A hmasain he diary hi kum 22 (ni riat, thla riat, sawmriat pariat)zet liam taa min boral santu ka nu tan ka hlan e.
A hnen thleng tura lehkha ka thawn pawh a chhiar duh tan hetah a awm e.
http://www.misual.com/2008/08/08/ka-nu-hnena-lehkhathawn/
1st. Thursday: Chhiarpui, UID leh sakawlh inzawm leh zawmlohte ziahlanna ‘Sakawlh leh a chhinchhiahna 666’ tih lehkhabu Pc Biaksiama ziah chu Rev K.Lalthanliana’n a tlangzarh.
2nd. Friday: Mizo hmeichhe zinga mit donate hmasa ber ni turin tukin zing dar 2:00 a boral Pi Zasangi w/o Rothuama (L) chuan a mit a donate.
3rd. Saturday: Mi tamtakin an chetsual phah tawhna Silver Oak thing, Raj Bhavan hmar lam gate bula mi chu a zung chawpa kar phawng a ni.
4th. Sunday: Mizoram Presbyterian Kohhran chuan chawhnu leh zan inkhawm kha Health Sunday atan an hmang.
5th. Monday; United Penticostal Church (UPC) hnuaia Oneness Theological Seminary a Diploma in Theology Course zir zo mi parukte chu Bethlehem UPC Kohhran Biak Inah Graduation Day hmanpui anni.
6th. Tuesday; Mizo Hmeichhe Insuihkhawm Pawl (MHIP) day vawi 36-na a ni a; MHIP Branch hrang hrangte’n mahni remchan dan ang theuhvin an lawm a; headquarter hruaitute pawh hmun hrang hrangah an insemdarh a ni.
7th. Wednesday: MNF President hlui leh Mizoram state CM hmasa ber, Pu Laldenga chu vawiin, a thih champha vawi 20-na-ah khan Treasury Square-a a thlanah inkhawm buatsaih a ni a; an party mite’n zahna leh chawimawina an hlan. He inkhawm hi an party Vice President, Pu R. Tlanghmingthanga’n a kaihruai a ni.
8th. Thursday: Rotary International District Aizawl hruaitu tharte chuan zanin khan an hna an chelh tan. Hruaitu tharte hi President thar Pu Sanjay Chaukhani-a’n a ho dawn a ni.
9th. Friday: Serchhip DC Conference Hall-ah Gov’t. Serchhip College, Serchhip District Academy of Letters (SEDAL) leh ZOPPEN Club tangrual buatsaihin Rev.Liangkhaia pianchamphapha kum 125-na pualin ‘Seminar on Quasqualcentennial Jubilee (125th) of Rev. Liangkhaia’ neih a ni. He Seminar hawnna huna khuallian Serchhip District Bawrhsap, Pu H.Darzika chuan, Rev.Liangkhaia chu a pian atanga kum 125 hnuah pawh a thu leh hla ropui tak avanga chawimawi deuh deuh zel phu-a a hriat thu leh, a lehkha zirlaia pakhatna a hauh zel thei chu Mizo zirlaite tan entawntlak tling a ni, a ti
10th. Saturday: Lawngtlai District-a Lungzarhtum khaw hmeithai, Pi Menthai, chu a lovah an khaw mi tho Lalthawmliana chuan a pawngsuala; chumi hnuah a that.
11th. Sunday; Pu Lalpiangliana thihna chungchangah police-te chuan Lalpiangliana puzawn, MD Rai-a fate pathum Santosh Rai (34), Babu Lal Rai (30), Sibulai Rai (25) leh a tupa nia sawi – Sibu Rasbongsi (25) s/o Binu Rasbongsi, Lawipu Veng vekte chu an man.
12th. Monday: Santosh Trophy khel tur Mizoram State Football team-te chuan Santosh trophy an khelhna tur Kolkata chu thlawhtheihnain an pan. Mizoram hi Railways, Bihar leh Orissa nen group khatah an awm dawna; an match hmasa ber chu July 22-ah an khel dawn a ni.Mizoram team hi manager Vanlalngheta, Zotlang leh coach Benjamin Khiangte (Didina), Goa-a Faria Strikers team enkawltute’n an kaihruai a ni.
