Kum 43 bawr vel kalta ah khan Mizoram chuan zalenna kan sual a, mizote chu hrehawm tinreng tawrh tirin,nunau hlauin an khur a, patling an rûm a..kan nulate pawngsualin,kan tlangvalte chu talhfiaka hrem anni a. Kan ram luikawr mawi tak tak,fur laia tuihawk luang ri her her thin hmunah khan thisen a luanga, khatih hunlaia mizo nun kha chu a chep takzet a ni. Lehlam lehlamah hlauh tur an awm bawk si..mizoram hi lungngaihna chhumin a zîn hnan tlat tawh avangin an tan khaw en hun a nghahhleh awm hle a ni.
Hun eng nge maw chen sipai hlau takin kan awm a,a hnuah zalenna kan hmu ta..kan hnam inpumkhat zia min hriat hnuah rambuaia min sawisak retheihna kha hmanruaa hmangin sum hlawmin min vawm a. Tunhmaa kumkhat chhunga mahni thawhchhuah ei thin kha thil diklo tih a tam tak hui luh duhna kan thinlungah an tuh a. Hnam taima leh rinawm ni thin kha hnam thatchhiaah min siam ta.
Kan thalai taima tak tak te ruihhlo bawihah tan tirin,rinawm tak tak thin te rukruah min chhuahsak a. Chu an nunphung an hlohna chuan rambuai aia nasa zawkin nghawng a nei dawn tih kan hre pha si lo. Kan thalai nakina fel tak tak,ram tha taka rawn hruai thei tur te chu ram tan mi hnawksakah min siamsak tan ta. Hawh u,ruihhlo bawih atat zuang chhuakin ram hnukkhawih thil vel pawh kan ngaihtuah ve ngam tawh dawn lawm ni?
Chutah kan nunphung kan hloh tan ta maw tih hnuah mahni kea ding turin state nihna min pe a,mahni kea ding tura hma lam pan a ngai ta..mipuite chuan state thar kan neita kha kan lawm em em a,mahse kan ram nunphung en khan hmabak a eng lo tih kan hmu thiam tlat si lo. Rambuai atang kha chuan kan ram a zalen tawh a. Mahse rambuai hmaa kan nundan leh state kan nih hnua kan nundan inthlak nasa ta lutuk kha chuan buaina a va thlen nasa ta em!
Hun a lo kal zel a,khawvel changkanna in min rawn nuai ve a. Kan thalaite chu rambuai avanga ram tawh tlusawp siamthatna lam ngaihtuah lovin changkanna lamah kan in tlansiaka. Ram aiin mahni kan changkanga,ram changkannain min rawn umpha lova,ram rethei tak ni chungin incheina lama India a sangber pawl ni pha tur khawpin kan awm ta. Hawh u,chawmhlawm state ni reng si a sang tak taka inchei hi hnamdang mit hmuhah a mawi lo tih i hre thar leh teh ang u.
Zirna lam sawi teh ang. Kan ram hi India rama ziak leh chhiar thiam tamna lamah erawh kan sang hle a. Lehkha pawh kan thiamthei e. Mahse,thiamna zik tluak tak nei lovin a tawpah lehkhathiam hna hmulo pawlah kan lut leh thin. Kan lehkhathiamte pawh phai lama hnathawk lovin mizoram mi nuai 8 vel lek awmnaah sorkar hna thawh tumin kan inpel suau suau ta a nih hi. Hawh u,mizoram ringawta hnathawh tum lovin state dangah hna zawnga chhuah i ngam tawh ang u. Tichuan state dang pawisa kan ramah kan la lut thei anga,ramin pawisa a lakluh a tam thei dawn a ni.
Thalai nun in sawi leh teh ang..hmanlaia thalai nun thianghlim tak, nulain inlengte zinga ngaihzawng a neih pawha an hriat mai mai theihloh laiin tunlai hunah zawng sawn pai ngam chu kan fak tan ta maw? Nawmsak kan duh lutuk na lamah kan khawtlang nun pawhin a chhiatphah tawh a nih hi. Kan ram hruaitute pawh hian mi lehkhabu leh cassette tlangzarhnaa kal kal tawh lovin thalai hmakhua lam hi ngaihsak zawk tawh teh ang u.
Kan pi leh pute kha mi huaisen ral leh sakawlh hmaa zam ngai lo. Thian chhan thih ngam nun neitu anni a nih kha. Hawh u,Vana Pa leh Khuangchera thlah mizo thalai huaisen te u..i harh ang u!
