A awmzia ni a lang chu, ”Tumah sang bik , ropui bik pawh kan awm lo, kan in ang tlang vek a ni” tihna ni awm tak a ni. He tawngkam hi hmang lar tawhlo mah ila kan rilruah hmun ala khuar thuk hle a, a pawi kan ti dawn nge, kan hnamzia ve hrim hrim kan ti dawn. Hnamdangte hi chuan chi inthliarna hi an nei nasa a, lo nei mi, a then ranvulh chi, a then puithiam chi etc.-te an awm a, an chi a zirin an hnathawh a dang a, an in endanah pawh hniam leh sang an awm fel thlap mai a, an rilru pawh a hruai hle.
Buhfai no khat ei theuh theuh an inbiak dan, nunho dan thlengin a nghawng a, an in zah em em a ni. Mahse chi inthliarna erawh hi chu nunhona atana tha lo ber te zinga mi a ni ta ve ang. Hmana kan mizo khawtlang nunah khan an khawsak phung a inang tlangin an intluk tlang thim them hlawm a. Tunlai khawvelah chuan a thenin zanriah thlak tur an neih loh laiin a then chuan kum sawm (chuang fe) tla te an nei tawh a, Kan in ang tlang tawh lo hle a, chuvang chuan hmanlai tawngkam ’buhfai no khat ei theuh theuh’ tih hi a remchang tawh lohna atam viau dawn mai ?
Tunlai khawvelah chuan Upat pawh hian awmzia a neih lohna a tam tawh khawp mai a, naupang te te sawrkar hnathawk lian tak tak leh eizawnna lama hlawhtling tak tak an tam tawh a, a then rapin (di in) a an awm laiin a then chhawng riatna velah an khuh khak khak tawh mai si a. Kan finna leh chakna te pawh a in khan tawh lo hle. Chuvang chuan kum lam ringawt thlir lovin a tul hunah chuan “a lo ni dawn tak e” kan tih thiamte pawh hi a lo la ngai dawnin ka hria.
A tul hunah chuan tu leh fa te rual lek lek pawh “Ka pi, ka pu” tih ngam ve te pawh hi a ngai tawh lo maw ? (Upa te zah lohna lam nilo in). “Ani te chu, an naupan laia kan tirh kual vel mai mai a lawm, kan chhang rual lek a lawm” ti a, zahna lam lantir ai chuan kan upat zawkna hmang a chal delh deuh a biak leh chhawn chhaih te hi a awm thin lo maw ?
Intluk tlanna kan tih mek lai hian intluk tlan lohna lam te hi kan thlir thiam ava tul em ! Mizo te zingah hlawhfa rawih nikhua te hian a ruaitu leh a rawih a te intluk tlang reng a hria, hlawh min petu tih pawh hre lo ni awm tak a, a ruaitu aia thu zawk tum lek lek, ruaitu te tana ngaihdan sawi ngam loh khawp te pawh hi awm theih tak a ni. Hlawhfa leh a ruaitu an in ang theilo, bawih leh a pu an in ang thei lo. Bible chuan bawih chu an pute thu thu a awm turin min zirtir a, thil hi a in khaidiat a awm a ni.
Intluktlan kan han tih ve fahran chang pawh hian hausa leh rethei chu an intluktlan tak tak theih loh chin a tam khawp mai. A hausak vanga lo chapo an awm pawhin a retheih hre kara chapo deuh hi a awm ve theih tho a nia !! Khawtlang leh kohhran-in mamawh lian deuh a neih chang a ‘an ni an awm a lawm’ ti a tlema neite deuh kan han pur chang pawh hian an chhiatni thatni-a an neih mil deuha an han chet ve na turah erawh chuan a hausa leh rethei kan khairual leh lawi si laite pawh hi hunin a liampui dawn tawhin ka ring, ‘khawtlang min zah lo, an neih an hre lutuk’ han tih khum mai te pawh hi a lo awl leh si a ni ang e.
Officer pakhat chuan a peon (a pa rual vel) chu tirh leh koh nikhua hian a tha a zat vak loh thu leh peon atan upa deuh neih chu a nawm loh thu a sawi a, ngaihtuah a ti thui duh hle … ‘Buhfai no khat ei theuh theuh’. Hman kha tun a ni tawh lo a, naupang thin kha a lo puitling tawh a sin. A hun leh hmun a zirin tlawm thiam, indah hniam, aia upate zah thiam leh enkawl dan thiamte pawh hi zir zel ila, aia naupang zawk pawh an dinhmun a zira en thiam a tul ta a ni. Zonunmawi hi i chhawm nung zel ang u … hmanlaia an tih ang diak diak kher nilovin a tul chuan tunlai huna a tha zawk thlir tel reng chungin le ….