13th. Tuesday: Legal Metrology hnathawkte chuan Aizawl khawpui chhunga filling station hrang hrangte tuialhthei neih that lam an endik leh a, zawrh tlak loh khawpa chhia oil nei an hmu lo.Hetih lai hian, Mizoram Road Transport Union chuan, Legal Metrology-in oil pawlhdal leh pawlhdal loh an enfiahna hmanrua chu a tha tâwk lo nia sawiin, petrol leh diesel-a khawnvartui pawlh a nih leh nih loh hmuhchhuah nan a rintlak tawk lo niin an sawi a; tuna an hman mek aia hmanraw changkang zawk hmang thei se an duh thu an tarlang.
14th. Wednesday: India President, Pratibha Patil kut atangin Rasthrapati Bhavan Delhi-ah Guide chawimawina sâng ber Silver Elephant, Rev.Dr CL Hminga leh a dawttu Silver Star Rochhingpuii leh Rosie Lalrosangite chuan an dawng.
15th. Thursday: Hmeithai a pawngsual hnua rawng taka thattu Lalthawmliana chu Lawngtlai Council Veng YLA-ten manin Lawngtlai Police Station-ah an hlan.
16th. Friday; Mizoram University (MZU)-in Department 10-a post graduate leh under graduate zirtirtu tur a lakna result chu a tichhuak ta, he result chhuakah hian Mizo 10 leh hnam dang 18 an tling a ni.
17th. Saturday:Tun thla ni sawma Lungzarhtum khaw hmeithai, Pi Menthai, a lova rawng taka thah a nih avanga lungawi loh entir nan Lungzarhtum khaw mipuite’n an khuaah bandh an huaihawt a, mipuite pawna chhuah an khap bakah an khaw kal tlang tur lirthei tlan zawng zawng pawh an dang vek a ni. Bandh huaihawttute hian pawikhawihtu hi a phu tawk anga hrem ngei turin thuneitute an phut
18th. Sunday; Pu Pabuanga (90) Sihphir chu Astma natna avangin a boral.
19th. Monday; Lirthei khalhtu hmeichhia, dan kalh leh mawi lo deuha lirthei khalhte traffic police mipate tana hauh deuh a nawm loh cháng leh, dàwr vel a remchan loh châng a awm thin avanginTraffic police hmeichhiate Aizawl khawpuiah duty tir tan an ni. Tun tumah hian mi pali chauh duty tir an la ni phawt a, a remchan dan anga tihbelh zel tum a ni.
20th. Tuesday: Ramthar Veng, Aizawla a chhungte hnena lehkha zira awm, Lalpektluanga (14), s/o Lalsavunga Sailo, Zokhawthar, kumin June 24-a inawk hlum nia hriat chu a nu leh pain inâwk hlum ni theia an hriat loh avangin Aizawl Police Station-ah FIR an thehlut a; hei vang hian Lalpektluanga ruang hi phawrh leh a ni. He ruang hi doctor leh police ten an enfiah nghal.
21st. Wednesday: Sachin Pilot, Union Minister of State for Communications and Information Technology chuan zankhat riak turin Aizawl a rawn thleng.
22nd. Thursday: Nimina lo zin,Union Minister of State for Communications and Information Technology, Pu Sachin Pilot chuan I&PR Conference Hall-ah thuthar thehdarhtute kâwmin, BSNL kaltlangin 2011, December-ah chuan Mizorama thingtlang khaw tinah broadband internet hman theih a nih tawh tur thu a sawi. Pu Sachin-a hian vawiin tlai khan Mizoram chhuahsanin New Delhi a pan lehnghal a ni.
23rd. Friday: Tanhril V/C member, Lalpiangliana thihna chungchanga police suspend mekte zinga mi, Luangmual Police Outpost-a O/C VL Ramhluna chu Chief Judicial Magistrate-ah a inlan a, District Jail-ah ni 14 chu táng tura tih a ni. Hetih lai hian police an man dangte kha chu an hriselna a that tawkloh avangin bail-a chhuah anni.
