Kan A, Aw, B … in kum 100 a tlinna a rei leh ta. Mizotawng hian kawng tam takah hausakna riau a neih rualin kan tawngkam hman tlanglawn tak tak thenkhatte erawh hi chu Mizotawng ngeia a sawina tawngkam kan neih loh leh hnamdang tawng kan hawh chawp a ni a, thenkhatte phei chu kan tawng ang hrima kan hman zui tak an ni hlawm. Technical (technology leh akaihnawih lam pawh a ni thei ang) lam sawina tawngkam leh a hmingte erawh hi chu mahni tawnga lo leh chhuah chi loh hi a tam zawk a ni thung mai thei.
Ka nitin tawng hman tlanglawn tak taka hnam dang tawng kan hman nasat zia sawi dawn ta ila chu a tam khawp ang. Kan Pathian Biakna hmun Biak In-a kan chetvelna leh a behbawma tawngdang kan hman 10 lek ka han chhawp chhuak ve chhin duh a –
1) Conference – Inkhawmpui tihna a ni a. Mahse, sap tawng khera hming neih hi a changkang a la ni rih a ni ang e. YMA leh K.T.P Khawmpui lian ber pawh hnamdang tawng ngatin ….
2) Receptionist/Usher – Khualchhawn ti ta ila a fuh ber a ngem. Nge saptawng ngatin ni zel dawn…
3) Vestry – Biak In ah chuan kan nei deuh vek mai, mizotawngin dah dawn ta ila engtin nge niang?
4) Gallery – Biak In hnung lam leh a sir kual chhuaka thutna tur dawh san chhawng dang dawh belh zawng zawngte hian Gallery kan ti vek maiin ka hria. Mizotawngin dah dawn ta ila engtinnge niang ?
5) Reception Counter – Khawmpui nikhua hi chuan a ngai ngei ngei te zing a mi a ni. ‘Khual chhawn buk’ ti ta ila a remchang em?
6) Hall – Kohhran chauh nilovin veng hrang hrang pawhin Hall kan nei. Hall tih hi kan tawng a ni lova, a tlukpui, mizotawnga neih theih dan hi awm se a tha ngawt ang ka ring ?
7) Pulpit – Chairman awmna lai hi ‘Maicham’ kan ti a, Pulpit tih lai tak hi Mizotawng a ni em ?
8) Lectern – Biak In-ah hian kan nei nual hlawm mai. Mizotawnga a hming neih ve a chakawm.
9) Stage – Hmun tam takah chuan ‘dawhsan’ kan ti mai a, a fuh ber em ?
10) Meet – Khawmpui aia tenau deuh zawk atan Meet tih hi kan hmang nasa, saptawng kher hmang lovin ‘intawhkhawm’ ti ta mai ila thlarauvin min chenchilh tho angem aw 🙂
Pi leh pu, nu leh pa te atangin kan tawnga a sawina tlukpui kan neih ve loh thenkhatte chu hnamdang tawng hawhin kan Mizo tawng ang hrima hman zui engemaw zat kan nei tawh a, han thlak leh han siam danglam chu huphurhawm tak a ni. Amaherawhchu Mizo hnam hmasawn zelna tur atan kan tawng kan tih hausak tel hi a tulin ka hria a, a theih chin chinah hnamdang tawng kan hman/hawhte paihin kan mizotawng ngeiin nei thei zel ila. Pathian kan biakna- leh a behbawma hnamdang tawng kan hman thinte hi Mizo tawng ngeia neih uar zel a pawimawhin ka hria a. Mahse inlungrual tlanna a awm loh chuan a har si a, Mizo tawnga phuah thar ngaite, siam chawp ngaite a nih pawhin ka tawng hausak zelna tur a nih ka ring.
A tawp nan hming chungchangah erawh hi chuan thenkhatten sap hming ti a kan sawisel tam tak hi chu Bible-a Pathian mite hming kan duhzawngte an ni tlangpui a hriatna ka nei a. Kristian-te zingah pawh hian Bible tlawh chhana hming phuah hi a bang dawn lo niin a lang. Mahse ‘Juda Iskariot’ leh ‘Saul-a’ tih hming pu zui hi chu an awm lo niawm tak a ni 🙂
