei e” tihin dawi aw takin a thu a tlip leh zui a, mahse zirlaibu-ah a ziak si !
Europe rama Kohhran lian thenkhatten Charles Darwin-a thih dan chungchang leh a chanchin diklo taka an thehdarh sak avanga a thihhnu kum tam taka ngaihdam an dil hnuhnawh leh si (Evolution theory an pawm tak vang nilovin) laia hetiang thu belhchian dawllo lutuk mai Kohhran lian taka tleirawl/rawlthar-te lo zirtir hi a dik ber em le aw ? He thu thehdarh tu hmasa nia lang Lady Hope-i hian USA-a Kristian chanchinbu-ah 1915 khan (Darwin-a thih (1882) hnu daihah) Darwin-a inchhir thu leh a inlamlet thu a vawrh darh niawm a ni a. Darwin-a fapa Sir Francis-a’n Hope-i hnêna chhuahchhalhna thu a thawn pawh Hope-i hian a chhâng ta lo ni a sawi a ni.
Tin, Darwin-a dawm hlumtu a fanu Henrietta-i pawhin ‘The Christian’ chanchinbuah February 23, 1922 khân hetiang hian a chhuah hial, “Ka pa kha thihna khuma a mut laiin ka awmpui reng a, Lady Hope hi ka pa thih dâwn emaw damloh laiin emaw a lo kal ka hre lo…Ka pa khân a thil thlîr dân kha a sût chhin ngai lo. A inlamlêt thu hi USA-a an phuahchawp niin a lang, thu belhchian dâwl lo a ni”, tiin. Amah Darwin-a ngeiin a hun hnuhnûng lama a lehkha “An agnostic would be the most correct description of my state of mind,” tih leh a nupui Emma hnêna a thu hnuhnûng, “I am not the least afraid to die,” a tih te hi kan sakhaw puithiam-te hian an lo bih hmaih palh pawh a ni dah ang e !
Darwin-a hian a zirtirna leh a theory avangin thlarau tam tak a hruai bo tawh ngei ang. A theory hi kan Pathian thu nena inkalh tlat niawm a ni a, pawm a har reng bawk a; mahse, ama chanchin sawi chhiatna thu belhchian dawllo nena tang chunga naupang zirtir hi a fuh ber em le (?) ka ti ve fan a ni.
He zirlai tho phek 35-naah chuan, “Thisen Group then dan kawngah chuan Mihring thisen leh Thlai thisen a inhnaih ber bawk” tih ziak a awm leh a. Hei pawh hian kum 5 kalta vel khan Science zirna atanga thu diklo tak a nih zia hmangin sawiselna a tawk tawh bawk a … “a sawiseltu tu sakeiin seh”.. tih ang deuh a ni e. Engpawhnisela, thlaite hian thisen an lo nei ve reng em ni le ? Lo nei ta sela eng thlai ber hi nge niang le ? Science zir mi ka ni lova, ka bo hle mai. Mahse, lehkha ka zir chhung zawngin thlaiin thisen a neia an sawi leh an zirtir ka hre ngai tlat lo! Presbyterian Kohhran-a kan tleirawl/rawlthar-te hi thlaiin thisen a nei anga zirtir an nih tlat si chuan Tirhkoh Paula lehkhathawn tlukin an ring ngei ang le? Enge thudik ni ta ber tih hi ‘sipai bo ka bang’ ta map mai.
2007 kum kha ni tain ka hria, senior deptt. zirtirtu ka nih ve laiin a zirlai bu ziaktu hi telephone hmangin he thu pahnih hi ka zawt tawh a. A ziaktu pa chuan “ni e, kha thu kha ka subject lam a ni lo va … zirlai bu chhutu hnenah pawh lo thai bo tawh rawh u ka ti a sin mawle ….. kha a rawn lang leh si a”, tiin min chhang a, kum 2010-ah a rawn lang leh bawk si a, ka buai zual a ni ber mai.
Science lam mi thiamte inrawlh vat na chi a ni em aw? Zirtirna diklo hawtu Kohhran thianghlim-te hian mi chanchin diklo takin kan lo zirtir reng em ? Science zirna hi diklo takin kan lo pawngsual reng em ? Nge a post-tu hawihhai loh lutuk vang zawk ? Ka dawihzep chhan ber chu sakeiin min seh ve mai ang tih kei mi(sual) hian ka hlau a ni.