24th. Saturday: Tukin zing, khawvar hma khan Bawngkawn SBI hnuaia Ramhlun Industry peng bula pawisa lak chhuahna khawl, Automated Teller Machine (ATM) khawl chu mi pakhatin a rawk a, mahse pawisa bo a awm lo. ATM-a Close Circuit Television (CCTV) atanga a lan danin, ATM rawk tumtu hian a tirah a hmai a tuam a, a hnu-a pawisa lak leh a tum chuan a hmai a tuam tawh lova, khawl khuhna a kar chhe nual tih loh chu khawih chhiat dang emaw, pawisa lak chhuah emaw a nei lo a ni. Pawisa ruk tumtu hi chhui zui nghal a ni.
25th. Sunday: Kumtina tih thin angin Kohhran hrang hranga member-te chuan an huana an thlai thar chhuahte Biak Inah an keng khawm a; inkhawm banah a duh apiangte lei theih turin an lilam.
26th. Monday: Tanhril VC member, Pu Lalpiangliana’n a puzawn, MB Rai a thah avanga a thubuai chhuitu, VL Ramhluna chuan a thubuai neihpuite ang bawkin lung ina tang turin a chak tawk lo tih ziahna, Doctor lehkha a neih ve leh avangin Court-in thla khat atan interim bail-in a chhuah.
27th. Tuesday: New Delhi ah Mizoram Sawrkar leh Unique Identification Authority of India (UIDAI) chuan thuthlung (MoU) an ziakfel a. He thawhona hi Mizoram Sawrkar aiawhin Chief Secretary Pu Van Hela Pachuau leh UIDAI aiawhin Shri Davinder Kumar, DDG, UIDAI ten an ziakfel a; Shri R.S Sharma DG &MD, UIDAI pawh a tel bawk a ni. Thuthlung ah hian Mizorama Unique Identification (UID) kalpui dan tur tarlan a ni.
28th. Wednesday: Larsap Lt. Gen. (Retd) M.M.Lakhera, PVSM, AVSM, VSM chuan New Delhi-a Russian Centre ah “INTERNATIONAL CONVENTION ON IMPACT OF GLOBAL CLIMATE ON AGRICULTURE” (Khawvel huapa Global Warming in Agriculture a nghawng dan) zirhona chu khuallian niin a hawng.
29th. Thursday: October 3-a New Delhi-a tan tur, Britain awp tawh thin ramte infiamna hmanga inelna, Commonwealth Games vawi 19-na meichher, Queen’s Baton Relay (QBR) chuan Aizawl rawn thlengin, khawpuiah tlan kualpui a ni a, tlan kualpui zawhah Vanapa Hall-ah Chief Minister Lal Thanhawla hoin a lawmna hun hman a ni. QBR hi October 29, 2009 khan Buckingham Palace atangin Queen Elizabeth II-in a vailiam a, Commonwealth ram hrang hrangte fanpui a nih hnuah June 15, 2010 khan Pakistan atangin India ramah luhpui a ni. India rama state hrang hrang fan kualpui a nih hnuah October 3 khian Commonwealth Games hawnna hmun tur, Jawaharlal Nehru Stadium, New Delhi a thleng ang a, Games hawn zui nghal a ni ang.
30th. Friday: Nimin a Aizawl khawpui rawn fangkual Queen’s Baton Relay (QBR) chu Kolkata panpui a ni leh ta.
31st. Saturday: Chanmari West Branch YMA chuan YMA kum 75 tlin lawmna atan Aizawl Civil hospital-a damlote hman atan thisen Unit 206 an pe a, thisen petute hi mipa 176 leh Hmeichhia 30 an ni a, heti hian anni branch hian Mizorama a ruala thisen pe tam ber record an siam a; a hmaa pe tam ber lo ni thin Ramhlun North Br YMA pek Unit 171 chu Unit 35 in an khum a ni.
