Hmanlai kan pi leh pute kha i han ngaituah teh ang. An thawhchhuah ringin an nung a..rim taka hna thawkin an thawh hlawh ringin an nung a,khatih hunlai kha chuan an thawhloh chuan an nghei dawn a ni tih an hriat avangin an theihna zawng zawngin hna kha an thawk a. Chumi an thawhhah rah chu hlim takin an seng a,chhungkaw khawsak lungkhamnain an nun a tibuai ve ngai lo..
Chung kan pi leh pute chu Chanchin Tha an lo hriaa,Kristianah an inpe tan ta..khang kan ringtu hmasate kha an va dodal nasa em tiro u. Khua atanga hnawhchhuah tawkin,hrehawm tinreng an tawrh tir a nih kha. Ngatinge khatiang em em a an tih niang le? Kristiante kha chu Pathianni serh an ngai a,hna an thawk duh si lova,khami kha ngaihtheihloh vangin hrehawm takin an siam hial a ni. Mahse,hun a lo kal zel a,an nundan a that em avangin ringlo mite pawhin Kristian sakhua an lo vuan ve ta a..kan ram chu za a za kristian a tih theih hial a ni.
Hun a lo kal zel a,ram a rawn buai ta..mizote chu sipai hoin min sawisa a,hrehawm tinreng min tawrhtir a,lungngaihna chhum a zing a,nunau an tap a,patling an rum a,luikawrah thisen a luanga,zoram chu a buai hian a buai nuai mai a ni. Kum eng nge maw zat kan ram a buai hnuah zalenna kawl a lo eng a,chhemdam thli pawhin ngai a rawn awh leh ta..nunau leh patling,pitar putar chenin zing ni rawn chhuakin a ngilneihna a rawn lantir leh a,chhun khaw engin zahngaihna a nei a,zan thimin thlamuanna thu a rawn keng ta. Zoram boruak thar chu hlim takin mipuiin kan hip leh ta.
Kha rambuai avanga zoram hliam erawh kha chu rei fe a awm a,a hliam a pûn tlat mai! Kan thlahtute kha mahni thawhchhuah ringa nung an ni a,rambuai avanga kan hliam tawrh rawn pûn ta chuan hlemhletna a keng tel tlat mai le. Hmanlaia thianglo kha rambuai avangin a thiang ta tlat mai le.
Chu hliam damthei tawh lo chu a nasa zel a,zoram pum mai hi reiloteah a tuam chhuak ta. Thenawmnu in a thenawmte neih ve ang neih a duh avangin an pa a thlem a,rualawhnain an thinlungah zung a kaih tan a,thenawmpa pawisa lakluh zat la lut lo mahse a neih ang neih erawh a tum tlat a. A neita..khawi atangin nge pawisa a neih? A hlawh atang chuan a pha lo tiro u? A thilrukin a lei a nih hi!
Rilru retheia ram hruaitum hi kan va tam ta em? Vantlang ram-vawk in tiah awrh tur pawh chilputin kan thlir ngawih ngawih a,neih tumin kan phi chung a nih hi.
Pawl chi hrang hrang a lo piang a. Vehbur khawnin inthlahrunna nei miah lovin min dil a,chutiang mite chuan ram siamthat an tum a maw? Hmabak a eng lo teh e. Pawl thenkhat ve chu hnamdang hnenah chiah lo la tawk lah bo lo. Rambuai avanga kan hliam tawrh hi a va nasa ta em!
Thenkhat chu dawhkan atangin diklo takin sum kan la lut a,chutiang mite tan chuan hah taka an thawhna rah hlu tak ang kha a awm lova..chu chuan naupang nun a tikhawlo a,thahrui hmang lovin nawmsip bawl an chinga,hnathawh an hreh a,chumi rah chu lehkha thiam hna hmu lo pawl a rawn ding ta a nih hi!
Heng thahrui hmang lova dik lo taka sum lakluh ching mahni fate pawh enkawl thei lova sum ringawt buaipui tu ho hi ram hmelma chu an ni. Ni e, ram hmangaihtu dik takte chuan ‘ka pu eiruk ching bang rawh se’ kan ti a ni e
